Yelemiya 51 - Luganuzi Luswanu Kuli Wanhu Wose 2002

U wuling'anizi wunji kanyhi, kuli Babiloni

¹ U Muwaha Mulungu yakutya nhavi, “Noleta libeho lyo wuhodanje, mu yisi ya Babiloni, na muli wanhu wayo.

² Nawategula wanhu wajenzi, wayongomeze Babiloni, nhe libeho likuputa mawaje go 'hemba. Na kolo lizuwa lilyo lyo wuhodanje likuza, wawo wajenzi woloyihoma Babiloni ku wulawa mbavu zose, wayilece yili bwete.

³ Hamba si wowaleceleza i wasilikale wa Babiloni watuje cilejeho co kuguma zisonga zawo, hamba kuvwala vivwalo vyawo vye cuma. Kanyhi si wosigaza muzelelo hamba monga. Langa wolyongomeza du lipuga lyose!

⁴ Wowapela nghomele mbaha, nawo wowa kufwila du mu zinzila ze makaya gawo.

⁵ Ane no Muwaha Mulungu we mihanga, nghali hamba si nawaleka Isilayeli na Yuda yaye, hamba wawe wene wetuma wubi hali 'ne, ane Mono nelile wa Isilayeli.

⁶ Mutize wulawa mu Babiloni! Munhu yeponye nhumbula yakwe! Mulece kutamisizwa lukulu so wubi wa Babiloni. Hambi nha go madaha gangu luno, go kwilipiciza cilipicizo cangu kuli wene, nha vyono yiwanojeye.

⁷ Babiloni, yali nha cikombe ca zahabu mu muwoko wangu, cono cawang'wesaga i wanhu wose wa mono'nze sunga wagala. Nago makungugo, gakaying'wa divayi yiyo, gakagala, sunga ne mahala gawo gakajilila.

⁸ Woyi hee! Babiloni yigwa no kongomela! Ale, muyilililaje! Alu mulondole miti yo kuzilagulila zinghomele zayo, nha lunji konoga.

⁹ Nawo iwajenzi wono wekalaga mumo mu Babiloni, wakutya nhavi. Nase cajela muno kuyitaza Babiloni, ninga cikawa cacela. Holeka luno, yicinojeye hodu ciyilece, ciwuce ciwuye ku zikwetu. Hambi u Mulungu nha yakondya kuyilipiciziza Babiloni mu vilungo vyakwe vyose, no kuyongomezeza lukulu.”

¹⁰ U Muwaha Mulungu yakutya nhavi, “I wanhu wangu wakwicemeleza wakutya nhavi, ‘U Muwaha Mulungu yakondya kulajila zo wiling'ano wetu. Holeka aluno, cibitenyi cikawalonjele i wanhu wa mu Yelusalemi, zono u Muwaha Mulungu, u Mulungu wetu yetumile.’ ”

¹¹ U Muwaha Mulungu kawasagahiza i watemi wa Mediya, hambi nha yakusaka yayongomeze Babiloni. Na yiyo yo nzila yono kokwitumamila ho yayilipicize Babiloni, ku soko vyono wene wayihodanga Nyumba yakwe. Nawo i walongola we milewo, wakulajiliza wakutya, “Ale! Nolenyi zisonga zenyu! Muwikanize ne zingula zenyu!

¹² Mwinule bendela mucanyha ye majinji ga Babiloni. Muwice wulindilizi we vilungo! Muwice walindilizi! Muwice wanhu wono wowa kugoza.” Hambi u Muwaha Mulungu, nha yakondya kwituma zinghani zono yalonga, nha vyono kowatendela wanhu wa Babiloni.

¹³ Alu, mulanje ta, yisi yono yina makolongo menji, hamonga no wugoli wuwaha, ninga cipango cayo cakondya kuza, co mudumo wayo.

¹⁴ U Muwaha Mulungu we mihanga, kelahiza ko mutima wakwe, nha vyono kotuma wanhu wenji, waze wayihome Babiloni, nawo wowa wenji nhe mawumbi ge zinzije. Nawo wowa kwimba so wusume.

U lwimbo lo kumukumya Mulungu

¹⁵ U Muwaha Mulungu yayiwumba yinze kwe vilungo vyakwe, yayinoza yisi kwe mahala gakwe, yakawutandika no wulanga.

¹⁶ Na ko wulajilize wakwe, malenga ga mu wulanga gadidimaga, kanyhi kagakongholaga mavunde ku wulawa ku zimhelo ze 'nze. Kaganozaga mamuli gawa kumulika mu mvula, kanyhi kayiletaga mbeho ku wulawa mu wuwiko wayo.

