Yohana 1 - Luganuzi Luswanu Kuli Wanhu Wose 2002

I nghani yo wumi

¹ Ha mwamulizo i yinze lono yali yikali nawumbwa, I Nghani yali yali baho. Nayo I Nghani yali yali hamonga no Mulungu, i Nghani nayo yali Mulungu.

² Yuyo yali yali hamonga no Mulungu ku wulawa mwamulizo.

³ Ivinhu vyose vyawumbilwa muli mwene, na hasina ciwumbwa cinji co cose cono cawumbwa, hono hasina mwene.

⁴ U Mwene yali yo mwamulizo wo wumi; no wumi wuwo wali wuzelu we wanhu wose.

⁵ No wuzelu wuwo wumulikaga mu wutitu, hamba wutitu si wuwusumaga yaye.

⁶ U Mulungu yakamutuma munhu litagwa lyakwe Yohana.

⁷ Yuyo yaza kuwalonjela wanhu zo wuzelu wuwo. Na so wuhomelezi wakwe, iwanhu wose ho wehuwile.

⁸ U mwene Yohana, yo si yali wuwo wuzelu weneco, langa yaza du, ho yawalonjele wanhu zo wuzelu wuwo.

⁹ Awu wo wuzelu we mbeka, u wuzelu wono wukuza mono yinze, no kuwamulicila wanhu wose.

¹⁰ Ale, i Nghani yali mono yinze, ne yinze yawumbilwa muli mwene, ninga i yinze si yamutanga yaye.

¹¹ Yakaza mu yisi yakwe mweneco, ninga i wanhu wakwe si wamubocela yaye.

¹² Ninga wose wono wamubocela no kumwihuwila, yawapela i vilungo vyo kunozwa kuwa wana wo Mulungu.

¹³ Wono si waleleywe mu vilungo vye cimunhu munhu, hamba mu vilungo vyo munhu, hamba mu wuhile wo munhu, langa u Mulungu mweneco yo Sogo yawo.

¹⁴ I Nghani nayo yakawa munhu, yakekala mwetu. Nase cikayiwona i nhojo yakwe, i nhojo yakwe mwene mono mwana we ciwene wa Baba; yamemile lihewa ne mbeka.

¹⁵ Yohana yakawalonjela wanhu zinghani zakwe, yakawalonjela kwe 'zi yiwaha yakutya, “Ayu yo mwene mono namulonga, lono natya, Yakuza munhu munyuma yangu, mono yo muwaha yanyhizize nene, ku soko mwene yali yali baho na lono ane nali nghali nalelwa.”

¹⁶ Hambi mu wukwilanicile wakwe, nase mo cikubocelela lihewa lyakwe cibitilila.

¹⁷ Hambi u Mulungu, nha yawulavya Wulajilize mu nzila ya Musa, ninga i lihewa ne mbeka, vyaziza mu nzila ya Yesu Kilisito.

¹⁸ Hasina munhu mono yamuwona Mulungu hanji ho hose, u Mwana we ciwene mono wali sawa no Mulungu, mono vilunzize no Sogwe, yuyu yo yacimanyiza zo Mulungu.

U wuhomelezi wa Yohana u Mubaputizi

¹⁹ Awu wo wuhomelezi wa Yohana wono yawulonga, lono wawaha we Wayahudi wa ku Yelusalemi, wamutumila wakohani ne Walawi wamuwuze vyono mwene yo nani.

²⁰ Nayo Yohana si yalema kupitula i liwuzo lilyo, ninga yakalonga calinze, yakatya, “Ane yo si nene Kilisito.”

²¹ Nawo wakamuwuza wakatya, “Alu gwegwe nani? Yo gwegwe Eliya lo?” Yohana yakatya, “Ng'o yo si nene.” Wakamuwuza, “Yo gwegwe muwizi yulya?” Yohana yakawapitula yakatya, “Ng'o yo si nene.”

²² Nawo wakamuwuza “Alu gwegwe nani? Ukiyitya gwegwe nani? Ucilonjele ho ciwategulile lipitulo wono wacitumile.”

²³ Yohana yakatya, “Ane yo nene, mono muwizi Isaya yalonga. ‘Ane nili yizi lyono likuhulikwa ku nyika, Gololenyi nzila yo Muwaha.’ ”

²⁴ Ne wanhu wawo wali watumigwe ne Wafalisayo.

²⁵ Nawo wakamuwuza Yohana wakamutya, “Alu agwe hono si wuli Kilisito, hamba Eliya, hamba muwizi yulya, nhawule wukubaputiza?”

²⁶ Yohana yakawapitula yakawatya, “Ane nghubaputiza kwe malenga, ninga ho yuli yunji yemile muli nyenye mono mukali namumanya.

²⁷ Yo yuyo mono yakuza munyuma yangu, mono ane sinojeye hamba kuyiwopola imikowa ye malatu gakwe.”

²⁸ Zizi zetumwa kuko ku Betaniya, ku nhumbi nzagwe ye likolongo lya Yoludani, kono Yohana yabaputizaga.

