Biblia Todo Logo
Bìoball air-loidhne

- Sanasan -

Yelemiya 31 - Luganuzi Luswanu Kuli Wanhu Wose 2002


Wuwuye we wanhu wa Isilayeli ku yisi yawo

1 U Muwaha Mulungu yakutya nhavi, “I vilo vyolokuza, vyono ane nolowa Mulungu we zimhuga zose za Isilayeli, nawo wolowa wanhu wangu.

2 Nghawalajila zo lusungu lwangu mu nyika, i wanhu wono wapona mwi'fwa. Lono i wanhu wa Isilayeli wali wena nyhilu yo kuceha,

3 ane nghelajila kuli wene ku wulawilila cidaha. Nye nyo wanhu wa Isilayeli, ane nha nimwendilenyi du nhondo zose. Na ku soko yiyo, holeka njendeleye du kumulajilenyi zo lusungu lwangu kuli'nye.

4 Nane nomuzenjenyi 'nye lwe kejete kamonga du. Na kanyhi nanye mo Isilayeli mo waswanu! Lulo, molosola kamonga ne vigoma vyenyu muwe kuvina ko wusangalale.

5 Na kanyhi moloyihadika sunga ne mizabibu yenyu mu matunda ga Samaliya. Na wose wa muli nyenye wono woloyihadika, wolowa kulya mikalo yayo.

6 Na heya mbeka, i vilo vikuza, vyono i walindilizi, wolowa wakwicemeleza mu vitunda vya Efulayimu wakutya, ‘Alenyi cibite ku Sayuni, ko Muwaha Mulungu, u Mulungu wetu.’ ”

7 Nayo Muwaha Mulungu yakutya nhavi, “Alenyi nye nyo zinghungugo zimbaha, alu mwimbe ko wusangalale ku soko ya Isilayeli. Mwimbe u lwimbo lwenyu lo lukumyo, muwe kutya, ‘U Muwaha Mulungu kawaponya i wanhu wakwe, kawakomboza na wose wono wali wasigaye.’

8 Nane nowakongholeza ku wulawa ku lubavu lwa kusumuka, nowakonghola hamonga ku wulawa mu zimhelo zose ze yinze. Nawo wolokuzana ne wabofu na we vilema, ne wacekulu wono wena mida, hamonga sunga na wose wono wali mu nghunga yo lusawo. Nawo wolowuya kono kwawo nghungugo mbaha muno.

9 Nawo i wanhu wangu, wolowa kulila, akuno wakulomba, mu cipango cono ane nolowa niwalongoze. Nane nowatonga sunga ko ku vikolongo vye malenga, nolowakoza mu nzila yono yitelemeye, ho walece kwikobala yaye. Hambi ane, nha nihwanile sogo yo munhu kuli Isilayeli, nayo Efulayimu, nha yo mwanangu mulongozi kulelwa.”

10 U Muwaha Mulungu yakutya nhavi, “Nye nyo we zinghungugo, muhulicizaje ye, muziganule zinghani zangu, sunga ko ku vizingwa vyo kutali. Hambi 'ne, nha naweyagaza wanhu wangu, ninga luno nowakongholela wose hamonga. Niwakamise nha vyono mudimi kakamisaga litewa lyakwe.

11 Ane nawakomboza wanhu wa Isilayeli, no kuwaleka welecele, kanyhi nawaponya mu miwoko ye likungugo lyono lili vilungo muno.

12 Holeka nawo wonyiziza, wanyimbile so nyemo mwi'tunda lya Sayuni, kanyhi wendezwe ne vipegwa vyangu, i vipegwa vyo wusaje, ne divayi, hamonga ne mafuta, ne vipegwa vye zingholo ne zing'ombe. Na baho, wolowa nha busitani yono mwajilwe malenga. Nawo wolowa wakwizize vyose vyono wakuvisaka.

13 Hanyuma i wahinza wawa, wolokwidawala ko wusangalale. Nawo i wanhu wadodo ne wakombi, wose wolowa na wusangalale wuwaha muno. Nolowasindamika, no kucinoza cililo cawo yiwe nyemo. No wukalale wawo wuwe wusangalale.

