Yelemiya 50 - Luganuzi Luswanu Kuli Wanhu Wose 2002

U wusolwe we yisi ya Babiloni

¹ Ayi nayo, yo nghani yono u Muwaha Mulungu yanonjela, ya kuli ze likaya lya Babiloni, hamonga ne wanhu wayo, yakatya nhavi,

² “Muyanzaje nghani yiyi mu makungugo! Muyiganule! Mwinule cipepela, ganulenyi! Mulece kuyihundika! Mulonje mutye, ‘Babiloni yisolwa!’ Beli yikozwa cevu! U mulungu wayo Maliduki, katulanjika! Ne vihwani viseswe vya Babiloni vyakozwa cevu, ne vihwani vyawo vye liwifyo vyono wavihembaga, alu vyabenanjika.

³ “Ne likungugo lyono likulawilila kusumuka, lyakondya kuza liyihome Babiloni, liyilece yawa nha nyika. Nazo zinimu zotiza mumo, na holowa hasina hamba munhu monga mono kolokwikala mumo.”

U wuwuye wa Isilayeli

⁴ U Muwaha Mulungu yakutya nhavi, “Ne vilo vivyo kolo vyeza kuza, wanhu wa Isilayeli hamonga ne wanhu wa Yuda, wolokuza wakulila, wakunondola ane no Mulungu wawo.

⁵ Nawo woloyiwuza nzila yono yibitile ku Sayuni, nawo woloyityatya. Wolonoza cilagane ce cibitilila, cono hamba si wolocibena kanyhi yaye.”

⁶ “I wanhu wangu wehwanile zingholo zono u mudimi wazo yazajiliza mu matunda. Nalu wakuyega-yega nhe zingholo, wakwitananhiza mu matunda, wakondya kusemwa no kwawo kwihi.

⁷ Nawo wakuhomwa no munhu wo wose du mono wanhu wose wono yakuwawona. I walugu wawo, nawo wakutya, ‘Hambi wene nha wamusutizya Muwaha Mulungu, holeka nase, zizi zono cikuwatendela, hamba si cikusutya yaye. Hambi i walezi wawo nha wali wamwitumbiye Muwaha Mulungu, holeka nawo yali yiwanojeye kuwa wehuwilwa kuli mwene.’ ”

⁸ “Nye nyo wanhu wa Isilayeli, ale mutize muwuce kuko ku Babiloni! Muwuce mumo! Mweze nyenye walongozi kuwuka!

⁹ Hambi 'ne nha nokonghola lipuga lye makungugo gono gali vilungo, ku wulawa ku lubavu lwa kusumuka, waze wayihome Babiloni. Nawo wokuza wayihome yisi, wayisume. Ne wanhu wawo, wo wanghula muno mu wupelembi, na mu wuguma zisonga, si wasutyaga wulunji mu wugume wawo.

¹⁰ Nayo Babiloni yolosolwa no kutekwa. Nawo wono woloyiteka, wolovisola vinhu vyose vyono wolosaka weneco. Vyo nghutya, ane no Muwaha Mulungu.”

U wugwe wa Babiloni

¹¹ U Muwaha Mulungu yakutya nhavi, “Anye nyo wanhu wa Babiloni, anye mwawateka wanhu wangu. Nalu mwina nyemo no wusangalale, mukujenda mwihwanile ng'ombe yono yikufijiha wuhemba, hamba kotya nha fwalasi yono yikulila.

¹² Ninga, likaya lyenyu liwaha, lyonyetywa no kukozwa cevu. Nayo Babiloni, yolowa yo ya kunyuma muno muno si nhe makungugo gose. Yolonyala, yiwe nyika yono yisina malenga.

¹³ Na ku soko ye likuwo lyangu, hasina hamba munhu monga mono kolokwikala mu Babiloni, langa yokwikala matongo du. Ne wanhu wose wono wowa kukola mumo, wolowa kutinuswa no kwizina.”

¹⁴ “Nanye nyo wanhu wo wupinde, ale mwiwikanizaje muyipilime Babiloni mbavu zose. Muyigumaje Babiloni ne zisonga zenyu zose, hambi nha wetuma wubi hali 'ne, ane no Muwaha Mulungu.

¹⁵ Ale, mumuhomaje, akuno mukumuzozeza mbavu zose ze likaya! Alu, Babiloni yakondya kupilimwa mbavu zose. Ne majinji gayo gose gakondya kukumulwa no kugwiswa hasi. Nane nghwilipiciza cilipicizo kuli Wababiloni. Holeka mwilipicizaje cilipicizo cenyu muli wene. Muwatendele nawo nha vyono nawo wawatendelaga wanji.

