Zabuli 119 - Luganuzi Luswanu Kuli Wanhu Wose 2002

Wulajilize wo Muwaha Mulungu

¹ Wamoti wono wena mikalile, yono yisina masutya, wono webate wulajilize wo Muwaha Mulungu.

² Wamoti wono wetumaga zo wuhile wo Mulungu, wono wamuhulicile kwe zinhumbula zawo zose,

³ wono si wetumaga zo wubi yaye, langa wene watyatyaga, zo wutonji wakwe nhondo zose.

⁴ Gwe go Muwaha Mulungu, wacijiza ze mejizo gako, ho cigebate ko wihuwilwa muno.

⁵ Yali yiwe yili ciba le, hono mikalile yangu yali yisikame, mu wibata zo wutonji wako!

⁶ Na hono mbeka nigakamise malajilizo gako, mbeka si nokozwa cevu yaye.

⁷ Nane nokukumya kwe nhumbula ye cogopo, hono niyijize ze ning'aniza yako ye ling'ani.

⁸ Ane nowutyatya du wutonji wako, holeka wulece kundeka nili wene yaye.

Cihuliko ca kuli zo wulajilize wo Muwaha Mulungu

⁹ Alu muzelelo kosuma nhawule, kuyinozeleza mikalile yakwe? Langa mu wibata malajilizo gako du.

¹⁰ Nghusimbilila muno nghuhulice, kwe nhumbula yangu yose, holeka nagwe wulece kundeceleza, mbene malajilizo gako.

¹¹ Nibate lilajilizo lyako, mu nhumbula yangu, ho ndece kukusutizya.

¹² Lukumyo lweze kuli'gwe go Muwaha Mulungu! Wunyijize ze nzila yako.

¹³ Nane nozanza kwe'zi yiwaha muno, ze malajilizo gako gose gono wawika.

¹⁴ Nane sangalaye muno, so wutyatya zo wuhile wako, si nho kuwa no wugoli winji.

¹⁵ Nihwesaga du ze mejizo gako, no kugakamisa malajilizo gako.

¹⁶ Nghuwusangalalila muno wutonji wako, holeka si nolisemwa yaye lilajilizo lyako.

Nyemo yono yili mu wulajilize wo Muwaha Mulungu

¹⁷ Wumotyaje 'ne no mwitumami wako, ho niwe mumi, no kulikamisa lilajilizo lyako.

¹⁸ Wunuguze meso gangu, ho niziwone zo wizine wa mu wulajilize wako.

¹⁹ Ane nha nili mukola nzila du mono'nze, holeka wulece kuhundicila zo wulajilize wako.

²⁰ Nhumbula yangu yitamice muno, so wusulumila nhondo zose, kumanya zo wulajilize wako.

²¹ Agwe nha kuwakalipilaga, i wanhu wedunhumuzi, holeka walijitwe wose, wono wakugabedegala malajilizo gako.

²² Wumbusize maligo gawo, hamonga no wubedegalwe hambi 'ne, nha niwibate muno wuhile wako.

²³ Sunga ne wawaha nawo wena wuhile wubi kuli'ne, ninga hamba nhavivyo, ane no mwitumami wako, nojendelela kwihwesa zo wutonji wako du.

²⁴ Hambi i mejizo gako nha yo nyemo yangu'ne. Kanyhi go gamhelaga wutonji wuswanu muno.

Wutonji wo wibata wulajilize wo Muwaha Mulungu

²⁵ Nghugalangala hasi mu manghundi nasumwa, holeka wumhelaje kanyhi wumi, nha vyono wehuwiza.

²⁶ Nha nakondya kunena kuli zono nasutya, nagwe wukahulika, holeka wunyijize zo wutonji wako.

²⁷ Wunyijize nzila yo wibate we malajilizo gako, nane nozihwesa ze metumo gako go wizine.

²⁸ Alu wusungu nha wanhulila muno so wukalale, wumhelaje kanyhi vilungo, nha vyono wehuwiza.

²⁹ Wumbusize nzila yo wajilile, wunyijize ko wupolo ze malajilizo gako.

³⁰ Ane nahagula nzila yo wiling'ano, kanyhi nibate ne ning'aniza yako.

³¹ Gwe go Muwaha Mulungu, ane nigebate du mejizo gako, holeka wulece kundeceleza nghozwe cevu!

