Zabuli 1 - Luganuzi Luswanu Kuli Wanhu Wose 2002

CITABU CILONGOZI (Zabuli 1–41 ) Nyemo ye mbeka

¹ Yali ciba munhu mono si yakuzityatya, zinghani ze wanhu wabi, hamba kutyatya mikalile, ye wanhu wahodanji, hamba kwilumbaniza ne wanhu wono, wakumubedegala Mulungu.

² Langa yakuwonela nyemo mu wogopa wulajilize wo Muwaha Mulungu, no kuwihwesa wuwo, misi ne cilo.

³ U munhu we liwala lilyo, yehwanile mubici wono muhadikwe behi no muvwilo we malenga, wono wulelelaga mana mu madaha gayo, ne mahamha gayo hamba si ganyalaga yaye. Nayo kamoteswaga muli zose zono ketumaga.

⁴ Ninga wanhu wabi vyo si wenha nha vivyo hamba hadodo, wene wehwanile mawaje gono gakupemheluswa ne mbeho.

⁵ Wanhu wabi, Mulungu kowaling'aniza, kanyhi wotemanulwa ne mhuga ya we ling'ani.

⁶ Hambi Muwaha Mulungu, nha kawatongaga we ling'ani, ninga iwanhu wabi, imikalile yawo yowongomeza.