Yelemiya 4 - Luganuzi Luswanu Kuli Wanhu Wose 2002

I wanhu wakucemwa wanene

¹ U Muwaha Mulungu yakutya nhavi, “Nye nyo wanhu wa Isilayeli, hono muwe mukusaka kumbuyila, ale heya mumbuyilaje. Na hono musace kuwa wehuwilwa kuli'ne, muwe kuviwusa ne vihwani vyenyu viseswe, vyono nane si nivyendile,

² ale, yowa viswanu kuli'nye mwilahizize mwi'tagwa lyangu. Na mu nzila yiyo i makungugo gose wosaka'ne, niwapele wulugutwe, nawo womhela lukumyo.”

³ U Muwaha Mulungu yakuwalonjela i wanhu wa Yuda na wa Yelusalemi, yakutya nhavi, “Ale, mulime luno i migunda yenyu yono yikali si nalimwa, mulece kuhadika mbeyu zenyu mu mamivya.

⁴ Mukamise i cilagane cenyu cono calagana nanye, ane no Muwaha Mulungu wenyu. Kanyhi mwiyilavye kuli'ne nyenye nyo weneco, anye nyo wanhu wa Yuda na Yelusalemi. Ninga hono mwijelele du, mulece kunoza nhavivyo, likuwo lyangu lyokwaka nha moto, ku soko ye metumo mabi gono mwetuma. Na kolo likuwo lyangu lyaka, hasina hamba yunji wo wose mono kosuma kulituza yaye.”

Wa Yuda wakogofywa no wulugu

⁵ Ale, mutowe zindulele mu yisi yose ya Yuda, muzoze muno muno. Muwalonjele i wanhu wa Yuda na Yelusalemi, watizize mu makaya gono gena magomawakali.

⁶ Mutyatye nzila yono yidomile ku Sayuni! Mutize, ho mwiponye, mulece kucela! Hambi u Muwaha Mulungu nha koleta magazo hamonga no wongomele wuwaha ku wulawa ku lubavu lwa kusumuka.

⁷ Hambi mono yapejigwe u mulimo wuwo wo kongomeza, nha yakondya kuwikanizwa, nayo yehwanile simba yono yikuza yikulawilila ha wihundiko wayo. Yakuza yayongomeze Yuda. Ne makaya gose ga Yuda gololekwa matongo, hasina hamba munhu monga mono kolokwikala mumo.

⁸ Holeka luno, muvwale magunila, mulile ko wusungu wuwaha. Ku soko vyono likuwo liwaha lyo Muwaha Mulungu, likali si nawaleka i wa Yuda.

⁹ Muwaha Mulungu yakutya nhavi, “Mwi'zuwa lilyo, i watemi, hamonga ne wetumami wawo, wolowula vilungo, i wakohani nawo, wolotinuswa, i wawizi nawo, wolocelewala.”

¹⁰ Nane nghamupitula nghatya, “Gwe go Muwaha Mulungu, alu wawakonga i wanhu wawa wa Yelusalemi! Hambi nha wawatya vyono holowa ho wuli mulamu du, ninga mumaje wolowa muwicilize ha mimelo yawo.”

¹¹ Na mu vilo vivyo, i wanhu wa Yelusalemi, wololonjelwa nha vyono, i mbeho yo moto yikuputa, yikulawa ku nyika yikuwaziza wene. Kanyhi hamba si mbeho du, yono yinha civulavumbi cono ciputaga du no kweza, aa ng'o.

¹² Langa yowa mbeho yono yikuziza mu wulajilize wo Muwaha Mulungu. Nayo yowa mbeho yono yili vilungo muno si nhe civulavumbi! Nayo yo Muwaha Mulungu du, mono kolavya ze ning'aniza kuli wanhu wakwe.

Yuda yikupilimwa ne walugu

¹³ Ale, wulanje ta, i walugu wakuza wenji muno wenha mavunde. Ne magali gawo go wulugu, gehwanile libeho lyono likupilima-pilima, sunga ne zifwalasi zawo, zikumangha musunho muno muno kuciza 'ndi. Woyi hee! Alu langa cajilila! Alu ho cawona wusungu!

¹⁴ Gwe Yelusalemi, kweme mabi gose gono gali mu nhumbula yako, ho wupone. Alu ho kojendelela kwihwesa makani mabi sunga nili?

¹⁵ Hambi lizi lye wanhu nha likuganula zinghani zimbi ku wulawa kwi 'kaya lya Dani, na mu matunda ga Efulayimu.