14 Nane nolowalisa ndigwa swanu i wakohani, no kuwapela wanhu wangu, i visakwa vyawo vyose vyono wakuhila, sunga wawe waceye. Vyo nghutya, ane no Muwaha Mulungu.”


U lusungu lo Mulungu kuli Isilayeli

15 U Muwaha Mulungu yakutya nhavi, “Lizi lihulikwa ku Lama, lizi lye cililo co wusungu wuwaha muno, Laheli yakuwalilila wanagwe, si yakusaka hamba no kutuzwa yaye. Hambi wose nha wali kusina.

16 Ninga 'gwe Laheli, alu wulece kujendelela kulila, pate mahozi mu meso gako. Hambi u mulimo wono witumile kuli wanago, nha wotuga cihumbilizwa, hambi wene nha wowuya, ku wulawa ku yisi ye walugu.

17 Kanyhi, kowuli witumbilo ku vilo vyako vyo mudumo, ne wanago wolowuya ku yisi yawo weneco. Vyo nghutya, ane no Muwaha Mulungu.

18 “Kanyhi hulika i wanhu wa Isilayeli wakulonga ko wusungu wuwaha wakutya, ‘Gwe go Muwaha Mulungu, ase, cali cihwanile nhe ndama, yono si mbope no lufungo, ninga wacifunda ciwe ne cihuliko. Holeka luno, wucigomole kuli'gwe, nase nha ciwikanize cikuwuyile gwegwe du, go Muwaha Mulungu, go Mulungu wetu.

19 Heya mbeka, cali cakondya kukuleka, ninga aluno, cikusaka cikuwuyile mbela, hambi nha wakondya kucilipiciza, nase cinamizye i mitwe yetu ko wusungu wuwaha. Kanyhi cikuwona soni, no kukolwa cevu ciwaha ku soko yo wubi wetu, wono cetuma mu wuzelelo wetu.’

20 “Gwe Isilayeli, nha yo gwegwe go mwanangu, mono nghwendile muno muno. Na mu mapango go gose, lono nghulitambula litagwa lyako, nghuwa kukwihwesa ko wendo wuwaha muno. Ne nhumbula yangu yikugazika so gwegwe. Holeka nane nokuwonela lusungu.

21 Holeka anye nyo wanhu wa Isilayeli, mwiwicilaje citanjilo ce nzila, cimutonjenyi kanyhi mu nzila yono mwayileka. Alu wuyenyi kwenyu, mubite ku vikaya vyono mwali mwavileka.

22 Alo ho mokangamyanga sunga nili lo, anye nyo wanhu wo wihuwilo wucefu? Hambi 'ne, nha nawumba nghani yinji mhya mono'nze, yono yisimajiye, nha vyono u mucekulu yo komulondola u mulume.”


U wumoteswe wono wowatuga i wanhu wo Mulungu mu vilo vyono vikuza

23 U Muwaha Mulungu we mihanga, u Mulungu we Waisilayeli yakutya nhavi, “Kolo nghuwagomola i wanhu ku yisi yawo weneco, wolokwitumamila nghani yiyi mu yisi ya Yuda na mu vikaya vyayo, wawe kutya, ‘U Muwaha Mulungu yalilugutize litunda lyono lyelile lya Yelusalemi, i hanhu hono helile hono mwene yekaye.’

24 “Ne wanhu nawo, wolokwikala mu yisi ya Yuda, mu vikaya vyayo vyose, nawo wolowa kulima, hamonga no kudima mitugo zawo mumo.

25 Nane nolowasikamya wono wasoceye, no kuwegutya ndigwa, wose wono wali nzala.

26 Na mu mapango gago, i wanhu wolowa kutya, ‘Nye wayangu, ane ngona zinhongo muno muno, ninuka no muwili wangu wusangalaye.’

27 “Ne vilo vikuza, lono noloyimemya yisi yose ya Yuda na ya Isilayeli, wanhu wenji, hamonga ne mitugo minji.

