Yelemiya 49 - Luganuzi Luswanu Kuli Wanhu Wose 2002

U wuling'anizi wo Muwaha Mulungu, kuli yisi ya Amoni

¹ Azi zo nghani zono u Muwaha Mulungu yakuyilonjela yisi ya Amoni yakutya, “Alo i wanhu wa Isilayeli wali hayi lo? Heza hasina hamba munhu monga mono yakuyitetela yisi yawo lo? Alu nhawule wakuwaleka i wanhu wono wamuhembaga Moleki wakuyisola yisi ya wo mulango wa Gadi no kwikala mumo?

² Ninga cipango cikuza cono nilawanoza i wanhu we likaya lya Laba, wahulice nyhinyinho yo wulugu, nayo yolosigala matongo du, sunga ne vitumbi vyayo vyose, vyolokongojezezwa lukulu. Hanyuma Isilayeli, woloyisola kanyhi yisi yawo, mu wulawa mu miwoko ya wono wali wayiboka.

³ Nanye nyo wanhu wa ku Heshiboni mulile! Mweze kulila mukutya, Ayi yakondya kongomezwa! Nanye nyo wacekulu wa ku Laba, mulile! Mwivwikaje magunila muwe kulila, akuno mukumangha ako na ako. Hambi u mulungu wenyu Moleki, nha kolosolwa yategulwe ku wuhamywe, hamonga ne wakohani wakwe ne wawaha wayo.

⁴ Alu mwene mukwidunhumulila ci anye nyo wanhu mono si muli wehuwilwa? Kumbe ne vilungo vyose ho musina. Alu nhawule mwiyitumbiye nyenye nyo weneco, no kwihwesa nha vyono hasina yunji wo wose mono kokuza yamuhomenyi?

⁵ Ninga 'ne, nomogofyenyi ku wulawa mbavu zose. Nanye wose motiza, mowa kumangha munhu yakwiponya no wumi wakwe. Na holowa hasina munhu wo wose, mono kolosuma kulikongholeza hamonga kanyhi, lipuga lyako lye wasilikale wo wulugu.”

⁶ “Ninga hanyuma yayo, ho noloyimotya kanyhi yisi ya Amoni. Vyo nghutya, ane no Muwaha Mulungu.”

U wuling'anizi wo Muwaha Mulungu kuli yisi ya Edomu

⁷ Azi zo nghani zono u Muwaha Mulungu we mihanga, yakuzilonga kuli yisi ya Edomu, yakutya nhavi, “I wanhu wa Edomu, alo wakondya kwajiliza zinghani zawo zo wutonji lo? Ne watonji wawo nhondo, weza si wakuwalonjela lo zono ziwanojeye wetume? Ne mahala gawo gose nhondo gakondya kwajilila lo?

⁸ Holeka anye nyo wanhu wa Dedani, aluno mutize, muwuye ku nyuma, mwihundice! Hambi nha nghuwongomeza luno i wana wa Esawu, vyono lipango lyangu lyakondya kufika lyo kuwongomezeza.

⁹ Nawo wanhu lono wakuhepa zi zabibu, wasigazaga zinji mu mizabibu, nawo wahizi kolo wakuza mu madaha ge cilo, nawo wasolaga du zono wendile weneco.

¹⁰ Ninga ane nakondya kuluwusiza lukulu lulelo lwa Esawu, ne hanhu hakwe he cinyele, ane nihanzalika, ho walece kwihundika kanyhi. Ne wanhu wose wa Edomu, wokongomezwa. Hasina hamba munhu monga wa muli wene mono kosigala.

¹¹ Wuwalece wanago wono wasina walezi, nane nowakamisa. Ne wacekulu wafwile, wose nowadima nene.”

¹² “Sunga na wose wono wali si wanojeye waling'anizwe, nawo wocing'wela du cikombe cico co wuling'anizwe. Hamba wukwihwesa nha vyono kolekwa wulece kutuga wuling'anizwe lo? Ng'o yaye, langa kocing'wa du cikombe cico co wuling'anizwe.