³² Nane nojendela mu nzila ye malajilizo gako, hambi agwe nha kocila kumhela wizuce.

Lilombo so wizuce

³³ Gwe go Muwaha Mulungu, wunyijize zo wutonji wako, nane nowukamisiza lukulu vilo vyose.

³⁴ Wumanyize malajilizo gako, nane ho sume kugebata, kanyhi nigebate kwe nhumbula yangu yose.

³⁵ Wunhonje nigebate malajilizo gako, hambi mumo nha mo nghutujila nyemo.

³⁶ Wumhele nyhilu yo kugebatila malajilizo gako, ninga yilece kuwa so wutuga cambuzi yaye.

³⁷ Wumbusize wuwe wo kuzityatya, zinghani zo wulele, wunhonje ho sume kuwumipa.

³⁸ Wufisilizize ane no mwitumami wako, wihuwizo wako, wihuwizo wono kuwapelaga wose wono wakogopile.

³⁹ Wumhonye ne matovulo gono nghugogopa, hambi ning'aniza yako nha swanu muno!

⁴⁰ Nyendile muno nigebate mejizo gako, holeka wumhele wumi, hambi 'gwe nha wuli ling'ani.

Kuwitumbila wulajilize wo Muwaha Mulungu

⁴¹ Gwe go Muwaha Mulungu, nghukunena lusungu lwako lunyizize, wumhonye nha vyono wehuwiza.

⁴² Nane nhondo ho nosuma, kuwapitula wawo wono wakundiganga, hambi 'ne nha niyihuwiye nghani yako.

⁴³ Wunhaze niwe kuyilonga i mbeka yako, nhondo zose, hambi witumbilo wangu, nha wuli mu ning'aniza yako du.

⁴⁴ Nane nowukamisa wulajilize wako nhondo zose, cibitilila ne cibitilila.

⁴⁵ Kanyhi nokwikala nili mwelecele nhondo zose, hambi nha nigakamise mejizo gako.

⁴⁶ Kanyhi nowanziza watemi ze malajilizo gako, hamba si nowona cevu yaye.

⁴⁷ Ne nyemo yangu yose, yili mu wibata malajilizo gako, hambi nha nigendile muno muno.

⁴⁸ Nigogopile kanyhi nigendile malajilizo gako, nane nowa kuzihwesa muno ze mejizo gako.

Witumbilo wa muli wulajilize wo Muwaha Mulungu

⁴⁹ Ale, wukumbucile wihuwizo wako, wono wanyihuwiza ane no mwitumami wako, wihuwizo wono wumheye witumbilo.

⁵⁰ Hamba na mu wugaye wangu, nghatuzwa, hambi wihuwizo wako nha wukamhela wumi.

⁵¹ I wedunhumuzi, wambedegalaga nhondo zose, ninga hamba nhavivyo, ane si niwubedegalaga wulajilize wako yaye.

⁵² Nane nizikumbucilaga ze ning'aniza zako, zo wulawa katali 'gwe go Muwaha Mulungu, nane nghutuga wutuzwe wuwaha muno.

⁵³ Nane nghukolwa muno ne likuwo, lono nghuwawona i wabi, wakubena malajilizo gako.

⁵⁴ Nane lono nili kuno ku wujenzi, zinyimbo zangu zose, nghwimba ze malajilizo gako du.

⁵⁵ Na mu cilo namo, nghukumbucilaga gwe gwe go Muwaha Mulungu, akuno nghwihwesa ze malajilizo gako du.

⁵⁶ Nane natuga wulugutwe wuwaha, vyono nigakamise malajilizo gako.

Wuhidimbazi kuli zo wulajilize wo Muwaha Mulungu

⁵⁷ Gwe go Muwaha Mulungu, agwe yo gwegwe du mono nghusaka, Nane nghwihuwiza vyono nokwibata, wulajilize wako.

⁵⁸ Holeka nghukunena kwe nhumbula yose, wumbonele lusungu, nha vyono wehuwiza gwegwe!

⁵⁹ Nayihwesa mijendele yangu, holeka nihuwiza nizityatye ze mejizo gako.

⁶⁰ Nane hamba si nocela yaye, ku wutyatya malajilizo gako,

⁶¹ hamba yiwe mitego ye wabi yindadilize, ninga ane si nowusemwela lukulu wulajilize wako.

