Yelemiya 48 - Luganuzi Luswanu Kuli Wanhu Wose 2002

U wongomezwe we yisi ya Mowabu

¹ Azi zo nghani zono u Muwaha Mulungu we mihanga, yakuyilonjela yisi ya Mowabu yakutya, “Woyi hee kuli wanhu wa Nebo, likaya lyawo nha lyakondya kuhodanjika! Nayo Kiliyatayimu yatekwa, ne magomawakali gayo ge vilungo gakumulwa, ne wanhu wayo wakozwa cevu.

² No lukumyo lwa Mowabu, lwakondya kuwuka. Nawo i walugu wakondya kuyiteka Heshiboni, nalu wakwiwikaniza, ho yalyongomeze likungugo lya Mowabu. Nago i makaya ga Madimeni gonyamazwa twii. Hambi ilipuga lye wasilikale nha lyokuziza.

³ Nawo i wanhu wa ku Holonayimu wakulila muno wakutya, ‘Wuwulaji! Wongomezwe!’

⁴ “Alu Mowabu yakondya kongomezwa, wuhulice, sunga ne wana wakulila.

⁵ Kanyhi wuhulice sunga ne cililo mu nzila, ce mazi gawo go wukalale, cibitile sunga ko ku Luhiti, i makaya ge magayo, sunga ko ku Holonayimu.

⁶ Akuno wakutya, ‘Ale, mumanyhe mbela mbela, mutize, mwiponye wumi wenyu!’ ‘Ale, mumanyhe mwihindile du, nhe zinyhenje za mu nyika!’

⁷ “Hambi agwe Mowabu, nha wali wiyitumbiye go mweneco mu vilungo vyako, hamonga no wugoli wako, ninga aluno, sunga na gwegwe kosumwa, sunga no mulungu wako Cemoshi, nayo kosolwa yategulwe ku wuhamywe, hamonga ne wawaha wako, ne wakohani wako wose.

⁸ Hasina hamba likaya lyo lyose lyono lyolopona lilece kongomezwa, ne lilolo lyokongomela, no wuhihi wohodanjika vyo nghutya, ane no Muwaha Mulungu.

⁹ Wuyiwicilaje Mowabu libwe lye cikumbucizo, hambi nha yokongomezwa musunho. Ne makaya gayo golekwa matongo du. Holowa hasina munhu wo wose, mono kolokwikala mumo kanyhi.”

¹⁰ Mulijitwe munhu wo wose, mono si yakwituma u mulimo wo Muwaha Mulungu ko mutima wakwe wose! Mulijitwe munhu wo wose mono si yakutemanga no kuwulaga!

I makaya ga Mowabu gakongomezwa

¹¹ U Muwaha Mulungu yakatya, “Mowabu kekalaga yacehile du nhondo zose. Yakali si nasolwa hamba kamonga yategulwe ku wuhamywe. Mowabu yehwanile ne divayi yono yisunjile, yono yikali nayidwa mu wulawa mu ciya aci, yitajilwe kanyhi mu ciya cinji. Holeka ne ndaso yakwe, yikali nahodanjika, hamba mhunjile yakwe kukawanika yaye.

¹² “Ninga luno i vilo vyokuza vyono nolotuma wanhu waze wayimwaje Mowabu nha vyono wayimwagaga divayi. Woloyimwaga divayi yakwe yose ya mu viya vyakwe vyose, wavitulanje sunga ne viya vyayo.

¹³ Nayo Mowabu kolokozwa soni, ku soko yo mulungu wakwe Cemoshi, nha vyono nawo Waisilayeli wakozwa soni, ku soko ya Beteli u mulungu wawo mono wali wamwitumbiye.

¹⁴ “Nye nyo wanhu wa Mowabu, nhawule mukwiyitya muli vitung'ati, muli wasilikale we vilungo mu wulugu?

¹⁵ Ninga Mowabu hamonga ne makaya gayo, vyakondya kongomezwa ne wazelelo wayo wono wakamile, wose wakondya kuwulagwa. Ane vyo nghutya, ane mono nili mutemi, kanyhi mono nili Muwaha Mulungu, we mihanga.