28 Kanyhi yolowa nha vyono, mu nghango yono nali nanjiliye muno wene ho wakulwe, wagwiswe, wapondangwe, wongomezwe, hamonga no kutendelwa vibi, ale, yo nghango yiyo kanyhi, nolanjilila muno sunga wahadikwe, wazengwe.

29 Na kolo vilo vivyo vikuza, wanhu si wolojendelela kulonga kanyhi wawe kutya, ‘I wasogo zo munhu lono walizaga zabibu zi nghali, i meno ge wana gakafwa yitenene.’

30 Ninga hamba nhavivyo, u munhu wo wose mono kololya zabibu zi nghali, i meno gakwe golofwa yitenene. No munhu wo wose, kolofwa ku soko yo wubi wakwe mweneco.”

31 U Muwaha Mulungu yakutya nhavi, “I vilo vikuza, lono nolonozeza cilagane cipya ne wanhu wa Isilayeli, hamonga ne wanhu wa Yuda.

32 Ne cilagane cico, si colowa cihwanile ne cilagane ce katali yaye, cono nacinoza ne walezi wawo, lono nawakamisa, nghawawusa mu yisi ya Misili. Hamba niwe nali nili mulume wawo, ninga wene si wacikamisa yaye cilagane cico.

33 Ninga aluno, i cilagane cono nocinoza ne wanhu wa Isilayeli, cocino, Ane nolowutajila wulajilize wangu muli wene, niwandice mu zinhumbula zawo mugati. Nane nolowa Mulungu wawo, nawo wolowa wanhu wangu.

34 Na mu vilo vivyo, holowa hasina kanyhi yunji mono kolowa kumwijiza muyagwe yunji yakumutya yamumanye Muwaha Mulungu, hambi i wanhu wose nha wolowa wakondya kumanya 'ne, ku wulawilila i wadodo sunga ne wanhu mututu wose. Nane nolowanenela u wubi wawo wose. Kanyhi hamba si nilagakumbucilila lukulu i mabi gawo gose gono wetuma. Vyo nghutya, ane no Muwaha Mulungu.”

35 U Muwaha Mulungu, kawapelaga wanhu lizuwa ho liwamulicile wuzelu mu misi, nawo mwezi hamonga ne zinyelezi, zimulice mu mapango ge cilo. Yo mweneco mono kalitunhumyaga lilenga liwa kubuma, ne litagwa lyakwe kacemwaga u Muwaha Mulungu we mihanga.

36 Holeka yakutya nha vyono, i malajilizo gaga hono gawuce, ne likungugo lya Isilayeli nalyo lyoduma.

37 Na hono yijele mwizuwa linji, wulanga wusumice ku wijele, ne misinji ye yinze hono yisumice ku wulondolwa hasi no kuwonwa, nayo Mulungu kowalema i wanhu wa Isilayeli ku soko ya zizo zose zono wetuma. Vyo yakutya, u Muwaha Mulungu.

38 U Muwaha Mulungu yakutya nhavi, “I vilo vyolokuza, lono likaya lyangu lya Yelusalemi, lyolozengwa kanyhi, ku wulawilila ku munala wa Hananeli ku lubavu lwa kumwezi, sunga ko ku mulango wa ku nhuzi.

39 No mupaka wayo, wolojendelela ku wulawa kuko ku lubavu lwa kumwezi, sunga ko kwi'tunda lya Galebu, wupilime sunga ko ku Gowa.

40 Ne lilolo lyose lyono wazikaga mivimba, no kugamwaga mavu, ne migunda yose, sunga ko ku cikolongo ca Kidiloni, sunga ko ku nhuzi yo mulango we zifwalasi, ku lubavu lwa kucilima. Mumo mose, mosiwanulwa ku soko yangu. Ne likaya, si lyolokulwa kanyhi hamba kuhodangwa yaye.”

Cigogo Bible © Bible Society of Tanzania, 2002.

Bible Society of Tanzania
Lean sinn:



Sanasan