Yoshuwa 1 - Luganuzi Luswanu Kuli Wanhu Wose 2002

Mulungu yakumulajiliza Yoshuwa yayiteme Kanani

¹ Ale, lono Musa u mwitumami wo Muwaha Mulungu yaza kuwa yafwiza, u Muwaha Mulungu yakamulonjela Yoshuwa u mwana wa Nuni u mutazi wa Musa.

² Yakamutya, “U mwitumami wangu Musa nha yafwiza. Alu wiwikanizaje gwegwe hamonga ne wanhu Waisilayeli, ho mulowoce likolongo lya Yoludani, mwinjile mu yisi yono nghuwapela i Waisilayeli.

³ Nha vyono namulonjela Musa. Nakondya kumupenyi, gwegwe ne wanhu wangu yisi yiyo yose, sunga ne hanhu hose hono mowa kuyikanyaga ne zinzayo zenyu.

⁴ Ne mipaka yenyu, yowa yilawiliye ku nyika ya ku lubavu lwa kutakama, sunga mu matunda ga ku Lebanoni, go lubavu lwa kusumuka. Kanyhi ku wulawilila kwi'kolongo liwaha lya Efulata lya ku mhelo ye cilima, no kukolela mu yisi yose ye Wahiti, sunga ko kwi'lenga lya Meditelaneya lye mhelo ya kumwezi, baho u mupaka wenyu ho wokanga.

⁵ Kanyhi Yoshuwa, wumanye vyono kowa kusina hamba yunji wo wose mono kokusuma, sunga ko ku ndumo yo wikale wako. Nowa hamonga nagwe nha vyono nali nili hamonga na Musa. Nowa hamonga nagwe mu vilo vyose, hamba si nokuleka yaye.

⁶ Holeka weze ne vilungo ne nhumbula yo wutung'ati, hambi nha yo gwegwe mono kowalongoza wanhu wawa, sunga wakayiteme yisi yiyo yono nelahiza vyono nowapela i walezi wawo.

⁷ Holeka weze ne vilungo, no wuhidimbazi muno. Kanyhi wulanjilile, witume zose zo wulajilize, nha vyono Musa u mwitumami wangu yakulajiliza. Hamba wulece kuyibedegala nghani yoyose ya mwilajilizo lilyo, holeka nagwe kotuga wumoteswe ko kose kono kowa kubita.

⁸ Wulanjilile, citabu cici co wulajilize ceze kusomwa nhondo zose mu wuhembi wenyu. Kanyhi weze kwilanjiza za mumo ku misi na ku cilo, no kwituma zose nha vyono zandicigwe mumo. Nagwe ho komoteswa muno, mu zinzila zako zose.

⁹ Wukumbucile vyono, yo nene nakulajiliza wuwe ne vilungo ne nhumbula yo wutung'ati. Holeka wulece kogopa hamba kukatala, hambi ane no Muwaha, Mulungu wako, nha nowa hamonga nagwe ko kose kono kowa kubita.”

Yoshuwa yakuwapela wanhu wulajilize, ho walowoce likolongo lya Yoludani

¹⁰ Hobaho Yoshuwa yakawalajiliza i walongola we wanhu yakawatya,

¹¹ wayikolele nghambi yose, wawalonjele wanhu wose wawe kutya, “Ale mwiwikanizizaje zindigwa, ku soko mu vilo vidatu vyono vikutyatya, mowa no muhinzo wo kulilowoka likolongo lya Yoludani, ho mwinjile no kuyitema yisi yono Muwaha Mulungu, u Mulungu wenyu, yakumupelenyi.”

¹² Hobaho Yoshuwa nayo yakanza kuwalonjela wose wa mu milango ya Lubeni na wa Gadi, na we nusu ya wo mulango wa Manase, yakawatya,

¹³ “Mukumbucile, vyono Musa u mwitumami wo Muwaha Mulungu yamulonjelenyi, nha vyono, Muwaha Mulungu, u Mulungu wenyu, komupenyi yisi yiyino yo lubavu lwa kucilima ya Yoludani, yiwe wo wikalo wenyu.

¹⁴ I wagolece zenyu ne wana wenyu, we cilume na we cicekulu, hamonga ne mitugo zenyu, wokwikala baha, langa i wasilikale wenyu wono wewopile ne vitwalo vyo wulugu, wawo wo wolowoka no kujendelela ku mwande ye wandugu zawo Waisilayeli, ho wawataze.

¹⁵ Sunga kolo wakuyitema yisi yo lubavu lwa kumwezi ye likolongo lya Yoludani, yono Muwaha Mulungu wenyu yakondya kumupenyi. Sunga kolo yakondya kuwapela mulamu we zimhuga zose ze Waisilayeli, nanye ho mowuya mwikale mu yisi yenyu ya ku nhumbi ye cilima ya Yoludani, yono Musa u mwitumami wo Muwaha Mulungu yakamupenyi.”

¹⁶ Nawo wakamupitula Yoshuwa wakamutya, “Cokwituma zose nha vyono wucilonjeye citume, kanyhi cobita ko kose kono gwegwe kocitegula.

¹⁷ Kanyhi cowa kukuhulika du nha vyono camuhulikaga Musa muli zose nhondo zose. Ale, u Muwaha Mulungu u Mulungu wako, yaweze hamonga nagwe nha vyono yali yali hamonga na Musa.

¹⁸ No munhu wo wose mono kobena wulajilize wako, na mono sikovumila malajilizo gako, yuyo yimunojeye yawulagwe. Weze ne vilungo du, ne nhumbula yo wutung'ati.”