Zabuli 122 - Luganuzi Luswanu Kuli Wanhu Wose 2002

Lukumyo kuli Yelusalemi

¹ Nasangalala waza kunonjela wakutya, “Ale cibite ku kaya yo Muwaha Mulungu.”

² Alu ase cakondya kufika, nalu cimile ha milango ya Yelusalemi!

³ Gwe Yelusalemi, go likaya lyono lizenjigwe wuzengwe wuswanu muno, kanyhi wukamile!

⁴ Ale, mumo mo makungugo gakuza, heya, makungugo ga Isilayeli, gakuza gawe kumulumba Muwaha Mulungu, nha vyono yalajiliza.

⁵ Na mumo mo mogali mahakama go, kuwaling'aniziza wanhu mu ling'ani, i mahakama ge nyumba ye citemi ya Dawudi.

⁶ Holeka muyilombele Yelusalemi mulamu, “Nawo wose wono wakwendile, wamoteswe.

⁷ Mwi'kumbo lyako, muweze no mulamu, na ku zinyumba zako kuweze kupolile!”

⁸ Ku soko ye wayangu hamonga ne wandugu zangu, holeka nghulomba mulamu wuweze muli gwegwe, agwe go Yelusalemi!

⁹ Na ku soko ye nyumba yo Muwaha Mulungu wetu, holeka nghukulombela wutuje wumoteswe!