Yelemiya 32 - Luganuzi Luswanu Kuli Wanhu Wose 2002

Yelemiya yakuwugula mugunda

¹ U Muwaha Mulungu, yalongana nane kanyhi mu mwaka we likumi, wo wutemi wa Zedekiya u mutemi wa Yuda, wono wali wo mwaka we likumi na munana wo wutemi wa Nebukadineza u mutemi wa Babiloni.

² Na mu mapango gago, gali go mapango gono i wasilikale wo mutemi wa Babiloni, wayihomaga Yelusalemi. Nane nali ngalamiye kucanyha, mu wulawa mwi'kumbo lye nyumba yo wutemi, mono nali ndindiywe.

³ Hambi u mutemi Zedekiya, nha yali yandindila mumo, vyono 'ne nghuganula nghutya, u Muwaha Mulungu yakutya, “Ane no Muwaha Mulungu, nomuleka mutemi wa Babiloni, yaze yalisole likaya lili,

⁴ nayo u mutemi Zedekiya, si kololekwa yaye. Langa nayo kolotekwa nhavivyo, kolosolwa no mutemi wa Babiloni. Wolokwiwona nayo cagalanze, no kulongana nayo.

⁵ Nayo mutemi Zedekiya, kolosolwa yategulwe ku Babiloni, nayo kolowa kuko du sunga kono nene nilamukumbucilila. Hamba yaze yatye yehome ne Wababiloni, ninga hamba si kolowasuma yaye. Vyo nghutya ane no Muwaha Mulungu.”

⁶ Kanyhi u Muwaha Mulungu yakanonjela yakatya,

⁷ Hanameli u mwana wo sogwe mudodo wa Shalumu, konyiziza yanyitye vyono, niwugule mugunda wakwe, wono wuli ku Anatoti mu yisi ya Benyamini. Hambi 'ne nha yo nene du mono nili nduguye we behi, holeka yo nene du mono nina ling'ani yo kuwugula mugunda wuwo wuwe wangu.

⁸ Na lulolulo du baho, u Muwaha Mulungu yali yeza kukondya kulongana nane, nayo Hanameli yakawa kunyiziza mumo mwi'kumbo lye nyumba yo wutemi, nha vyono yanonjela Muwaha Mulungu, yakawa kunonjela nha vyono mwene yakusaka niwugule mugunda wakwe. Nane baho nghamanya nha vyono, mbeka nghani yiyi yilawa kuli Muwaha Mulungu.

⁹ Nane nghawa kuwugula mugunda wuwo kuli Hanameli u muhizi wangu. Nghawa kumujelela zipesa ze cifo cayo, zikafika fweza yikumi na mupunghati.

¹⁰ Nghandika litagwa lyangu mu kalatasi yo wuhomelezi wo wuguze, ha mwande ye wahomelezi, nghamupela ne zipesa ze cifo cayo.

¹¹ Nghayisola kalatasi yiyilya yo wugule, yono yali yina ne citanjilo, nha vyono winha u wulajilize no moto we 'si, hamonga ne lisiti yo kugulila.

¹² Nghamupela Baluku u mwana wa Neliya mwana wa Maseya ha meso ga Hanameli u muhizi wangu, na hali wahomelezi wawalya wono wandika matagwa gawo nha wuhomelezi wo wuguzi, ha meso ge Wayahudi wose wono wali wacehile baho he 'kumbo.

¹³ Nghamulajiliza Baluku hali wene, nghatya,

¹⁴ “U Muwaha Mulungu, we mihanga, u Mulungu wa Isilayeli, kalajiliza nha vyono, yo gwegwe mono wunojeye, wusole zikalatasi zizi zo wuhomelezi zose vyono nyejete, kalatasi yo wugule, yono yina ne citanjilo, hamonga na ayi yono si ndinde yaye, wuzitajile mu ciya ce lilongo, ho zikale mumo vilo vinji.

