Yelemiya 37 - Luganuzi Luswanu Kuli Wanhu Wose 2002

Zedekiya yakulomba wutazi kuli Yelemiya

¹ Nebukadineza u mutemi wa Babiloni, yakamutemya Zedekiya u mwana wa Yosiya, yawe mutemi wa Yuda, yakahalila hanhu ha Yehoyakimu u mwana wa Yehoyakimu.

² Ninga hamba nhavivyo, mwene Zedekiya ne wetumami wakwe, hamonga ne wanhu wose, si wazicelelela yaye zinghani zono u Muwaha Mulungu yanonjela.

³ Mutemi Zedekiya yakamutuma Yehukali u mwana wa Shelemiya, hamonga na Zefaniya mukohani, u mwana wa Maseya, waze wanonjele nimulombe Muwaha Mulungu, u Mulungu wetu, ku soko ye nghungugo yetu.

⁴ Na mu mapango gago, nali nghali si nawopwa mu jela yaye, nali nghali nghujenda-jenda du ako na ako muli wanhu.

⁵ Ne wasilikale we Wababiloni nawo, wali wakondya kuyipilima Yelusalemi. Ninga wali weza kuhulika nha vyono wasilikale we Wamisili wakuza, nawo wakondya kuwa behi no mupaka wa Misili, hodu wene Wababiloni wakawa kuwusa nghambi yawo behi na Yelusalemi.

⁶ Hanyuma ya zizo, u Muwaha Mulungu, u Mulungu wa Isilayeli yakanhuma

⁷ mbite nghamulonjele Zedekiya nimutye nhavi, “Alu 'gwe Zedekiya, i wasilikale we Cimisili, wakuza kukutaziliza, ninga hamba nhavivyo, wolowuya kanyhi kwawo.

⁸ Nawo i Wababiloni, wolokuza kanyhi walihome likaya lili, walisole, walipembele moto.

⁹ Holeka ane no Muwaha Mulungu, nghukusugula, nha vyono wulece kwikonga, wuwe kutya nha vyono, i Wababiloni si wokuza kanyhi. Ninga wumanye vyono wolokuza du.

¹⁰ Hamba wutye wuwasumilize lipuga lyose lye wasilikale we Cibabiloni, wasigale wasilikale wono wena zinghomele, nawo wawe wagonile du mu mahema gawo, wumanye vyono, wanhu wawo wo wolokwinuka hanyuma, walipembele moto likaya lili lyongomelele lukulu.”

Yelemiya yakwibatwa no kudindilwa mu jela

¹¹ I wasilikale we Cibabiloni, wayiwusa nghambi yawo behi na Yelusalemi, vyono i wasilikale we Cimisili wali wasejelela behi.

¹² Ale nane baho, hodu nghawa kuwuka mu Yelusalemi, nghawa kubita ku yisi ya Benyamini, ho nghasole ligawo lye mhuga yangu.

¹³ Ninga nali neza kufika ha mulango wa Benyamini, baho nghamwagana musilikale mulindilizi, mono yacemwaga litagwa lyakwe Iliya, u mwana wa Shelemiya, kanyhi mwizukulu wa Hananiya. Ale yuyo Iliya, yakawa kunyimya baho, yakanyitya “Alu 'gwe! Wukubita kwihanza ne Wababiloni.”

¹⁴ Nane nghamupitula nghatya, “Aa! Ng'o! Ane si nghubita kwihanza ne Wababiloni yaye.” Ninga hamba nhavivyo, yuyo Iliya, si yenda yahulicize yaye, langa yakanyibata yakawa kunhegula kuli wetumami.

¹⁵ Nawo i wetumami wakanghalipilanga muno, wakalajiliza nhowangwe, no kutajilwa mu jela, mu kaya ya Yonazani, u mwandici. Hambi nha yo wanoza yiwe yo jela.

¹⁶ Wakawa kumbika mu cinyumba ca mwi'kombo. Nane nghekala mumo vilo vinji.

¹⁷ Ninga hanyuma yayo, u mutemi Zedekiya, yakatuma wanhu waze wasole, wanhegule kuli mwene kwi 'kulu. Na kuko kwi'kulu, u mutemi yakambuza cinyele yakutya, “Wule, ho yili nghani yo yose yono yilawile kuli Muwaha Mulungu?” Nane nghamutya, “Heya ho yili. Agwe Zedekiya, kotajilwa mu miwoko yo mutemi wa Babiloni.”

¹⁸ Hanyuma nane nghamuwuza nghatya, “Alu mwene mutemi, wubici wono nghusutizye gwegwe, hamba i wetumami wako, hamba i wanhu wawa, wono wulecile sunga wunhajile mu jela?

¹⁹ Hamba wali hayi lu i wawizi wenyu wono wamuwililenyi wakutya vyono, mutemi wa Babiloni si kolokuza yakuhome yaye hamba kuyihoma yisi yiyi?

²⁰ Nalu wuhulicize 'gwe go mutemi. Ane nghukunena, wulece kungomoleza kanyhi ku jela, ku kaya ya Yonazani. Hambi hono wungomoleze kuko, ane mbeka nofwila kuko.”

²¹ Hodu baho, u mutemi yakawa kulajiliza nha vyono mbopwe mwi'kumbo lya mwi'kulu. Nane nekala baho, akuno nghupegwa mukate monga du nhondo zose, wono walawaga ku wateleka mikate, sunga mikate yose nhondo yikamalika mwi'kaya.