¹⁷ Na muli zizo zose, i wanhu wawonaga nha wulele du, kanyhi wasina mahweso. Nawo wono wasesaga vihwani, wakozwa cevu, hambi i milungu yono wayinozaga, nha milungu ya wulambi du, kanyhi musina wehele muli yene.

¹⁸ Holeka yisina cambuzi du hamba cidodo, yinojeye yibedegalwe. Ninga u Muwaha Mulungu kolo yeza kuza, koyongomeza yose.

¹⁹ U Mulungu wa Yakobo nha si yehwanile yene, hambi mwene, nha yo yaviwumba vinhu vyose, kanyhi yo mweneco mono yayihaga nghungugo ya Isilayeli wawe wanhu wakwe mweneco. Ne litagwa lyakwe mwene, yo Muwaha Mulungu we mihanga.

I nyondo yo Muwaha Mulungu

²⁰ U Muwaha Mulungu yakutya nhavi, “Agwe Babiloni, yo gwegwe mono wuli nyondo yangu, kanyhi yo gwegwe mono wuli citwalo cangu co wulugu. Nane nghakwitumamila, ho wugabenanjize makungugo, hamonga no wutemi wayo.

²¹ No kuzibenanjiza zifwalasi, hamonga na wono wakuzipanda, no kubenanjiza matuka go wulugu, hamonga na wono wakugajendya,

²² no kuwawulaga i walume ne wacekulu, no kuwawulaga i wanhu mututu, ne wana wadodo, no kuwawulaga i wazelelo ne wahinza,

²³ no kuwawulaga i wadimi hamonga ne mitugo zawo, no kuwawulaga i walimi hamonga ne zifwalasi zawo, no kuwabenanjizanga i watemi, hamonga ne wetumami wawo wawaha.”

U wulipicizwe wa Babiloni

²⁴ U Muwaha Mulungu yakutya nhavi, “Ninga nane luno, nomulipa Babiloni hamonga ne wanhu wayo, muli zimbi zose zono wetuma mu Yelusalemi.

²⁵ “Hambi agwe Babiloni, nha wehwana nhe litunda, lyono likuyongomeza yinze yose. Ninga wumanye, nha vyono, ane no Muwaha Mulungu, nili mulugu wako. Nokwibata, nghugalagaze ho hasi, nghulece wuvutuce ne mavu.

²⁶ Sunga ne mabwe gono golowa mu wongomele wako, si golosuma kwitumamilwa kanyhi mu wuzenjelwe. Nagwe kolowa nha nyika cibitilila. Vyo nghutya, ane no Muwaha Mulungu.

²⁷ “Mwinule bendela hacanyha so wihomi! Mutowe ne ndulele, i makungugo ho gahulice! Mugawikanize makungugo so wulugu, wayihome Babiloni! Muwalonjele sunga ne watemi wa Alalati na Mini, hamonga na Ashikenazi, wose wenjile mu milewo. Mulete zifwalasi, ziwe nyinji muno nhe matewa ge zinzije.

²⁸ Mugawikanize makungugo so wulugu, wayihome Babiloni. Mutume wanhu wabite wakawalonjele sunga ne watemi wa Mediya, hamonga ne walongola wawo, ne wetumami wawo, ne wanhu wose wa mu zi'si za mu wutemi wawo.

²⁹ Sunga ne yisi yose yikucicima, ku soko u Muwaha Mulungu, yeza kuzifisiliza zono yazilonga, yayinoze Babiloni yiwe nyika, yiwe yisina hamba munhu mono kokwikala mumo.

³⁰ Ne wasilikale wa Babiloni, nha wakondya kusimya milewo, nalu wenjila mu magomawakali gawo. Alu wasina vilungo kanyhi, weza wenha wacekulu. Ne milango yose ye likaya, nha yabeneka, ne zikaya zikukongojela mu moto.

³¹ Vipuga vya wanhu, wakumangha wakubita kumulonjela mutemi wa Babiloni, nha vyono likaya lyakwe lyakondya kubenwa mbavu zose.

³² Ne walugu wakondya kuliteka likolongo, lyono lidumuye mwi'kaya, kanyhi na vyono, sunga ne magomawakali gose, gakondya kupembelwa moto. Ne wasilikale wose wa Babiloni, wakondya kwinjilwa no woga.

