Zabuli 105 - Luganuzi Luswanu Kuli Wanhu Wose 2002

Mulungu ne wanhu wakwe

¹ Mulumbenyi Muwaha Mulungu, mwanze zo wuwaha wakwe, mugalonjele makungugo zono yetumile!

² Mumusangalalile, mumwimbile Mulungu zo lukumyo, musimulile ze mezino gose gono yetuma!

³ Mwilumbilaje litagwa lyakwe lyono lyelile, nawo wono wamogopilo Muwaha Mulungu, yiwanojeye wasangalale.

⁴ Mubitilenyi Muwaha Mulungu, hambi nha yo yali vilungo. Mulondolenyi mweneco du vilo vyose.

⁵ Nanye mo lulelo lwa Abulahamu mwitumami wakwe, sunga nanye mo lulelo lwa Yakobo muhagulwa wakwe,

⁶ mukumbucile ze metumo gakwe mawaha gono yetuma, sunga ne mapoto hamonga no wuling'anizi vyono yawulavya.

⁷ Muwaha Mulungu, yo Mulungu wetu, ne malajilizo gakwe gali vilungo mono'nze mose.

⁸ Nayo kacikamisaga cilagane cakwe cibitilila, kanyhi kawufisilizaga wihuwizo wakwe, kuli zindelo zose.

⁹ Mwene kacikamisaga cilagane, cono yalagana na Abulahamu, sunga no wihuwizo wono yamwihuwiziza Isaka.

¹⁰ Yamukangaziza Yakobo wihuwizo wakwe, kanyhi yakamwilahila vyono cilagane cico, cokwikala cibitilila.

¹¹ Mulungu yakatya, “Nomupelenyi yisi ya Kanani, nayo yowa yisi yenyu nyenye nyo weneco.”

¹² Wanhu wo Mulungu, wali wacefu du, kanyhi wali wajenzi mu yisi ya Kanani.

¹³ Wapilima-pilima ku wulawa likungugo ali na ali, na kanyhi ku wulawa yisi ayi na ayi.

¹⁴ Ninga hamba wawe wapilima-pilima nhavivyo, Mulungu si yawaleka watamiswe, na cikali co cose yaye, Mulungu yawapela suguzi watemi ku soko yawo, yakutya,

¹⁵ “Mulecele lukulu kuwapamiza, wawo wetumami wangu wahagulwa, hamba mulece kuwatamisa na cikali co cose, wawo wawizi wangu!”

¹⁶ Mulungu yakayiletela nzala yisi yawo, yakayihodanga ndigwa yawo yose.

¹⁷ Ninga hamba nhavivyo, yakatuma munhu ku mwande yawo, mono yacemwaga Yusufu, mono yaguzwa ku wuwanda.

¹⁸ Wakamuwopa Yusufu ne manyolo mu migulu yakwe, na mu singo, wakamuvwika lubano lwa cuma,

¹⁹ sunga cali ceza kufisilizwa cono yaciwila. Ne nghani yo Muwaha Mulungu, yikamuhomelela vyono yo nhavivyo.

²⁰ Nayo mutemi we Misili, yakalajiliza vyono Yusufu yawopolelwe, sunga muwaha we wanhu, yakamukombola.

²¹ Yakawa kumunoza yawe, muwaha mu wutemi wakwe wose, kanyhi yawe yo mulanjilizi, muwaha we sawo yakwe yose,

²² ho yawatonje wetumami wakwe, nha vyono yendile mweneco, kanyhi yawejize wanyamhala wakwe ze mahala.

²³ Hanyuma yayo, i wanhu wa Isilayeli nawo, ho wakaza mu yisi ya Misili, Yakobo yakawa mujenzi mu yisi yiyo ya Misili.

²⁴ Nayo Muwaha Mulungu, yakawanoza wanhu wakwe, welele muno muno kanyhi yakawapela wuwe, wo kuwa wali vilungo, muno kuciza vilungo vye walugu wawo.

²⁵ Yakazipitula zinhumbula ze Wamisili, ho wawasule wanhu wakwe, wakawatendela ko wungwele wanhu wakwe.

²⁶ Hanyuma yayo, yakamutuma Musa mwitumami wakwe, yakamutuma na Haluni mono yamuhagula mweneco.

²⁷ Wakanoza vitanjilo vyo Mulungu hali Wamisili, sunga ne mapoto mu yisi yiyo ya Misili.

²⁸ Nayo Mulungu yakaleta citi mu yisi yose, ninga Wamisili wakabeza ze malajilizo gakwe.

²⁹ Yakagahundusa malenga gawo gakawa sakami, yakazikopola zisomba zawo zose.

³⁰ Yisi yawo yikamema mabula gose, sunga na mukaya yo mutemi namo gakamema nhavivyo.

³¹ Mulungu yakalonga, gakawa kuza mawumbi menji muno ga mahazi, hamonga ne makutupa, mu yisi yawo yose.

³² Hanhu ha mvula, Mulungu yakawatonyezeza mvula ye mabwe, hamonga ne mamuli gono gayimulicila yisi yawo yose.

³³ Yakayihodanga mizabibu yawo hamonga ne mikuyu yawo, yakayibenanga sunga ne mibici yawo yose.

³⁴ Mulungu yakalonga, nzije zikaza, hamonga ne mang'ungu menji muno gono gasina yiwalo,

³⁵ Nago gakawa kulya vilimwa vyawo vyose, vya mu yisi yawo, gakalya sunga ne mikalo yawo yose.

³⁶ Mulungu, yakawawulaga i wana we cilume wose, i walelwa walongozi wose wa mu wana we Wamisili.

³⁷ Hanyuma yayo, yakawa kuwawusa wanhu wa Isilayeli, mu yisi ya Misili, nawo wakawuka wena ne zipesa, hamonga ne zizahabu, kanyhi wose wawuka wali vilungo du, hali hasina hamba yumonga mono yali yatimbile.

³⁸ Nawo Wamisili wakasangalala muno so wuwuce wawo, hambi nha wali webatwa no woga ku soko yawo.

³⁹ Mulungu yakatandika livunde, hacanyha ye wanhu wakwe, no moto wo kuwamulicila ku cilo.

⁴⁰ Wene wakamulomba Mulungu, nayo Mulungu yakawaletela nghwale, kanyhi yakawegusya ne ndigwa ya ku wulanga.

⁴¹ Yakalidigula litalawe, ne malenga gakapulinhika, nago gakahuluma nhe kolongo mu nyika.

⁴² Mulungu yakakumbucila, cilagane cakwe cono celile, cono yalagana no mwitumami wakwe Abulahamu.

⁴³ Holeka yakawawusa wanhu wakwe, mu yisi ya Misili, nawo i wahagulwa wakwe, wakemba no kusangalala.

⁴⁴ Mulungu yakawapela, ne zisi za we makungugo ganji, yakawapela ne migunda ye wanyawusi,

⁴⁵ wanhu wakwe ho wagebate malajilizo gakwe, watyatye ze mejizo gakwe. Yalumbwe Muwaha Mulungu! Haleluya!