¹³ Nane nha nakondya kwilahiza nha vyono likaya lya Bozila, lyolowa yikaya lyo wogofye, kanyhi lyolowa nyika. Nawo wanhu wololisekanga muno, no kulitumamila litagwa lyayo nha wulijite. Ne vitumbi vyayo vyose vyono vilipilime, vyolowa matongo cibitilila. Vyo nghutya, ane no Muwaha Mulungu.”

¹⁴ Nane nghatya, “Gwe go Edomu, ane nhuga nghani ku wulawa kuli Muwaha Mulungu, yakutya nha vyono yakondya kugalonjela makungugo gahangulize wasilikale wo wulugu, gewikanize, gaze gakuhome.

¹⁵ Nayo Muwaha Mulungu kokuwusiza lukumyo lwako, na howa hasina yunji kanyhi mono kokupela cogopo yaye.

¹⁶ Hambi u widunhumuzi wako nha wakukonga. Naluno, heza hasina kanyhi hamba munhu wo wose mono yakukogopa yaye, nha vyono agwe wukwihwesa. Agwe mono wikaye mu zimhalika ze mabwe, mu cizuli ce litunda, hamba wunoze linhuli lyako kucanyha muno kotya numba vyono yinozaga, ninga u Muwaha Mulungu vyo kokutimya du ku wulawa kuko. Vyo yakutya, u Muwaha Mulungu.”

¹⁷ U Muwaha Mulungu yakutya nhavi, “U wuhodanjice wono woyiziza Edomu, wowa wuhodanjice wo kogofya muno. No munhu wo wose mono kowa kukola baho, kowa kutinuswa no kutuga woga.

¹⁸ Ne nghani yiyo, yokwijela ku Edomu, nha vyono zejela ku Sodoma na Gomola, lono zongomezezwa hamonga ne vikaya vyono vyali vili behi behi nazo. Na holowa hasina hamba munhu wo wose mono kolokwikala mumo kanyhi. Vyo nghutya ane no Muwaha Mulungu.

¹⁹ Nane nolokuza niwanoze Waedomu wayitize nhinicizo yisi yawo, nha vyono simba yiswelepukaga nhinicizo, yikulawa mu mibici yono yititile muno, ya mu mwalambalo we likolongo lya Yoludani, mu wudimilo wono si wunyalaga. No mulongola mono nomuhagula nene, yuyo yo kololitema likungugo. Hambi nani lo mono yenha nene? Hamba nani lo mono konhemezezya madaha? Hamba mutemici mono kokwisumaniza nane?

²⁰ Alu, muhulicize ta, i mahweso gono nghusaka niwatendele i wanhu wa mwi'kaya lya Temani. Sunga ne wana wawo wolokwejenhwa, ne wanhu wose wolokwinjilwa no woga.

²¹ Na kolo Edomu yakondya kugwa, yisi yolocicimila lizi lyo wugwe wuyo, ne cililo cayo colohulikwa kutali sunga ko ku Agaba.

²² Nawo walugu woloyihoma Bozila kotya numba yiguluce, akuno yigolose ne mabawa gayo. Na mwizuwa lilyo, i wasilikale wa Edomu, wolokwinjilwa no woga wuwaha muno, nho mucekulu mono yali mu nghunga yo lusawo.”

U wuling'anizi wo Muwaha Mulungu, kuli yisi ya Damesiki

²³ Ayi nayo yo nghani yo Muwaha Mulungu, yono yakuyilonjela yisi ya Damesiki, yakutya nhavi, “Nawo wanhu wa mu makaya ga Hamati na Alipadi, wenjilwa na woga, kanyhi wakugazika muno, ku soko wahulika nghani 'mbi. Mahwele menji nhe lilenga, gawaziza, alu weza wasina hamba wucehe yaye.

²⁴ Nawo i wanhu wa Damesiki, watimbile, nawo wakondya kutiza so woga. Nalu wali mu wukalale no wusungu, kotya mucekulu mono yali mu nghuga yo lusawo.