¹⁵ Hambi u Muwaha Mulungu we mihanga u Mulungu wa Isilayeli nha yakutya vyono, zikaya, ne migunda, hamonga ne migunda ye mizabibu, nha vyologulwa kanyhi mono yisi yiyi.”

U wulombe wa Yelemiya

¹⁶ Nane, nali neza kukondya kumupela Baluku, zikalatasi zizo, hodu, nghawa kumulomba Muwaha Mulungu nghatya,

¹⁷ “Gwe go Muwaha Mulungu, hambi nha yo gwegwe du mono wawumba wulanga ne yinze, kwe vilungo vyako na ko wusume wako. Hambi nha hasina nghani yinji yo yose nghamu hali 'gwe.

¹⁸ Hambi nha yo gwegwe, mono wukuwawonela lusungu wanhu, maelufu na maelufu, kanyhi yo gwegwe mono kuwalipicizaga i wanhu, ku soko yo wubi we walezi wawo. Hambi nha yo gwegwe du Muwaha, mono wuli Mulungu mono wulawiliciye. Kanyhi yo gwegwe mono wuli Mulungu, u Mudaha vyose u Mulungu we mihanga.

¹⁹ Hambi nha yo gwegwe du mono wina mahweso ge mahala, kanyhi kwitumaga metumo go wizine. Mono kuziwonaga calinze i zinghani zose, zono i wanhu wetumaga. Kanyhi kuwapelaga i wanhu, munhu mu nghango ye metumo gakwe.

²⁰ Hambi i katali, nha wetuma metumo mawaha go wizine ku yisi ya Misili, ninga sunga nalu, vyo wukali wujendeleye kugetuma du. Wukugetuma mu Isilayeli, sunga na mu makungugo ganji, holeka sunga nalu agwe wumanyice hanhu hose.

²¹ Na ku soko ye mapoto gako, hamonga ne metumo gako go wizine, gono gawogofya i walugu wetu, wetumamila vilungo vyako, wukawawusa i wanhu wako Isilayeli mu yisi ya Misili.

²² Wukawapela yisi yiyi, yono yina muhangha wono wina moso mwinji, nha vyono gwegwe wawehuwiza i walezi wawo.

²³ Ninga nawo wali weza kuza mono yisi yiyi, no kuyisola yiwe yawo, hamba si wasaka no kugebata ne malajilizo gako yaye, hamba kwikala mu mikalile ye mejizo gako ng'o. Hamba si wasuma kwituma nha vyono wali wuwalajilize wetume. Holeka nagwe luno wawaletela magayo gaga gose.

²⁴ “Sunga nalu, wulanje vyono Wababiloni wakondya kusita nghambi zawo, wapilime likaya, ho walihome no kulisola. Nawo wulugu ne nzala, hamonga ne matamwa, golinoza likaya lisolwe nawo. Kanyhi kosuma kuwona nha vyono, zose zono walonga, alu zakondya kuficilicila nha vyono walonga gwegwe.

²⁵ Ninga hamonga na zizo, yo gwegwe go Muwaha Mulungu, mono wanonjela nha vyono, yinojeye niwugule mugunda wa Hanameli ha meso ge wahomelezi, hamba yiwe luno, likaya lyeza kusolwa ne Wababiloni.”

²⁶ Nayo Muwaha Mulungu yakanonjela yakatya,

²⁷ “Ane yo nene Muwaha Mulungu, u Mulungu we wanhu wose. Holeka hasina nghani nghamu yono yonemela 'ne.

²⁸ Nalu wulanje! Nomupela Nebukadineza u mutemi wa Babiloni hamonga ne wasilikale wakwe likaya lili, walisole,

²⁹ walipembele moto. Wolikongoga hamonga ne zikaya zose, zono wanhu wakuzitumamila, so wufusa wuvumba kuli Baali, mu matembe mucanyha, hamonga no kuyilavizya milungu yinji vilavywa vye divayi.

