Yelemiya 9 - Luganuzi Luswanu Kuli Wanhu Wose 2002

¹ Na mbeka, nali nyende u mutwe wangu wanda wuwe yisima lya malenga, ne meso gangu galavye mivwilo ya mahozi, ho sume kulila misi ne cilo, ku soko ye wanhu wangu wono wakondya kuwulagwa.

² Na mbeka, nali nyende nhuje hanhu ho kwikala ku nyika, hono nosuma kuwa kutali ne wanhu wangu. Hambi wene, wose nha si wehuwilwa, lipuga lye wagaluci.

³ Wene wewikanize kulonga zo wulambi du nhondo zose, wanhu wono wetujila vilungo vyo kuyitema yisi mu nzila zo wulambi. U Muwaha Mulungu yakutya nhavi, “I wanhu wangu nha wetuma wubi wityatiliye, hamba si wakuwa kumanya 'ne, vyono yo nene Mulungu wawo.”

⁴ Holeka musuguce, mweze kwiyidima munhu no mwiyendi muyagwe, no munhu wo wose, yalecele lukulu kumwitumbila u nduguye, hambi i wandugu za munhu, nha wowa walambi wose, hambi nha wowa wasonjezi, wakuwasonjeza wayawo.

⁵ Na wose wowa walambi, wakuwajiliza wayawo. Ne zinimi zawo, wazizoweleze kulamba du nhondo zose, hamba si wasumaga no kuwuleka wubi wawo.

⁶ Wajendelelaga du kwituma zo wubi awu na awo, ne metumo gawo go wulambi, nago vyo getyatiliye du. Nayo u Muwaha Mulungu yakutya, vyono i wanhu wakwe wakondya kumulema.

⁷ Ku soko ya zizo, holeka nayo u Muwaha Mulungu we mihanga yakutya nhavi, “Noweza wanhu wangu nha shaba, niwajele. Hambi i wanhu wangu nha wetuma zinghani zimbi, alu ho niwanoze nhawule?

⁸ Zinimi zawo nha zihwanile ne zisonga zono zina sumu, wekalaga wakulonga zo wulambi du nhondo zose. Nawo wose, welonjelaga nghani zo wukoci munhu na muyagwe, ninga mu nhumbula yakwe ho yakumusepa yamutamise.

⁹ Alu'ne ho ndece kuwalipiciza so makani gago hongo? Hamba nolecelaci kwilipiciza ne likungugo lyono linha nhavivi? Vyo nghutya ane no Muwaha Mulungu.”

¹⁰ Nane Yelemiya nghatya, “Ale, nane nogalilila matunda, no kugalavya mahozi gangu ku soko yo wudimilo. Hambi wudimilo wose nha wanyala hasina hamba yunji kanyhi mono yakukolela mumo. Ne mazi ge zimitugo, gapela no kuhulikwa mumo. Sunga ne malimu gose hamonga ne zindeje, vyose vyakondya kuwuka mumo.”

¹¹ U Muwaha Mulungu yakutya, “Nane noyinoza Yelusalemi yiwe malundo ge matongo, hawe hanhu hono macewe gowa kwikala, nago makaya ga Yuda, gowa nyika, hawe hanhu hono yunji si kosuma kwikala.”

¹² Ninga nane Yelemiya, nghamuwuza nghatya, “Alu Muwaha Mulungu, i nhunizo ye yisi yiyi, holeka yilekwe yinyale yiwe nha nyika cicici, sunga hamba no munhu wo wose yalece kukolela mu ciligati yayo? Alo we mahala mono kosuma kuzizuka zizi yo nani 'mbi? Hamba gwegwe go mweneco go Muwaha Mulungu, kumuloloseza nani lo, nayo ho yasume kuwalonjela na wanji?”

¹³ Nayo Muwaha Mulungu yakamhitula yakatya, “Zizi zijela, vyono i wanhu wangu wakondya kugaleka i mejizo gangu gono nawejiza. Weza wasina hamba cihuliko kuli'ne, hamba kwituma zono nawalonjela wetume.

