Yona 1 - Luganuzi Luswanu Kuli Wanhu Wose 2002

Yona yakujela kumutiza Muwaha Mulungu

¹ Lizuwa linji, nghani yo Muwaha Mulungu, yikamuziza Yona mwana wa Amitayi.

² Yikutya, “Wubite ku Ninawi, kwi'kaya alilya liwaha, wukalilonjele nha vyono, nakondya kuwumanya u wubi we wanhu wayo vyono winha.”

³ Ninga Yona yakatuluka, ho yamutize Muwaha Mulungu. Yakabita ko ku Yopa, na kuko yakagana ngalawa yono yabitaga ku Talishishi. Yakalipa mu nghango ye nawuli yo kubitila, ho yabitane nawo ku Talishishi, i hanhu hono kosuma kuwa kutali no Muwaha Mulungu.

⁴ Ninga Muwaha Mulungu yakaleta mbeho yo mukukunzo mwi'lenga, no mukukunzo wukawa muwaha muno, sunga ne ngalawa yikasaka no kupanduka.

⁵ Hobaho wanye ngalawa nawo wakogopa, na wose wakanza kulila munhu na lwakwe kuli mulungu wakwe mweneco, ho watuje wutazi. Wakawa kuyigumila mwi'lenga sawo yono wali wena nayo, ho wayipelumhye ngalawa, watuje wutazi wo kupona mu mbali yono yali yili ha mwande yawo. Na mwi'daha lilyo, mwene Yona yali yagonile nhongo du mu cumba ca kusi ye ngalawa.

⁶ Nayo muwaha we ngalawa yakamwagana kuko, yakamutya, “Alu 'gwe Yona, nhawule wugonile? Winukaje wumulombe Mulungu wako yacitaze, lunji kociwonela lusungu cilece kwajilila.”

⁷ Wono wali wali mu ngalawa, wakalongana weneco wose wakutya, “Muze cipugule, cimumanye mono yakucambuza cinjile mu mbali yiyi.” Wali weza pugula, mhugu yikamugwila Yona.

⁸ Baho wakamutya, “Gwe Yona, wucilonjelaje ta! Alu nani mono cimuhosaje mu nghani yiyi? Na kanyhi agwe wukunozaci bahano? Na kanyhi wukulawilila 'sici? Ne yisi yako yisici? Na wuli munhu we nghungugoci?”

⁹ Nayo Yona yakawatya, “Ane nili Muhebelaniya. Ane nimuhembaga Muwaha Mulungu, u Mulungu wa ku wulanga, mono yanoza yisi nghavu ne lilenga.”

¹⁰ Yona yakawalonjela vyono yakutiza hali Muwaha Mulungu. Ne wanhu wose wono wali wali mu ngalawa wakogopa muno, wakamutya, “Alu yo nghanici waco yiyi yono witumile?”

¹¹ Ne mawingo gakacila muno kuyumba cipango cose ku soko ye libeho, nawo wakamuwuza wakatya, “Alu cikutendele wule ho lilenga litule?”

¹² Yona yakawatya, “Mungumilaje mwi'lenga, nalyo lilenga lyotula. Hambi nha manyile vyono lisutya lyangu nene, lyo likuleka mukwinjila mu mbali yiyi yo wuyumvywe ne mbeho yiyi.”

¹³ Ninga wene mu hanhu ho kumugumila Yona mwi'lenga, wakajela kuyikwejela ngalawa ku mhwani, ninga wakafutigwa. Hambi lilenga nha lyali lyacila kuwayumvya, hamba siwatuga yaye ha wutizizo.

¹⁴ Baho wakamulomba Muwaha Mulungu wakatya, “Gwe Muwaha Mulungu cikukulomba, wulece kuciwulaga ku soko yo munhu ayu Yona, mono ceza kumuwulaga! Hambi 'gwe Muwaha Mulungu nha kunozaga nha vyono gwegwe wendile, na vyose nha vyako.”

¹⁵ Hobaho wakamusola Yona, wakamugumila mwi'lenga, nalyo lilenga hobaho likawa kutula.

¹⁶ Na ku soko ya zizo, wanhu wono wali wali mu ngalawa, wakamogopa u Muwaha Mulungu muno muno. Wakamulavizya Muwaha Mulungu likumbiko, wakawa kuwika ne cipingo co kumwitumamila.

¹⁷ Nayo Muwaha Mulungu yakalilajiliza lisomba liwaha likamumela Yona, na Yona yakekala munda ye lisomba vilo vidatu misi ne cilo.