¹⁶ Mulece kuleceleza hamba mbeyu zihadikwe kanyhi mu yisi yiyo, hamba ndudula yo yose. Ne wajenzi wose wono wekalaga mumo kolo wakuwuwona wulugu, hodu nawo wokogopa wawe kuwuya ku zikwawo.”

U wuwuye we wanhu wa Isilayeli

¹⁷ U Muwaha Mulungu yakutya nhavi, “I wanhu wa Isilayeli, wenha zingholo zono zawingwa ne simba, no kwiyagazwa ako na ako. Hambi ha lulongozi, nha wakahomwa no mutemi wa Ashuli, hanyuma yayo kanyhi, wakahomwa na Nebukadineza, u mutemi wa Babiloni, yakawabenanga mafupa gawo.

¹⁸ Holeka ku soko ya zizo, ane no Muwaha Mulungu we mihanga, ane no Mulungu wa Isilayeli, nomulipiciza u mutemi Nebukadineza hamonga ne yisi yakwe, nha vyono namulipiciza u mutemi wa Ashuli.

¹⁹ Hanyuma niwagomole wanhu wa Isilayeli ku yisi yawo. Nawo kolo wafika kuko, wowa kulya zindigwa za mwi'tunda lya Kalimeli, hamonga na za mu yisi ya Bashani. Nawo wowa kulya ndigwa yo yose du yono wosaka, yono yikulawa mu ma'si ga Efulayimu na Gileyadi.

²⁰ Na kolo vilo vivyo vikuza, holowa hasina wubi wo wose kanyhi, wono wolowa kwitumwa na Isilayeli, hamba mabi go gose mu Yuda. Hambi nha nolowanenela wanhu wose wono nolowasigaza. Vyo nghutya, ane no Muwaha Mulungu.”

U wuling'anizi wo Mulungu, kuli yisi ya Babiloni

²¹ U Muwaha Mulungu yakutya nhavi, “Ale, muwahomaje wanhu wa Melatayimu na wa ku Pekodi. Muwawulaje no kuwongomezeza lukulu. Muzinozaje zose nha vyono nghumulajilizenyi nene. Vyo nghutya, ane no Muwaha Mulungu.

²² Ne mazozo go wulugu gakuhulikwa mu'si. Ho wuli wongomezwe wuwaha muno.

²³ Babiloni yayipondanjiza yisi ne nyondo no kuyibenanjiza. Ninga luno, nyondo yiyo nayo yakondya kubenanjika! Sunga ne makungugo gose gatinuswa, ku soko ya zono zakondya kuyagana yisi yiyo.

²⁴ Agwe Babiloni, wali kwihoma nane, nalu nane nakwibata mu mutego wono nali nghutejile, ninga agwe si wali wuzimanyile zizo.

²⁵ Nane luno, nakondya kuhadigula i hanhu hono nali niviwicile vitwalo vyangu. Nane navisola kwe likuwo lyangu. Hambi 'ne no Muwaha Mulungu, we mihanga, nha nina mulimo wo kuvitumamila mu yisi ya Babiloni.

²⁶ Muyihomaje yisi mbavu zose, mugabene ne madongha gono yiwicilaga wuhemba wayo! Kanyhi muvitekaje ne vinhu vinji muno kotya nhe lundo lyo wuhemba! Muyongomeze yisi yose! Mulecele lukulu kusigaza hamba cinhu co cose mumo!

²⁷ Muwawulaje ne wasilikale wayo wose! Muwongomezeze lukulu! Woyi hee, kuli nye, nyo wanhu wa Babiloni! Hambi lizuwa nha lyakondya kuza lyo kumuling'anizenyi nanye.”

²⁸ (Ne wanhu wono wakutiza kuko ku Babiloni, no kuza ku Yelusalemi, wawo wo walalonga zose, nha vyono u Muwaha Mulungu u Mulungu wetu yakwilipiciza cilipicizo ku soko ya zono Babiloni yetuma mu Nyumba yiyi yo Mulungu.)

²⁹ “Walonjele i wanhu wo wupinde, wewikanize, wayihome Babiloni. Muwategule wanhu wose wono wamanyile kuwitumamila wupinde ne zisonga. Mulipilime likaya, kanyhi mulanjilile, mulece kumuleceleza yunji wo wose yatije. Mulilipicize ku soko ya zose zono lyetuma. Kanyhi mulitendele nha vyono lyene lyawatendela wanji. Hambi nha lyazinozaga zizo zose ko widunhumuzi hali 'ne, ane mono nelile wa Isilayeli.

³⁰ Holeka ku soko yiyo, i wazelelo wakwe wose wowulajilwa mu zinzila za mwi'kaya. Ne wasilikale wakwe wose, wokongomezezwa lukulu mwi'zuwa lilyo. Vyo nghutya, ane no Muwaha Mulungu.”