⁶² Nane ninukaga mu cilo mugati, niwa kukukumya ku soko ye ning'aniza yako ye ling'ani.

⁶³ Nane nili mwendece kuli wose, wono wakogopile gwegwe, kanyhi na kuli wose wono webate ze mejizo gako.

⁶⁴ Gwe go Muwaha Mulungu, yinze nha yimemile zo lusungu lwako, holeka wunyijize zo wutonji wako.

Wunojele wuwaha wo wulajilize wo Muwaha Mulungu

⁶⁵ Gwe go Muwaha Mulungu, kunhendela viswanu ane no mwitumami wako, nha vyono wehuwiza gwegwe.

⁶⁶ Holeka wumhele mahala no wizuce, hambi 'ne nha nihuwiye malajilizo gako.

⁶⁷ Lono wali wukali nandipiciza, netumaga zimbi, ninga aluno, noyikamisa nghani yako.

⁶⁸ Agwe nha wuli muswanu, kanyhi wuli lusungu, wunyijize zo wutonji wako.

⁶⁹ Iwedunhumuzi wakumbalalila zinghani zo wulambi, ninga ane nghamisize du ze mejizo gako.

⁷⁰ Zinhumbula zawo zimemile wulele du, ninga ane nghuwusangalalila wulajilize wako.

⁷¹ U wulipicizwe wangu wali viswanu kuli'ne, hambi nha wunoza niyijize zo wutonji wako.

⁷² Hambi wulajilize wono wawuwika, nha wuswanu muno wucizize zisawo zose za mono'nze.

Wiling'ano wo wulajilize wo Muwaha Mulungu

⁷³ Gwegwe go mweneco yo wamumba kwe miwoko yako, ale, wumhele mahala, niyijize ze malajilizo gako.

⁷⁴ Nawo wono wakogopile, wombona kanyhi wosangalala, ku soko vyono ane niyitumbiye nghani yako.

⁷⁵ Nane manyile vyono wuling'anize wako, wo we ling'ani 'gwe go Muwaha Mulungu, na vyono kanyhi kundipiciza, vyono 'gwe wuli mwihuwilwa.

⁷⁶ Lusungu lwako lo lukusinyhimika 'ne, nha vyono wanyihuwiziza ane no mwitumami wako.

⁷⁷ Wumbonele lusungu ho nikale mumi, hambi lilajilizo lyako, nha yo nyemo yangu'ne.

⁷⁸ Iwedunhumuzi wakozwe cevu, hambi nha wambalalila nghani zo wulambi, ninga ane nozihwesa ze mejizo gako du.

⁷⁹ Nawo wose wono wakogopile, waze kuli'ne, ho wazimanye ze mejizo gako.

⁸⁰ Nane nizityatizye lukulu zo wutonji wako, ho nize ndece kukozwa cevu.

Kulomba wukombozwe

⁸¹ Alu nhondo ane natimba 'gwe go Muwaha Mulungu, nghulindilize wuze wumhonye, no witumbilo wangu wose, nha wuli mu nghani yako du.

⁸² Ne meso gangu nha gakatala, so wulanjilila cono wehuwiza, sunga neza kuwuza nghutya, “Alo ho kokuza nili wusindamice?”

⁸³ Hambi nha nezinga, nawa nha mufuko wa nyhingo mugumilwe mu lyosi, ninga hamba nhavivyo, nghali si ninawusemwa wutonji wako.

⁸⁴ Alu ho nolindila sunga nili lo? Hamba kowalipiciza nili lo wono wakungaza?

⁸⁵ Iwedunhumuzi wahimbila yikombo, ho wangwizize mumo, wawo wo wanhu wono si waliceleleye, lilajilizo lyako,

⁸⁶ Malajilizo gako gose nha mehuwilwa, wanhu wakungaza bwete mbula soko, holeka wunhaze!

⁸⁷ Wali weza wali behi no kunyongomeza, ninga ane, hamba si nobezeza lukulu mejizo gako.

⁸⁸ Wumhonezye mu nghango yo lusungu lwako, ho nigakamisize lukulu malajilizo gako.