²⁵ Ne likaya lyawo lyono lyali likumucile, lyono lyali limemile nyemo, alu lyakondya kulekwa.

²⁶ Na mwizuwa lilyo, i wazelelo wayo, wolowulajilwa mu zinzila za mwi'kaya, ne wasilikale wayo wolokongomezwa wose.

²⁷ Nane nologapembela moto, i majinji ga Damesiki, nologakongojeza ne makaya gose go wutemi, go mutemi Benihadadi. Vyo nghutya, ane no Muwaha Mulungu we Mihanga.”

U wuling'anizi wo Muwaha Mulungu kuli we mhuga ya Kedali hamonga ne Likaya lya Hazoli.

²⁸ Ayi yo nghani yono Muwaha Mulungu yakuwalonjela we mhuga ya Kedali, hamonga ne zi'si zose zono zali zili mu wutemi we likaya lya Hazoli, zono Nebukadineza u mutemi wa Babiloni yazihoma no kuzisuma, yakutya nhavi, “Ale, muwahomaje wanhu wa Kedali, muyongomeze mbeyu ye wanhu wa kucilima!

²⁹ Mugasole mahema gawo ne matewa gawo ge mitugo, ne mabupa ge myenda ge mahema gawo, hamonga ne vinhu vyawo vyose vyono vili mu mahema gawo. Musole ne zingamiya zawo. Muwalonjele wanhu muwatye, ‘Woga wuli mbavu zose.’

³⁰ “Nye nyo wanhu wa Hazoli, ane no Muwaha Mulungu, nghumusugulenyi, nha vyono munojeye mumanyhe, mutize, mubite mukehundice. Hambi Nebukadineza mutemi wa Babiloni, nha yakumupinjilenyi, yakutya,

³¹ “Ale, muze! Cowahoma wanhu wose wono wakwiwona nha wali mutulano kanyhi wapolile! Ninga ne likaya lyawo ho lisina milango hamba kufuli, kanyhi lisina hamba wulanjilizi wo wose.

³² “Muzisolaje ne zingamiya zawo, hamonga ne mitugo zawo zose! Nane noweyagaziza mbavu zose i wanhu wono wadumulaga zimvwili zawo ziwa fupi. Nowaletela magazo mbavu zose.

³³ Nayo Hazoli yonozwa yiwe nyika cibitilila, hawe hanhu ha wikalo we macewe. Na holowa hasina munhu wo wose kanyhi, mono kolokwikala mumo. Vyo nghutya, ane no Muwaha Mulungu.”

U wuling'anizi wo Muwaha Mulungu kuli yisi ya Elamu

³⁴ Mu mwamulizo wo wutemi wa Zedekiya u mutemi wa Yuda, u Muwaha Mulungu we mihanga, yakanonjela zinghani ze yisi ya Elamu.

³⁵ Yanonjela yakutya nhavi, “Nowawulaga wanhu wose i wanghula wono wakwitumamila wupinde, wono wakuyipela Elamu vilungo.

³⁶ Noleta mbeho yiyipute Elamu, ku wulawa mbavu zose, niweyagazize wanhu wayo mbavu zose, nawo weyagale watizize mu ma'si gose, hawe hasina hamba yisi monga yono si wotiziza.

³⁷ Kanyhi nowanoza wanhu wa Elamu, wawe no woga kuli walugu wawo wono wakuwalondola wawawulaje. Nane nowongomezeza mwi'kuwo lyangu liwaha wanhu wa Elamu. Nowatuma mapuga ge wasilikale, waze wawongomezeze lukulu.

³⁸ Nowongomezeza lukulu, i watemi wawo, hamonga ne walongola wawo, niwe kuliwika baho ne ligoda lyangu lyo wutemi.

³⁹ Ninga hanyuma, ho nolowamotya kanyhi i wanhu wa Elamu. Vyo nghutya ane no Muwaha Mulungu.”