Zabuli 126 - Luganuzi Luswanu Kuli Wanhu Wose 2002

Kulomba wukombozwe

¹ U Muwaha Mulungu, lono yacigomolela, kanyhi ku Yelusalemi, cali nha wanhu wono wali mu ndoto!

² Baho cikagwa mu seko, cikemba ko wusangalale. Sunga ne wanhu we makungugo ganji wakawa kutya, “Muwaha Mulungu mbeka, kawatendela zimbaha!”

³ Na mbeka Muwaha Mulungu yacitendela mezino mawaha, sunga na sese co weneco, cikasangalala muno muno.

⁴ Gwe go Muwaha Mulungu, cikukunena kanyhi wucimotese, nha vyono vikolongo vihulumilaga malenga, mu malolo gono ganyalile.

⁵ Wono wakuhadika zimbeyu zawo, wakulila mahozi, wolodudula wasangalaye!

⁶ Wono wakubita ku wuhadici akuno wakulila, wowuya wasangalaye wadinghuye ne ndudula yawo.