¹⁶ I wanhu wawo, waza kuwasugula we makungugo, no kuwalonjela wono wekaye mu Yelusalemi, nha vyono i walugu wakuza, wakulawa ku yisi yo kutali. Ne walugu wawo kolo wakuza, wologazozeza i makaya ga Yuda.

¹⁷ Woloyipilima Yelusalemi nha wanhu wono wawulindilize mugunda, hambi i wanhu wayo, nha wakondya kumbedegala ane no Muwaha Mulungu. Vyo yakutya u Muwaha Mulungu.

¹⁸ Nagwe Yuda, yo gwegwe mono wileteye zizi go mweneco, ku soko ye mikalile yako mibi, na ku soko ye makani gono wetuma. No wubi wako wo wukuleteye magazo gaga, nago gokucinya sunga mo mu nhumbula yako.

U wukalale wa Yelemiya, ku soko ye wanhu wakwe

¹⁹ Nye nghuwona wusungu si! Hamba si nosuma kuwukangalila yaye! Nye nhumbula yangu si! Nhumbula yangu, nha yatowa muno! Nane hamba si nosuma kunyamala yaye. Hambi nha nghuhulika mazi ge zindulele hamonga ne mazozo go wulugu.

²⁰ Ligazo ali likuza, hanyuma linji nalyo likutyatya, sunga ne yisi yose nhondo, yalekwa matongo du. Ne mahema getu gongomezwa musunho, ne mapaziya getu gademulwanga vitema vitema.

²¹ Alu, nojendelela kuwuwona wulugu wukali nhavivi sunga nili? Hamba nojendelela kuhulika mulilo we zindulele sunga nili lo!

²² U Muwaha Mulungu yakutya nhavi, “Wanhu wangu walele muno muno, hambi nha si wamanyile 'ne. Wehwanile i wana wadodo wono wasina mahala, kanyhi wasina hamba wizuce bwete. Langa wene wasugu du ku wituma zimbi, ninga ku wituma ziswanu, kwawafutila.”

Yelemiya yakugubulilwa zo wuze wo wongomele

²³ Nane nali neza kuyilanga yisi, nghayiwona yina wambuce du, nako ku wulanga kwali kusina wuzelu.

²⁴ Nali neza kulanga mu matunda, nghagawona matunda gakucicima, navyo vigongo vyazumhazumhaga du ako na ako.

²⁵ Nghawona vyono hali hasina wanhu, sunga ne zindeje zose zali zaguluka zatiza.

²⁶ Nayo yisi yono yina moso, yakondya kuwa nyika, ne makaya gayo gose gakondya kuwa matongo. Ku soko ye likuwo liwaha lyo Muwaha Mulungu.

²⁷ (U Muwaha Mulungu yali yalonga nha vyono yisi yose, yolowa mbago yose, ninga hamba nhavivyo, mwene hamba si koloyongomezeza lukulu yaye.)

²⁸ Yisi yololila, no wulanga wolotukuwala U Muwaha Mulungu vyo yakutya. Nayo hamba si kolowukawaniziza lukulu u wuhile wakwe. Mwene vyono yakondya kuzilonga, hodu yazilonga du, hamba si kokawaniza kanyhi wulonje wakwe.

²⁹ Ne wanhu wose wolotiza no kwiyagala ako na ako, ku soko ye lizozo lye wapanda fwalasi, ne waguma wupinde wanji wolotiziza ku mbago, na wanji wolobita mucanyha ye mabwe mawaha. Ne vikaya vyose vyololekwa visina wanhu, na holowa hasina hamba munhu monga mono kolokwinjila kanyhi yekale mumo.

³⁰ Woyi he kuli'gwe, 'gwe Yelusalemi! Alo nhawule wukwivwika vivwalo vye liwala lidunghu? Hamba nhawule wukwihamba no wihambo we zahabu no kwiyola mu meso gako ne lanji? Ninga wumanye nha vyono winozelezi wako wuwo, wowa nghani bwete du. Hambi i weyendi wako, nha wakondya kukubedegala, nalu wakusaka wakuwulaje.

³¹ Nane hulika cililo, kotya nha cililo ca munhu wa cicekulu, mono yali mu nghunga yo lusawo. Cililo cinha co mucekulu mono yakulela mwanagwe mulongozi. Kumbe cililo cico ca Yelusalemi, mono yakukapilicila ha wehele, akuno yalaze ne miwoko yakwe yakutya, “Woyi nye, aga magayo gangu! Hambi nhumbula yangu nha yikuzilika, hambi nha weza kuza wambulaje.”