Zabuli 149 - Luganuzi Luswanu Kuli Wanhu Wose 2002

Lwimbo lo lukumyo

¹ Mumulumbe Muwaha Mulungu! Mumwimbile Muwaha Mulungu lwimbo lupya, mumukumizye mu mhuga ye wanhu we ling'ani!

² Wusangalale, 'gwe Isilayeli, hambi mwene nha yo muwumbi wako, nanye nyo wekala ku Sayuni, sangalalenyi, hambi mwene nha yo mutemi wenyu.

³ Mulikumizye litagwa lyakwe, mu wuvina, mumwimbile kwe zing'oma ne masumbi.

⁴ Nayo Muwaha Mulungu, nha kendezwa ne wanhu wakwe, kawapelaga i wapolo wusume.

⁵ Nawo i wehuwilwa, wasecelelele mu lukumyo, wasangalale cilo cose sunga wele.

⁶ Nhondo zose weze kwanza, zo lukumyo luwaha lo Mulungu, akuno webate ne mimaje mikali, kose kose mu miwoko yawo,

⁷ ho wasume kuwalipiciza we makungugo, no wulipicizwe we wanhu,

⁸ wawawope watemi wawo ne manyolo, wawawope ne walongola wawo ne manyolo ge cuma,

⁹ wawalipicize we makungugo, nha vyono Mulungu yalajiliza. Na wuwo wo wusume we wanhu wo Mulungu. Mumulumbe Muwaha Mulungu!