Wihuwilo wa mu wulajilize wo Muwaha Mulungu

⁸⁹ Gwe go Muwaha Mulungu, nghani yako yikalaga cibitilila, yikalaga yisikame ku wulanga.

⁹⁰ No wihuwilwa wako wikalaga mu zindelo zose, nagwe wuyisimizye yinze hanhu hayo, nayo hamba si yilawuka.

⁹¹ Ne viwumbwa vyose vili baha, sunga nalu ku soko ye lilajilizo lyako gwegwe, hambi vinhu vyose nha wetumami wako gwegwe.

⁹² Na hono lilajilizo lyako, lyali liwe yo si ndawililo ye nyemo yangu, mhali nakondya kongomela ku soko yo wugaye wangu.

⁹³ Holeka nane hamba si nogalecela lukulu mejizo gako, hambi nha mo kumhelelaga wumi wangu.

⁹⁴ Hambi 'ne nha nili wako, holeka wumhonye, hambi nha hidimbaye muno mu wibata mejizo gako.

⁹⁵ I wabi nawo wakusepa ho wambulaje, ninga ane nghwihwesa ze mejizo gako du.

⁹⁶ Nakondya kuwumanya mudumo wo wukwilanicile, ninga malajilizo gako gasina mudumo.

Kuwenda wulajilize wo Muwaha Mulungu

⁹⁷ Nendile muno lilajilizo lyako! Kanyhi nghulihwesa misi yose!

⁹⁸ Lilajilizo lyako, ane nilityatyaga nhondo zose, nalyo likumhela mahala menji, kuciza i walugu wangu.

⁹⁹ Nane nina wizuce muno, kuciza ne wejizi wangu wose, vyono 'ne nghwihwesa muno ze mejizo gako du.

¹⁰⁰ Nane niwacizize wizuce sunga ne wakombi wose, ku soko vyono nigebate mejizo gako.

¹⁰¹ Nane nghwiyimila muno, ho ndece kutyatya mijendele yo yose mibi, ho sume kuyibata nghani yako du.

¹⁰² Nghali hamba si ninawubedegala yaye, wijize wako, hambi nha yo gwegwe du yo wuli mwijizi wangu.

¹⁰³ Ne mejizo gako nha maswanu muno kuli'ne, gali muzinzi gacizize sunga no wuci.

¹⁰⁴ Na ku soko yo wijize wako, ane nghutuga wizuce, holeka niyisulile mikalile yose mibi.

Wuzelu we lilajilizo lyo Muwaha Mulungu

¹⁰⁵ Nghani yako yo tala yono yikunhonga, no wuzelu wono wukumulicila nzila yangu.

¹⁰⁶ Nane nilahiza no kukangaza mu wilahize wangu, vyono nogakamisa mejizo gako ge ling'ani

¹⁰⁷ Gwe go Muwaha Mulungu, ane nghugazika muno, holeka wumhele wumi nha vyono wehuwiza.

¹⁰⁸ Gwe go Muwaha Mulungu, wubocele wulombe wo wulumbe wangu, kanyhi wunyijize ze ning'aniza yako.

¹⁰⁹ Wikale wangu nha wuli mu mbali nhondo zose, ninga hamba si nghulisemwa lilajilizo lyako yaye.

¹¹⁰ Iwabi wanhejile mitego, ninga ane hamba si nogabedegala yaye mejizo gako.

¹¹¹ I mejizo gako wo wuhazi wangu nhondo zose, heya, kanyhi yo nyemo ye nhumbula yangu.

¹¹² Holeka nane nina wuhile mu nhumbula yangu, wo wutyatya zo wutonji wako cibitilila.

Wudimi wono wuli mu wulajilize wo Muwaha Mulungu

¹¹³ Nane niwasulile wanhu wono si wakwendile, Ninga nilyendile lilajilizo lyako.

¹¹⁴ Agwe yo gwegwe wihundiko wangu ne ngula yangu, nane niyitumbiye nghani yako.

¹¹⁵ Mbucilenyi 'nye nyo wanhu wabi, nane ho nigebate malajilizo go Mulungu wangu.

¹¹⁶ Ale, wumhele vilungo nha vyono wehuwiza, nane ho niwe mumi, wulece kundeceleza nghozwe cevu mu witumbilo wangu.

¹¹⁷ Wunyegamize, nane nopona, nane ho niwe ne cihuliko, kuli zo wutonji wako nhondo zose.