³³ Ne walugu wowasuma musunho, wawakanyaje nho 'hemba mu cuga. Vyo nghutya, ane no Muwaha Mulungu, we Mihanga, u Mulungu wa Isilayeli.”

³⁴ U mutemi Nebukadineza wa Babiloni, kalihodanga likaya lya Yelusalemi no kulinoza liwa nha ciya cono cili bwete, liwa nha limeligwe na nzoka. Yakasola vyose vyono yasakaga mwene, na vyono vyasigala, yakavitaga kutali.

³⁵ Nawo i wanhu wa ku Yelusalemi wotya nhavi, “Leka ta, Babiloni nayo yiwone wusungu, ku soko yo wubi wono yacitendela! ‘Leka ta, Babiloni nayo yilipicizwe, ku soko ye magazo gono cagaya!’ ”

U Muwaha Mulungu kowaponya Isilayeli

³⁶ U Muwaha Mulungu yakuwalonjela i wanhu wa Yelusalemi, yakutya nhavi, “Lanje ta, ane nohijila i zako, nane nowalipiciza cilipicizo i walugu wako, ku soko ye zinghani zono wakutendela. Nowunyaza no muvwilo we malenga ga Babiloni, hamonga ne makolongo gayo.

³⁷ Nayo yisi yiyo, yolowa malundo du ga matongo, holowa wikalo wa malimu. Holowa hanhu hono hakogofya muno, hasina hamba munhu mono kolokwikala mumo. Na wose wono wowa kuziwona zizo, mbeka wotuga woga muno muno.

³⁸ Nawo Wababiloni, wokoloma nha simba, wokoloma nha mana ga simba.

³⁹ Hono wawe wenjilwa no wukali, nane nowanozeza ndigwa yawo, nowang'wesa, wagale, wasangalale. Hanyuma wawe kugona nhongo ze cibitilila, hamba si wolokwinuka kanyhi.

⁴⁰ Nowasola niwategule wakawulagwe nha ngholo, hamba mhene, hamba nyana za ngholo. Vyo nghutya, ane no Muwaha Mulungu.”

U wugwe wa Babiloni

⁴¹ Nayo u Muwaha Mulungu, yakulonga za kuli Babiloni, yakutya nhavi, “Alu mulanje ta, likaya lyono lyali lina lukumyo mono'nze yose, alu lyakondya kusolwa! Babiloni yeza wambuce muli makungugo, nhawule!

⁴² Lilenga lifika mu Babiloni, nayo yifunikwa so winji we mawingo gayo.

⁴³ Ne makaya gayo geza gakogofya, gehwana ne nyika yono yisina malenga, hono hasina munhu wowose mono yekaye mumo, hamba mono yakukola mumo kanyhi.

⁴⁴ Nane nomulipiciza Beli, u mulungu wa Babiloni. Nane nomunoza yalavyanize milungu yose yono yayihiza. Ne makungugo si gomuhemba kanyhi yaye.” “Majinji ga Babiloni gakondya kugwa.

⁴⁵ Nawo i wanhu wa Isilayeli wakondya kutiza! Nye nyo wanhu wangu, mutize, mwiponye nhumbula zenyu ne likuwo lyangu likali.

⁴⁶ Ninga mulece kutukuwika mitima yenyu, hamba kuwa no woga kuli zinghani zono mukuzihulika mu'si. Hambi mapwepwe nha si goleka kuza, mwaka na lupwepwe lwayo lono lwisimile. Hanji lupwepwe lwe mawulaji mu'si, hamonga no wihomi wo mutemi no mutemi muyagwe.

⁴⁷ Ninga hamba nhavivyo, lizuwa lyolokuza lyono nolonoza wuling'anizi ne vihwani vya Babiloni. Ne yisi yose yolokozwa cevu muno muno. Ne wanhu wayo wose wolowulagwa.

⁴⁸ Ne vinhu vyose vyono vili mono'si na vyono vili ku wulanga, vyolosecelela muno muno, kolo Babiloni yikugwiswa ne wanhu wono wakulawa ku lubavu lwa kusumuka kuza kuyongomeza.

⁴⁹ Hambi Babiloni nha yo yambuza lifwa lye wanhu wenji mono'nze yose. Holeka luno nayo Babiloni, yogwa ku soko vyono yambuza Waisilayeli wenji wakafwa. Vyo nghutya, ane no Muwaha Mulungu.”