¹⁶ I magayo ga Mowabu gasejelela, no wuhodanjice wayo wukuza musunho.

¹⁷ “Holeka anye wose mono mwikaye nayo behi behi, ale, mumulililaje, anye wose mono mwali mulumanyile lukumyo lwakwe. Mweze kulila mukutya, ‘Woyi hee! Mulanje luno, vilungo vyakwe vyo wutemi, vyamuwucila, no lukumyo lwakwe nalo, aluno yeza yawusina.’

¹⁸ Anye nanye mono mwikaye ku Diboni, ale mutime muwuce mu nhojo yenyu, mwikale hasi mu manghundi, hambi u muhodanji nha yakondya kuza nayo yakondya kugaleka magomawakali gako gamwaguce.

¹⁹ Nanye mono mwikaye ku Aloweli, nanye mwime mu zinzila, muwe mulindiye baho, muwe kuwawuza wose wono wakutiza ho mumanye nghani yono yijeye.

²⁰ Nawo womulonjelenyi watye, ‘Mowabu yakondya kugwa.’ ‘Holeka wose muyililile, hambi nha yakozwa cevu. Muyanzalikaje nghani yiyi ku Alenoni, muwalonjele nha vyono Mowabu yahodanjika!’

²¹ “Nawo wuling'anizwe, wakondya kugaziza i makaya ga mu wuhihi, nha cinji mu makaya ga Holoni, na Yahaza, na Mefati,

²² na Diboni, na Nebo, na Beti-dibulatayimu,

²³ na Kiliyatayimu, na Betigamuli, na Betimeyoni,

²⁴ na Keliyoti, hamonga na Bozila. U wuling'anizwe, wakondya kugaziza i makaya gose ga Mowabu, gono gali behi, sunga na gono gali kutali.

²⁵ Ne vilungo vyose vya Mowabu, vyakondya kuwuswa. No wusume wayo wose, alu wongomezwa. Vyo nghutya, ane no Muwaha Mulungu.”

Mowabu yikunyetywa

²⁶ U Muwaha Mulungu yakutya nhavi, “Ale, muying'wesaje Mowabu, ying'we yigale. Hambi nha yakondya kumbedegala 'ne, Holeka ku soko yiyo, Mowabu yokwigalagaza mu madeko gayo, ne wanhu woyisekanga muno.

²⁷ Nagwe Mowabu, wukumbuciye, vyono nagwe wawezwajizaga i wanhu wa Isilayeli? Kanyhi wukawatendela nha wanhu wono wali webatwe ne lipuga lye wahizi.

²⁸ “Nanye nyo wanhu mono mwikaye mu Mowabu, ale, muzilekaje zikaya zenyu! Mubite luno mukekale mu mapalika, muwe nhe nziwa yono yizengaga lwali lwayo mu lubavu lo mulomo we likombo.

²⁹ Hambi Mowabu nha wedunhumula muno! Nane nha nakondya kuzihulika zinghani zo widunhumuzi wako, ne cibede cako, hamonga no wusisi we wanhu wakwe vyono winha, na vyono wakwiyihweseza weneco.

³⁰ Nane ane no Muwaha Mulungu, nha nizimanyile zo widunhumuzi wawo, hamonga no wiwoni wawo we cibwete-bwete. Sunga ne zinghani zawo zono wakwituma nha zowa za cidaha du.

³¹ Holeka nane ku soko yiyo, nowalilila i wanhu wose wa Mowabu hamonga ne wanhu wa Kili-helesi.

³² Kanyhi nowalilila sunga ne wanhu wa Sibuma, kuciza ne wanhu wa ku Yazeli. Nagwe 'gwe 'kaya lya Sibuma, nha wihwanile no muzabibu wono manhambi gayo, gatandaye, gatambuce ne nhumbi ye Lilenga lyo Mwino, gaficile sunga ko ku Yazeli. Ninga aluno i mikalo yenyu ye cibahu, hamonga ne zabibu zenyu, vyose vyakondya kuhodanjika.

³³ No wusangalale, hamonga ne nyemo ya mu yisi yo moso ya Mowabu, vyose vyakondya kuwuka. Nane nakondya kuyidumya divayi ya mu makobonjelo. Na hasina kanyhi munhu wo wose, mono kosuma kuyinoza divayi na nyemo mbaha.