³⁰ Ninga wumanye nha vyono, ku wulawilila katali na katali, i wanhu wa Isilayeli ne wanhu wa Yuda, si wanyendezaga 'ne hamba hadodo, kanyhi wakanghoza muno likuwo, ku soko ye metumo gawo mabi.

³¹ Ne wanhu we likaya lili, wekalaga wakunghoza likuwo ku wulawilila mwizuwa lyono lyazenjelwa. Holeka nane, nakondya kulamula nha vyono ciba nilyongomeze,

³² ku soko ye metumo mabi gose gono wetumaga i wanhu wa Isilayeli na Yuda, hamonga ne watemi wawo, ne walongola wawo, ne wakohani wawo, hamonga ne wawizi wawo.

³³ Hambi nha wakondya kundeka 'ne, hamba niwe neyoha muno kuwejiza, ninga wene hamba si wahuliciza 'ne yaye, hamba kwiyijiza kose.

³⁴ Ninga wene, ho wakacila kuwika vihwani vyawo vye cevu mu Nyumba yangu, yono yazengwa ku soko yo wuhembi wangu du. Na mu nzila yiyo, wakondya kuyavufya.

³⁵ Kanyhi wazenga vikumbicilo vya Baali, mwi'lolo lyo mwana wa Hinomu, no kuwalavya mumo makumbiko, i wana wawo we cilume na we cicekulu, kuli mulungu Moleki. Kumbe nane, si nawakombola wetume zizo. Na kanyhi hamba si nali nihwesize nha vyono wosuma kwituma nghani zono zinha zizo, no kuwanoza wanhu wa Yuda wetume wubi.”

Wihuwizo wo witumbilo

³⁶ U Muwaha Mulungu, u Mulungu wa Isilayeli, yakatya, “Gwe Yelemiya, i wanhu wakulonga nha vyono wulugu, ne nzala hamonga ne matamwa, gogoleka likaya lili lisolwe no mutemi wa Babiloni. Ninga wuhulicize zono nghulonga,

³⁷ Nowakongholeza wanhu wose, ku wulawa mu ma'si gose, kono naweyagaziza mwi'kuwo lyangu, niwagomole kanyhi hanhu baha, niwalece wekale bahano wapolile.

³⁸ Na wowa wanhu wangu, nane nowa Mulungu wawo.

³⁹ Nane nowapela wuhile wumonga, ho wanyogope nene vilo vyose, so ziswanu zawo, hamonga ne ziswanu ze wana wawo.

⁴⁰ Nolonoza nawo cilagane cipya. Hamba si nololecela lukulu kuwanozeza ziswanu. Nolowanoza wawe ne cogopo kuli'ne kwe nhumbula yawo yose, ho waze walece kanyhi kundeka.

⁴¹ Nane nolotuga nyemo ku soko yawo, nolowasikamya mono yisi yiyi, kanyhi nolowatendela ziswanu.

⁴² “Alu, nha vyono nakondya kuwaletela magayo gaga i wanhu wawa, nha vivyo vyo nowatendela ziswanu zose nha vyono nehuwiza.

⁴³ Wanhu wakutya vyono, yisi yiyi yolowa nyika, hawe hanhu hono wanhu hamba nimu, si vyolosuma kwikala mumo, holeka yolekwa yisolwe ne Wababiloni. Ninga wumanye, nha vyono, migunda yologulwa kanyhi mono yisi yiyi.

⁴⁴ Ne wanhu woloyigula, ne zikalatasi zo wuhomelezi zo wugule wazo, zolotajilwa vitanjilo no kwandikwa ne matagwa, hamonga no wuhomelezi. Na zizi, zolokwitumwa mu yisi ya Benyamini, na mu vitumbi vyose vyono vipilime Yelusalemi, na mu vikaya vya Yuda, sunga na mu vikaya vyose vya mu'si ye matunda, na mu mwalambalo we matunda, sunga na ku lubavu lwa kutakama lwa Yuda. Nolowagomola wanhu ku yisi yawo. Vyo nghutya, ane no Muwaha Mulungu.”