¹⁴ Wakawa wajendeleye ne lizeze lyawo du lyo kuhemba vihwani vya Baali, na vyono wafundwa ne wasogo zawo.

¹⁵ Alu agwe wuhulicize zono ane nane no Muwaha Mulungu, we mihanga u Mulungu we Waisilayeli, vyono notenda. Nowalisa wanhu wangu mabici makali, niwang'wese ne sumu wang'we.

¹⁶ Noweyagaziza mu makungugo ganji, gono weneco, hamba ne walezi wawo, wali si wagamanyile yaye. Nowatumila walugu, nghawongomezeze lukulu.”

I wanhu wa mwi'kaya lya Yelusalemi wakulila, wakulondola wutazi

¹⁷ U Muwaha Mulungu we mihanga yakutya nhavi, “Alu muzihwesaje ta zizi zono zikuza! Muceme wanya kulila waze walile, muwaceme wacekulu wono wembaga zinyimbo ze maziko.”

¹⁸ Nawo wanhu wakutya, “Ale, muwalonjele weyohe, waze wacimbile'se lwimbo lwe maziko, wembe, sunga ne meso getu gameme mahozi, ne zinghope zetu ze meso zisuluze malenga so cililo cetu.”

¹⁹ Ale, ta muhulicize cililo cono cikulawa ku Sayuni cono wakutya, “Alu langa congomela! Cakozwa cevu muno muno! Nalu yicinojeye ciyilece yisi yetu hambi zikaya zetu nha zamwagulwanga.”

²⁰ Nane Yelemiya nghatya, “Nye nyo wacekulu, ale muhulicize zono u Muwaha Mulungu yakulonga, muteje makutu genyu muzikamise zinghani zakwe nanye muwejize ne wana wenyu we cicekulu vyono walilaga, ne weyendi wayenyu, vyono wembaga u lwimbo lwe maziko.

²¹ Hambi i lifwa nha lyaciziza likolile mu madilisha getu, lyenjila mu zikaya zetu zo wutemi, ho liwawulajile lukulu i wana wetu mu zinzila, ne wazelelo wetu mu zi sokoni.

²² Nalu, i mivimba yokwiyagala caka hanhu hose yihwane nhe malundo ge mboleya yono yili mu migunda. Hamba maso go wuhemba gono gadudulwa, hanyuma kanyhi gawa kulekwa no mududuzi gagwiye hasi. I maso gono gowa gasina mono yakugalundika hamonga. Ale, zizi zo Muwaha Mulungu kanhuma nimulonjelenyi.”

²³ U Muwaha Mulungu yakutya nhavi, “I wanhu we mahala, walece kwikumya so mahala gawo, hamba wono wena vilungo, ku soko ye vilungo vyawo. Nawo i wagoli nhavivyo, walece kwikumya ku soko yo wugoli wawo.

²⁴ Langa mono yakwikumya, yekumyaje ku soko vyono yakondya kumanya'ne, hamonga no kunyizuka. Hambi u wendo wangu nha si wupitukaga yaye, nane nitumaga ze ling'ani na zo mugoloka. Na zizi zo nghani du zono zinyendezaga. Vyo nghutya ane no Muwaha Mulungu.”

²⁵ U Muwaha Mulungu yakutya nhavi, “I vilo vikuza, lono nolowalipiciza i wanhu wose wono walame mu miwili du,

²⁶ Wamisili, Wayuda, Waedomu, Waamoni, na Wamowabi, hamonga ne wanhu wono wekalaga mu nyika, wono wekalaga na mvwili fupi.” Hambi wanhu wawa wose, hamonga ne Waisilayeli wose, nha walame, ninga si wacikamise i cilagane cono wene walajiye citanjilo cayo. Holeka wakali nalama mu zinhumbula.