³⁴ “Nawo i wanhu wa ku Heshiboni, na wa ku Eleyale wolowa wakulila, ne cililo cawo, colohulikwa sunga ko ku Yahazi. Sunga ne wanhu wa ku Zowali, nawo wolohulika, sunga ko ku Holonayimu, na ku Egilati-shelishiya. Sunga ne cikolongo ca ku Nimulimu cakondya kunyala.

³⁵ Kanyhi nolowemila i wanhu wa Mowabu walece kulavya vilavywa vyawo vinyanywe, mu hanhu hawo hono wahembelaga, hamonga ne makumbiko gono wayilavizyaga milungu yawo. Vyo nghutya, ane no Muwaha Mulungu.

³⁶ “Holeka nhumbula yangu yikutamika muno ku soko ya Mowabu, hamonga ne wanhu wa ku Kili-helesi, nho munhu mono yakutowa lwimbo lwe maziko mu fuluti. Hambi i vinhu vyose vyono wali wena navyo, nha vyakondya kwajilila.

³⁷ Nawo wose wakondya kuziceta zimvwili za mu mitwe yawo, waceta sunga ne zindevu zawo. Ne miwoko yawo yose wetemanjile. Na mu viwino vyawo wose wavwalile magunila.

³⁸ Ne cililo citandaye hanhu hose du mu matembe mucanyha, mu zikaya zose za Mowabu, sunga na mu zinzila zose. Hambi 'ne, nha nayitulanga Mowabu, yawa nha nyungu nhulanje, yono hamba yunji wo wose si koyenda kanyhi.

³⁹ Na mbeka Mowabu, yakondya kubenanjika! Holeka mulile! Hambi Mowabu nha yakozwa cevu. Nalu yawa matongo du, sunga ne makungugo gose gono gayipilime, alu geza kuyisekanga. Vyo nghutya, ane no Muwaha Mulungu.”

Mowabu yisina hono yokwiponezya

⁴⁰ U Muwaha Mulungu yehuwiza nha vyono, likungugo lyolokuza, nalyo lyologuluka nha 'ndi, no kugoloza mabawa gayo mucanyha ya Mowabu.

⁴¹ Ne makaya gayo hamonga ne magomawakali gayo golosolwa. Na mwi'zuwa lilyo i wasilikale wa Mowabu, wolokwinjilwa na woga wuwaha, nho mucekulu mono yali mu nghunga yo lusawo.

⁴² Nayo Mowabu yolokongomezezwa lukulu yilece kuwa nghungugo kanyhi, ku soko yo wuwula cihuliko ca kuli 'ne.

⁴³ Holeka woga, ne makweme, hamonga ne mitego, viwalindiye i wanhu wa Mowabu. Vyo nghutya, ane Muwaha Mulungu.

⁴⁴ No munhu wo wose mono kolojela yeponye so woga, yuyo kologwila mu makweme, nayo mono kolojela yewuse mu makweme, nayo yuyo, kologwila mu mitego. Hambi u Muwaha Mulungu, nha yakondya kuliwaga lizuwa lyo wongomele wa Mowabu.

⁴⁵ Nawo i watizizi, wono wasina vilungo, wolojela kulondola wutazi ku Heshiboni, likaya lyono u mutemi Sihoni yali yalitemile, ninga luno, lili mu malambi go moto. No moto wuwo wakondya kuzikongojeza zinhuzi za Mowabu hamonga ne vizuli vye matunda matali, ge wanhu wa Mowabu, wono wendile wulugu.

⁴⁶ Woyi hee kuli'nye nyo wanhu wa Mowabu! Nyo wanhu mono mwamuhembaga Cemoshi, alu mongomezwa. Ne wana wawo we cilume hamonga na we cicekulu, wose wasolwa nha wafungwa.

⁴⁷ Ninga hamba nhavivyo, u Muwaha Mulungu, koloyimotya kanyhi Mowabu mu vilo vyono vikuza. Na zizi zose, zo Muwaha Mulungu yalonga nha vyono si zoleka kuyiziza Mowabu.