I nghani yo Mulungu kuli Waisilayeli wono wali ku Babiloni

⁵⁰ U Muwaha Mulungu yakuwalonjela wanhu wakwe wono wali ku Babiloni, yakutya nhavi, “Nanye, vyono mwakondya kupona mwi'fwa, alu mutuluce mubite! Mulece kanyhi kulindila! Hamba muwe muli kutali muno na ku zikwenyu, ninga 'nye munyitumbile nene du, ane no Muwaha Mulungu wenyu. Kanyhi muyikumbucilaje na Yelusalemi.

⁵¹ Ninga 'nye mukutya ti, ‘Oo! Ase nha cikozwa cevu, kanyhi cikuwona soni, kanyhi cikwiwona nha cisina wutazi wo wose, hambi i wajenzi nha wenjila hono helile mu Nyumba yo Mulungu.’

⁵² Ninga ane nghutya, lizuwa lyokuza lono nane noviling'aniza vihwani vyose vya mu Babiloni, nawo wono watuga nghomele wololila mu'si yose.

⁵³ Nayo Babiloni, hamba yali yinyasuce ko ku wulanga, yikazenje magomawakali ge vilungo kuko. Hamba nhavivyo, vyo nali niwatume wanhu kuko, wabite wakayongomeze du. Vyo nghutya, ane no Muwaha Mulungu.”

U wongomezwe wunji kanyhi, we yisi ya Babiloni

⁵⁴ U Muwaha Mulungu yakutya nhavi, “Alu, muhulicize mazi ge cililo, gono gakulawa ku Babiloni, so wongomele wuwaha we'si.

⁵⁵ Ane nghuyongomeza Babiloni, nghusaka niyinyamaze du twii. Ne mapuga ge wasilikale, wakwinjila lumangho, wenha mawingo gono gakukoloma no kuhoma, akuno wazozize muno.

⁵⁶ Walugu nha waza ho wayongomeze Babiloni, ne wasilikale wayo wakutekwa, ne mapinde gawo gakubeneka. Hambi ane nha yo nene Mulungu, mono niwulipicizaga wubi. Nane noyitendela Babiloni nha vyono yene yinojeye.

⁵⁷ Nowanoza i watemi wayo wang'we, wagale, hamonga ne wanhu we mahala, ne walongola, ne wasilikale wose. Nawo wogona nhongo ze cibitilila, hamba si wolokwinucila lukulu. Vyo nghutya ane no Mutemi, ane mono nili Muwaha Mulungu, we mihanga.

⁵⁸ Ne majinji ge likaya lye vilungo Babiloni, golokumulwa gagwiswe ho hasi. Ne milango yayo mitali, nayo yolopembelwa moto yikongojele. Ne milimo yose ye makungugo, yo nghani ya bwete du, hambi u wuhidimbazi wawo nha wuli mu malambi go moto. Vyo nghutya, ane no Muwaha Mulungu.”

I nghani ya Yelemiya, yikutegulwa ku Babiloni

⁵⁹ U munhu mono vyali vili behi muno no mutemi Zedekiya, yali Selaya u mwana wa Neliya, kanyhi yo mwizukulu wa Maseya. Ale, mu mwaka we kane, wo wutemi wa Zedekiya mu Yuda, Selaya yabitaga ku Babiloni hamonga no mutemi Zedekiya. Nane nghamupela malajilizo.

⁶⁰ Nghandika mu citabu zinghani zose zo wongomezwe wono woyiziza Babiloni, hamonga ne zinghani zose za Babiloni.

⁶¹ Nghamulonjela Selaya nghamutya, “Kolo weza kufika kuko ku Babiloni, wuzisomaje kwe 'zi yiwaha ha mwande ye wanhu wose, zinghani zizi zose zono zandicigwe mumu.

⁶² Hanyuma wuwe kulomba wukutya, ‘Gwe go Muwaha Mulungu, yo gwegwe watya nha vyono, kolohongomeza hanhu bahano, ho halece kuwa na cinhu co cose cumi, cono cokwikala mumo, hamba munhu hamba nimu, nayo yisi yowa nyika cibitilila.’

⁶³ Nagwe Selaya kolo wakondya kuzisoma hali wanhu, zose zono zili mu citabu cici, nhondo wuciwopelezaje ne libwe, wucigumile mwi'kolongo lya Efulata,

⁶⁴ akuno wukutya, ‘Nhavivi vyo yotagwa Babiloni, nayo yolododomela, hamba si yolokwibuka kanyhi, ku soko yo wongomele wono u Muwaha Mulungu koyongomezeza.’ ” Ne zinghani zo muwizi Yelemiya, bahano ho zidumiye.