³¹ “Agwe Babiloni, mbeka wumemile widunhumuzi wose. Holeka nane no Muwaha Mulungu we mihanga, nili mulugu wako! Alu nane lizuwa lyakondya kuza lyo kukulipiciza nagwe.

³² Ne likungugo lyako lyo widunhumuzi, lyokobala no kugwa. Na howa hasina hamba munhu monga mono kokutaziza yaye. Nogapembela moto makaya gako gose, ne vinhu vyose vyono vili mugati yayo, vyokongomezezwa lukulu.”

³³ U Muwaha Mulungu yakutya nhavi, “I wanhu wa Isilayeli ne wanhu wa Yuda, wakwiwonelwa muno. Na wose wono wakuwateka, hodu wakuwebata nzii, hamba si wakuwalecela yaye.

³⁴ Ninga mono kowaponya, yali vilungo muno, ne litagwa lyakwe yakucemwa u Muwaha Mulungu, we mihanga. Mweneco du yo kowakalalila no kuyiletela yisi mulamu. Ninga gowa magayo kuli wanhu wa Babiloni.”

³⁵ U Muwaha Mulungu yakutya nhavi, “Lifwa kuli Babiloni! Lifwa kuli wanhu wayo, hamonga ne watemi, ne wanhu wayo we mahala.

³⁶ Lifwa kuli wawizi wayo walambi, nawo walelepa muno nye! Lifwa kuli wasilikale wayo, nawo wenjilwa no woga muno!

³⁷ Mongomeze zifwalasi zawo hamonga ne magali gawo go wulugu! Lifwa kuli wasilikale wawo wo kulipwa, nawo ho watimba muno! Mongomeze sunga ne viwutwa vyawo, muvitece no kuvisola.

³⁸ Muwaletele nzala mu yisi yawo muganyaze ne makolongo gayo. Babiloni yo yisi yono yina vihwani vyo kogofya muno, na vivyo vyo vyawapuvya wanhu.

³⁹ “Na ku soko yiyo, holeka Babiloni, wowa wikalo we masetani ne myuhe myavu, hamonga ne zindeje zinyavufywe. Langa wanhu, hamba si wolokwikalila lukulu kanyhi kuko cibitilila.

⁴⁰ Ne nghani yiyo yokwijela ku Babiloni, nha vyono zejela ku Sodoma na Gomola, lono nazongomezeza, hamonga ne vikaya vyono vyali vili behi behi nazo. Na holowa hasina hamba munhu wo wose, mono kolokwikala mumo kanyhi. Vyo nghutya ane, no Muwaha Mulungu.

⁴¹ “Nawo wanhu wakuza wakulawilila ku yisi yo lubavu lwa kusumuka, likungugo lyono lili vilungo muno, sunga ne watemi wenji wakwiwikaniza so wulugu.

⁴² Nawo wakondya kusola sunga ne vitwalo vyawo vyo wupinde hamonga ne mimaje. Nawo wakali muno, kanyhi wasina hamba no lusungu yaye, nawo wakukoloma nhe ngholomo ye lilenga, lono wakuzimasya zifwalasi zawo. Nawo wewikanize du, wayihome Babiloni.

⁴³ Nayo u mutemi wa Babiloni yakuzihulika zizi, ne miwoko yakwe yafwa yitenene. Ne magayo, gakondya kumwibata, genha go wusungu wo mucekulu mono yali mu nghunga yo lusawo.

⁴⁴ “Nane nolokuza niwanoze Wababiloni wayitize yisi yawo nhinicizo, nha vyono simba liswelepukaga nhinicizo, likulawa mu mibici yono yititile muno, ya mu mwalambalo we likolongo lya Yoludani, mu wudimilo wono si wunyalaga. Nane no Muwaha Mulungu, nowawinga nhinicizo i wanhu wakwe wawuce muli mwene. Nolomuwika mulongola mono nolomuhagula nene no mweneco. Hambi nani lo mono yenha nene? Nani lo mono kosuma kusitaka? Hamba mudimici mono kosima kunyimila?

⁴⁵ Alu, muhulicize ta, i mahweso gono nghulihweseza likaya lya Babiloni, hamonga na zono nghusaka niwatendele wanhu wayo. Sunga ne wana wawo wolokwejenhwa, ne wanhu wose wolokwinjilwa no woga.

⁴⁶ Na kolo Babiloni yakondya kugwa, yisi yolocicimila lizi lyo wugwe wuwo, ne cililo cayo colohulikwa kutali, sunga ko ku nghungugo zinji.”