Yelemiya 33 - Luganuzi Luswanu Kuli Wanhu Wose 2002

U wihuwizo wunji kanyhi wo witumbilo

¹ Nane lono nali nghali mumo mu jela, mwi'kumbo lye Nyumba yo Mulungu, i nghani yo Muwaha Mulungu yikanyiziza kanyhi.

² U Muwaha Mulungu mono yawumba yinze, no kuyikamya, u Muwaha Mulungu lye 'tagwa lyakwe, yakanonjela yakatya,

³ “Wunyheme 'ne, nane nokupitula, nane nokulajila zinghani zimbaha, zono si wuzimanyile yaye.

⁴ Ane no Muwaha Mulungu, u Mulungu wa Isilayeli nghutya vyono, i zikaya za mu Yelusalemi, hamonga ne likaya lyo wutemi lya Yuda, vyose vyolomwagulwangwa, ciwe co citanjilo cazo co wupilimwe no wuhomwe wazo.

⁵ Wanji wolokwihoma ne Wababiloni, wono wolozimevya zinyumba ne mivimba ye wanhu, wono nolowawulajila nene mwi'kuwo lyangu. Nane nakondya kulileka likaya lili, ku soko ye makani mabi, gono wakwituma wanhu wayo.

⁶ “Ninga hamba nhavivyo, nololiponya likaya lili, hamonga ne wanhu wayo, no kuwaleka wekale ne miwili miswanu. Nane nolowalajila zo mulamu, na ze mikalile yono yipolile.

⁷ Kanyhi nolowamotya muno Yuda na Isilayeli. Kanyhi nolowazenga wawe nha vyono wali ha lulongozi.

⁸ Nolowakwema no wubi wawo wose wono wasutizya. Kanyhi nolowanenela u wubi wawo wose, hamonga no wubezi wawo.

⁹ Naho ha Yelusalemi, holowa wo mwamulizo wo wusangalale, ne cogopo, hamonga no lukumyo ku soko yangu. Ne makungugo gose ga mono'nze, golokwinjilwa no woga no kucicima, kolo gakuzihulika ziswanu zose zono nghuwatendela i wanhu wa Yelusalemi, hamonga no wumoteswe wono nghuliletela likaya.”

¹⁰ U Muwaha Mulungu yakutya nhavi, “I wanhu wakutya nha vyono, i hanhu baha heza nhe nyika, hono hasina cinhu cono colokwikala cumi mumo, wanhu hamba malimu. Na zizi, wakulonga mbeka, hambi mbeka vikaya vya Yuda hamonga ne zinzila za mu Yelusalemi, nha zisina mbeka wanhu hamba malimu wono wekaye mumo. Ninga hamba nhavivyo, kolosuma kanyhi kuhulika mumo,

¹¹ mazi ge nyemo, hamonga no wusangalale. Hamonga ne mazi nyemo ge zindigwa ze halusi. Kanyhi kolowahulika wanhu wakwimba lono wakulavya vilavywa vyo wulumbe mu Nyumba yangu. Wolowa kwimba wakutya nhavi, ‘Mulumbenyi Muwaha Mulungu u Mudaha vyose, hambi mwene nha muswanu no lusungu lwakwe lwa cibitilila.’ “Nane noloyimotya yisi yiyi, yiwe nha vyono yali sonje. Vyo nghutya, ane no Muwaha Mulungu.”

¹² U Muwaha Mulungu yakutya nhavi, “Na mu yisi yiyi, yono yihwanile nyika, hono ne wanhu hamba malimu si wekaye mumo yaye, ninga hanyuma, holowa kanyhi hanhu ha wudimilo, hono i wanhu wolowa kudimila kanyhi zingholo zawo.

¹³ Na mumo mu vikaya vya mu matunda, na mu mwalambalo we matunda, na mu yisi ya Yuda, ku lubavu lwa kutakama, na mu yisi yose ya Benyamini, na mu vitumbi vyose vyono vipilime Yelusalemi, sunga na mu vikaya vyose vya Yuda, mumo mose, molowa kanyhi hanhu hono wanhu wolowa kuziwalila zingholo zawo. Vyo nghutya, ane no Muwaha Mulungu.”

¹⁴ U Muwaha Mulungu yakutya, “I vilo vyolokuza vyono nolowufisiliziza wihuwizo wangu wono nawehuwiziza i wanhu wa Isilayeli na Yuda.

¹⁵ Na mu vilo vivyo, nolomuhagula mutemi we ling'ani, mu wulawa mu lulelo lwa Dawudi. No mutemi yuyo, kolo kwituma ze ling'ani na zo wiling'ano mu yisi yose.

¹⁶ Ne wanhu wose wa Yuda sunga na wa Yelusalemi, woloponywa no kwikala wapolile. Ne likaya lyolocemwa, ‘U Muwaha Mulungu yo ling'ani yetu.’

¹⁷ Nane no Muwaha Mulungu nghwihuwiza nha vyono, wa mu lulelo lwa Dawudi, yo kolojendelela vilo vyose kuwa mutemi wa Isilayeli,

¹⁸ na kanyhi wo lulelo lwa wo mulango wa Lawi, wawo du wo wolojendelela vilo vyose kuwa wo wakohani wono wonyitumila, hamonga no kundavizya vilavywa vinyanywe, ne vilavywa vyo wusaje, hamonga ne makumbiko.”

¹⁹ Kanyhi u Muwaha Mulungu yakanonjela yakatya,

²⁰ “Ane nha vyono nanoza cilagane cangu ce misi na ce cilo, ho viwe kwilecela mu mapango gayo, ne cilagane cico hamba si cilabeneka yaye.

²¹ Ale yo nhavivyo kanyhi, nakondya kunoza cilagane no mwitumami wangu Dawudi, nha vyono kolowa vilo vyose yena mwana mono kowa mutemi. Na kanyhi nghanoza cilagane na kuli wakohani wa mu lulelo lwa wo mulango wa Lawi, nha vyono wo weneco du, wo wojendelela kunyitumamila. Ne vilagane vivyo vyose hamba si vilabeneka yaye.

²² Kanyhi nolowonjeleza liwalo lya wo lulelo lwa Dawudi u mwitumami wangu, wawe wenji, hamonga ne liwalo lye wakohani wa mu lulelo lwa wo mulango wa Lawi, wawe wenji muno, sunga kuwe kukamu na ku wuwalwe, nha vyono zinha zinyelezi ku wulanga, hamba musawawa wa mwi'lenga.”

²³ U Muwaha Mulungu yakanonjela kanyhi yakatya,

²⁴ “Wule, wakondya kuwawona i wanhu wono wakutya, nha vyono ane nakondya kuwaleka i wanhu wa Isilayeli na Yuda, zimhuga zizi zinyejete zono nakondya kuzihagula? Na mu nzila yiyo, wakuwabedegala wanhu wangu, no kuwehweseza vyono si yikungugo kanyhi yaye.

²⁵ Ninga mumanye nha vyono ane no Muwaha Mulungu, yo nene mono nanoza cilagane cangu ce misi na ce cilo, kanyhi nghatemya no wulajilize wono wibate wulanga ne yinze.

²⁶ Holeka vyono mbeka netuma zizi, ale, nane nocikamisa cilagane cangu, cono nacinoza no lulelo lwa Yakobo no mwitumami wangu Dawudi. Kanyhi nolomuhagula yumonga wa mu lulelo lwa Dawudi, yateme mu lulelo lwa Abulahamu, na Isaka na Yakobo. Nane nolowa no lusungu kuli wanhu wangu, kanyhi nolowamotya muno.”