U Mwana Ngholo wo Mulungu

²⁹ I mitondo yaco, Yohana yakamuwona Yesu yakumuziza, yakatya, “Mulanje, ayu Mwana Ngholo wo Mulungu, mono yakuwusa, wubi we yinze!

³⁰ Yo mwene mono namulonga, mono natya, ‘Munyuma yangu yakuza munhu yunji muwaha mono yanyhizize nene, hambi nha yali yali baho lono na ane nali nghali nalelwa!’

³¹ Na nene si namumanya, ninga niza mbaputize kwe malenga, wanhu wa Isilayeli ho wasume kumumanya.”

³² Awu wo wuhomelezi wono Yohana yawulavya, “Nawona Muhe yakutima nha nziwa, yakulawa ku wulanga, yakamwikalila mwene.

³³ Nane sinamumanya: langa u Mulungu mono yanhuma nghawabaputize wanhu kwe malenga, yali yanonjela yakutya, ‘U munhu yuyo mono komuwona u Muhe yakumutimila, yakumwikalila, yuyo yo yakubaputiza mu Muhe Mono Yelile.’

³⁴ Nane nghondya kuwona, nane nghumulonjelenyi vyono yuyu yo Mwana wo Mulungu.”

I Wejizwa walongozi wa Yesu

³⁵ I mitondo yaco kanyhi, Yohana yali yemile baho, hamonga na wejete wayagwe ne wejizwa wakwe.

³⁶ Yaza kumuwona Yesu yakukola, yakatya, “Mulanje ayu Mwana Ngholo wo Mulungu!”

³⁷ I wejizwa walya vyono wejete, wakamuhulika Yohana yakulonga zizo, wakamutyatya Yesu.

³⁸ Yesu yakapituka, yakawawona wawo wejizwa wakumutyatya, yakawatya, “Alo mukulondola cici?” Nawo wakamutya, “Labi (nhunizo yayo Mwijizi) kwikalaga hayi?”

³⁹ Yesu yakawatya, “Muze nanye mowona.” Iwejizwa wawo wakamutyatya, wakahawona i hanhu hono yekalaga. Wakaswezana nayo lizuwa lilyo, nayo yali nha saa kumi cinyamihe.

⁴⁰ Andeleya, u mwanakwawe wa Simoni Petelo, yo yali muyagwe na wawalya iwejizwa wejete, wono wamuhulika Yohana vyono yakulonga, wakamutyatya Yesu.

⁴¹ Andeleya yakamula kumulondola u muwahawe Simoni, yakamutya, “Cimuwona Mesiya” (nhunizo yayo Kilisito.)

⁴² Hanyuma yakamutegula Simoni kuli Yesu. Nayo Yesu yakamulanga Simoni, yakatya, “Yo gwegwe Simoni u mwana wa Yona, alu kocemwa Kefa.” (Cigiliki wo wutya Petelo, hamba, “Yibwe”.)

Filipo na Nataneli wakucemwa

⁴³ I mitondo yaco, Yesu yakasaka kubita ku Galilaya, na kuko yakamwagana Filipo, Yesu yakamutya, “Wunhyatye.”

⁴⁴ Nayo Filipo yali munya Betesayida ku kaya ya wa Andeleya na Petelo.

⁴⁵ Nayo Filipo yakamwagana Nataneli, yakamutya, “Cimuwona ayulya mono Musa yandika i zakwe, mu citabu co Wulajilize, na kanyhi mono wawizi nawo wandika i zakwe, Yesu u mwana wa Yusufu, mulawa ku Nazaleti.”

⁴⁶ Nataneli yakamutya Filipo, “Hambi ku Nazaleti nako kosuma kulawa cinhu ciswanu?” Filipo yakamutya, “Wuze wulanje.”

⁴⁷ Yesu yakamuwona Nataneli yakuza kuli mwene, yakalonga zo mwene, “Mulanje! Ayo yo Mwiisilayeli we mbeka, mono yawusina wukonji wo wose muli mwene.”

⁴⁸ Nayo Nataneli yakamuwuza, yakatya, “Alo kumanya wule?” Yesu yakapitula yakamutya, “Lono wali wikaye he 'sina lyo mukuyu, na lono wali wukali nacemwa na Filipo, ane nali nakondya kukuwona.”

⁴⁹ Hobaho Nataneli yakamutya, “Mwijizi, yo gwegwe Mwana wo Mulungu, yo gwegwe Mutemi wa Isilayeli.”

⁵⁰ Yesu yapitula yakamutya, “Alo wukwihuwila vyono nghulonjeye, nakuwona he 'sina lyo mukuyu? Kowona mawaha gono gacizize gaga.”

⁵¹ Yesu yakajendelela kulonga, “Mbeka nghumulonjelenyi, molowona u wulanga wukudiguka, ne wamalayika wo Mulungu wakubita kucanyha no kutima, muli Mwana wo Munhu.”