Zabuli 138 - Luganuzi Luswanu Kuli Wanhu Wose 2002

Lilombo lyo wulumbe

¹ Gwe go Muwaha Mulungu, nghukulumba kwe nhumbula yangu yose, nane nokwimba zo lukumyo lwako hali milungu.

² Nane nohemba niyidomile Nyumba yako yono yelile, kanyhi nokulumba ku soko yo lusungu lwako, hamonga no wihuwilwa wako. Hambi nha kulajila vyono litagwa lyako, hamonga ne malajilizo gako, vyo vilawiliciye.

³ Nane lono nakulilila, nagwe wukahulika, kanyhi wukasikamya kwe vilungo vyako.

⁴ Gwe go Muwaha Mulungu, i watemi wose wa kono'nze nha wokukumya gwegwe, hambi nha wakondya kuzihulika zo wihuwizo wako.

⁵ Nawo wokwimba zo lukumyo lwe metumo gako, 'gwe go Muwaha Mulungu, ku soko yo wuwaha wo lukumyo lwako.

⁶ Gwe go Muwaha Mulungu, hamba wuwe wuli kucanyha muno, ninga wukuwalanga ko wuswanu i wasocele, ne wewoni wose, si wosuma kwihundika ha meso gako.

⁷ Na lono wugaye winji wumhilime, agwe kundimaga, kuwemilaga walugu wangu mu makuwo gawo, kanyhi wukuwa kumhonya kwe vilungo vyako.

⁸ Gwe go Muwaha Mulungu, kozifisiliza zose zono wehuwiza. No lusungu lwako 'gwe go Muwaha Mulungu, nha lwikalaga cibitilila. Wuyikondeleze milimo yako yono wayanza.