¹¹⁸ Kuwalemaga wose wono wabedegalaga, zo wutonji wako no wungwele wawo, nha wa bwete du.

¹¹⁹ Wukuwawusa wabi wose we'nze nha takataka, holeka ane niwendile wutonji wako.

¹²⁰ Ane nghucicima so wogopa gwegwe, memile woga, ku soko ye ning'aniza yako.

Cihuliko kuli zo wulajilize wo Muwaha Mulungu

¹²¹ Nituma nghani swanu kanyhi ze ling'ani, holeka wulece kundeka mu miwoko ye walugu wangu.

¹²² Wunyihuwizaje vyono konhaza, ane no mwitumami wako, i wewoni walece kunyiwonela.

¹²³ Meso gangu nha gakatala, so wulanjilila mhonelo yako, no wufisilize we nghani yako ye ling'ani.

¹²⁴ Wunhendele mu nghango yo lusungu lwako, ane no mwitumami wako, wunyijize zo wutonji wako.

¹²⁵ Ane no mwitumami wako, wumhele wizuce ho manye mejizo gako.

¹²⁶ I cipango cafika go Muwaha Mulungu witume, hambi wanhu nha wakuwubena wulajilize wako.

¹²⁷ Holeka, nigendile muno malajilizo gako, kuciza zahabu, heya, zahabu yono yilenguywe.

¹²⁸ Holeka nghugatyatya i mejizo gako gose, kanyhi si niyendile nzila yo wajilile.

Wusaka kuwuhulika wulajilize wo Muwaha Mulungu

¹²⁹ Mejizo gako ga wizine, holeka nigebate ne nhumbula yangu yose.

¹³⁰ Wulolose we mejizo gako, wuletaga wuzelu, kanyhi wuwapelaga wumanye wono si wamanyile cinji.

¹³¹ Ane nghweheleka akuno nyahame no mulomo wangu, hambi nha nina nyhilu ye malajilizo gako.

¹³² Wunanje, wumbonele lusungu, nha vyono kuwatendelaga wono wakwendile.

¹³³ Wusikamye zi nghanzo zangu nha vyono wehuwiza, kanyhi wulece kundeceleza wubi wuteme muli'ne.

¹³⁴ Wumhonye mu wutendelwa vibi, ne wanhu nane ho nigebate mejizo gako.

¹³⁵ Wumulicile zo wuwe wako, wunyijize zo wutonji wako.

¹³⁶ Meso gangu gakuhuluma mahozi nhe kolongo, ku soko vyono wanhu si wakuwukamisa wulajilize wako.

Ling'ani yo wulajilize wo Muwaha Mulungu

¹³⁷ Gwe Muwaha Mulungu, wuli mwihuwilwa, ne zining'aniza zako zo ze mbeka.

¹³⁸ No wulajilize wako, wono wawuwika wo we mbeka ne ling'ani.

¹³⁹ Holeka nghukolwa likuwo, ku soko walugu wangu, si wakucelelela zo wulajilize wako.

¹⁴⁰ No wihuwizo wako wo we mbeka, nane no mwitumami wako niwendile.

¹⁴¹ Ninga 'ne vyono nili mudodo, holeka mbedegaywe, hamba nhavivyo, ane si nghusemwa ze mejizo gako yaye.

¹⁴² Ling'ani yako yo ye ling'ani cibitilila, no wulajilize wako wo we mbeka.

¹⁴³ Wugazice no wukalale vyanyagana, ninga hamba nhavivyo, malajilizo gako gamhelaga wusangalale.

¹⁴⁴ No wuhomelezi wako, wo we ling'ani nhondo zose, wumhele wizuce, nane ho nowumipa.

Kulomba wukombozwe

¹⁴⁵ Gwe go Muwaha Mulungu, nghukulilila kwe nhumbula yangu yose. Wumhitule, nane nokwibata ze mejizo gako.

¹⁴⁶ Nghukunena wumhonye, nane ho niwutyatye wutonji wako.

¹⁴⁷ Mhinjilaga hakali mitondo muno muno, nghulomba wutazi wako, nokwitumbilila lukulu zinghani zako.

¹⁴⁸ Nikalaga meso cilo cose, ho nihwese ze mejizo gako.

¹⁴⁹ Gwe go Muwaha Mulungu, wuhulice ko wendo wako, wundajile zo lusungu lwako, wumhonye.

¹⁵⁰ I wanhu wabi wono wonhajila mu magazo, nha wasejelela, i wanhu wono si webataga zo wulajilize wako.

¹⁵¹ Ninga agwe go Muwaha Mulungu, wuli behi nane, ne malajilizo gako gose, go ge mbeka.

¹⁵² Nane nakondya kwiyijiza, ku wulawa katali ze mejizo gako, nagwe yo gwegwe du, mono wagawika gekale cibitilila.

Kulomba wutazi

¹⁵³ Wulanje ze magazo gangu, wumhonye, hambi ne nha si semigwe zo wulajilize wako.

¹⁵⁴ Wunhetele kanyhi wunghomboze, wumhonye nha vyono wehuwiza.

¹⁵⁵ Iwabi hamba si woponywa yaye, hambi nha si wakuzicelelela zo wutonji wako.

¹⁵⁶ Lusungu lwako nha luwaha 'gwe, go Muwaha Mulungu, holeka wundajile zo lusungu lwako wumhonye.

¹⁵⁷ Hambi i walugu wangu, na wono wakumhela magazo, nha wenji, ninga ane si nolecela lukulu, kutyatya zo wulajilize wako.

¹⁵⁸ Na lono nghuwawona wawo i wagaluci, mutima wangu hamba si wukwendezwa nawo, hambi nha si wakugebata malajilizo gako.

¹⁵⁹ Gwe go Muwaha Mulungu, lanje ta, vyono nigendile mejizo gako! Holeka wumhonye mu nghango, yo lusungu lwako lo wendo.

¹⁶⁰ Zinghani zako zose yo mbeka, ne zining'aniza zako ze ling'ani, zose za cibitilila.

Wusiwanulilwa ku wulajilize wo Muwaha Mulungu

¹⁶¹ I wawaha nawo wamhela magazo du mbula soko, ninga ane niwogopile wulajilize wako, kwe nhumbula yangu yose.

¹⁶² Nane sangalaye so wihuwizo wako, nihwana no munhu mono yawene, cinhu co wuguzi wukamu muno muno.

¹⁶³ Ane si nizendile hamba hadodo, zinghani zo wulambi-lambi, langa'ne niwendile wulajilize wako du.

¹⁶⁴ Nane nghulumbaga nghanghulo mupunghati, mwi'zuwa limonga, ku soko ye zining'aniza zako ze ling'ani.

¹⁶⁵ Wose wono wawendile wulajilize wako, wena mulamu wono wukwilaniciye muno muno, na hasina cinji kanyhi cono cowagwisa.

¹⁶⁶ Gwe go Muwaha Mulungu, nghulindiye wumhonye, nane nghwituma nha vyono genha malajilizo gako.

¹⁶⁷ Ane nigebate mejizo gako, kanyhi nigendile kwe nhumbula yangu yose.

¹⁶⁸ Nigakamise malajilizo gako, hamonga ne mejizo gako, nagwe nha wuziwene calinze zose zono nitumaga.

Kulomba wutazi

¹⁶⁹ Gwe go Muwaha Mulungu, cililo cangu cikuzize! Wumhele wizuce mu nghango yo wihuwizo wako.

¹⁷⁰ Wulombe wangu wukuzize, wumhonye nha vyono wehuwiza.

¹⁷¹ Nane nowa kukulumba nhondo zose, hambi nha wukunyijiza zo wutonji wako.

¹⁷² Nowa kwimba ze nghani yako, hambi malajilizo gako gose, nha go ge ling'ani.

¹⁷³ Holeka weze wiwikanize, nhondo zose kunhaza, hambi nha nigebate mejizo gako.

¹⁷⁴ Nanjiliye muno wumhonye 'gwe go Muwaha Mulungu, hambi wulajilize wako, nha wo wusangalale wangu.

¹⁷⁵ Mhelaje wuwumipe, nane ho nghulumbe, kanyhi ne zining'aniza zako zinhaze.

¹⁷⁶ Nghuyumba-yumba, nha ngholo yono yajiliye, holeka wuze wunondole ane no mwitumami wako, hambi nha si nigasemwaga malajilizo gako.