Yelemiya 25 - Luganuzi Luswanu Kuli Wanhu Wose 2002

I walugu wono wakulawa ku lubavu lwa kusumuka

¹ Na mu mwaka we kane, wa mu wutemi wa Yehoyakimu u mwana wa Yosiya, mu yisi ya Yuda, u Muwaha Mulungu yakanonjela za kuli wanhu wa Yuda. (No mwaka wuwu, wali wo mwaka mulongozi, wo wutemi wa Nebukadineza u mutemi wa Babiloni.)

² Nane nghawa kuwalonjela i wanhu wose we yisi ya Yuda na Yelusalemi nghawatya,

³ “Nye wayangu! Mumanyile nha vyono mu myaka yiyi yose makumi mejete ne 'datu, ku wulawilila mu mwaka we likumi ne 'datu wo mutemi Yosiya, u mwana wa Amoni, lono yali yatemile mu yisi ya Yuda, sunga mwi'zuwa lye zuwali u Muwaha Mulungu kanonjelaga zinghani zakwe, ho nimulonjelenyi nanye. Nane nghali si naleka hamba kamonga ku wulawa lulo, kumulonjelenyi zose zono yakuwa kunhuma nimulonjelenyi. Ninga 'nye, hamba si muzityatililaga yaye.

⁴ Holeka yikwijela nha vyono kumbe, hamba yiwe u Muwaha Mulungu, yajendelela kumutumilenyi i wetumami wakwe wawizi, ninga anye hamba si mwawahulika yaye.

⁵ Wene wawizi wakamulonjelenyi wakatya, ‘Ale, mupituce muzilece zinzila ze mikalile yenyu mibi, na mu wubi wenyu wono mwitumaga, ho musume kubita kwinjila no kwikala mu yisi, yono u Muwaha Mulungu yamupelenyi nyenye hamonga ne walezi wenyu, ho yiwe wuhazi wenyu we cibitilila.

⁶ Ne wawizi wawo wakamulonjelenyi kanyhi, nha vyono munojeye mulecele lukulu, kuyihemba, hamba kuyitumamila milungu yinji, hamba kumukoza likuwo u Muwaha Mulungu, so wuhemba vihwani vyenyu vyono mwisesese nyo weneco. Nanye lulo, hono mwali mumuhulice Muwaha Mulungu, nayo si yali yamulipicizenyi yaye.

⁷ Ninga u Muwaha Mulungu mweneco, yakutya nha vyono, anye si mwamuhulika ng'o, langa mukacila kumukoza likuwo, ku soko ye vihwani vyenyu viseswe. Na ku soko yiyo, mukeletela wulipicizwe nyenye nyo weneco.’

⁸ “Holeka vyono mukalema kumuhulika mwene, alu nayo u Muwaha Mulungu, we mihanga, yakutya nhavi,

⁹ ‘Mulanje, ta! Nane nowatuma i wanhu wo lubavu lwa kusumuka, hamonga no mwitumami wangu Nebukadineza, u mutemi wa Babiloni. Waze wayihome yisi ya Yuda, ne wekazi wayo wose, hamonga ne makungugo gose gono gayipilime. Nane nolyongomezeza lukulu likungugo lili, hamonga ne wekalani wayawo wose, niwalece mu wongomele we cibitilila, wawe cinhu co kogofya no kuhowelezwa, hamonga no wucelewazwe wuwaha. Vyo nghutya ane no Muwaha Mulungu.

¹⁰ Kanyhi nowawusiza lukulu ne mazi gawo go luseko, ne mazi gawo ge nyemo, hamonga ne zinyemo zawo ze zindigwa ze zi halusi. Kanyhi wolowa wasina hamba mafuta so zitala zawo, kanyhi holowa hasina hamba wuhemba yaye.

¹¹ Ne yisi yiyo yose, yololekwa nyhiwa hamonga no wucelewale. Nago i makungugo gono gapilime, golomwitumamila Nebukadineza u mutemi wa Babiloni, myaka makumi mupunghati.

¹² Ne myaka yiyo kolo yakondya kupuluta, nane noloyilipiciza Babiloni, hamonga no mutemi wayo, ku soko yo wubi wawo. Noloyongomezeza lukulu yisi yiyo, niyilece matongo cibitilila.

¹³ Noloyilipiciziza Babiloni mu magazo gose gono nagalonga katali, nha vyono nalonga na Yelemiya, nha vyono nologaleta magazo gago muli zinghungugo zose. Nha cinji, i magazo gose gono gandicigwe mu citabu cicino.

¹⁴ Nane nolowalipa i Wababiloni mu nghango ye metumo gawo. Ne makungugo menji, hamonga ne watemi wawaha, wolowanoza Wababiloni wawe wawanda wawo.’ ”

U Mulungu yakugaling'aniza makungugo

¹⁵ Hanyuma kanyhi, u Muwaha Mulungu yakanonjela yakatya, “Gwe Yelemiya, ahano hocili cikombe cono cimemile likuwo lyangu. Alu, wucisolaje, wubite naco kuli zinghungugo zose kono nokutuma, nagwe wuwang'wese cikombe cico.

¹⁶ Nawo kolo wakondya kucing'wa cikombe cico, wogala no kulelepa ku soko yo wulugu wono nowaletela.”

¹⁷ Ale, nane nghawa kucibocela cikombe cico mu mawoko go Muwaha Mulungu, nghawa kuwapela i makungugo gose, kono Muwaha Mulungu yanhuma, nawo wakacing'wa cikombe cico.

¹⁸ Nayo Yelusalemi ne makaya gose ge yisi ya Yuda, hamonga ne watemi wayo, ne walongola wayo, wose wakacing'wa cikombe cico, ho wanozwe wawe nyika no wizine, hamonga no wuhowelezwe. Ne wanhu walitumamila litagwa lyawo nha wulijitwe, nha vyono wanozaga.

¹⁹ Ali lye 'walo lya wanji wose wono wali wanojeye wacing'we cikombe cico. U mutemi wa Misili, ne wetumami wakwe, hamonga ne walongola wakwe.

²⁰ I wamisili wose, ne wajenzi wose wono wali mumo mu Misili. Hamonga ne watemi wose we yisi ya Uzi, ne watemi wose we makaya ge Wafilisiti na Ashikeloni na Gaza na Ekiloni, na wose wono wowa wasigaye wa mu Ashidodi.

²¹ Hamonga ne wanhu wose wa mu yisi ya Edomu, na Mowabu ne yisi ya Amoni.

²² Hamonga ne watemi wose we zi'si za Tulo na Sidoni, ne watemi wose we zi'si zono zipilime lilenga lya Meditelaneya.

²³ Hamonga ne makaya ga Dedani, na Tema, na Buzi, ne wanhu wose wono wenyonyolaga zimvwili zawo ziwa fupi.

²⁴ Hamonga ne watemi wose we yisi ya Alabiya, ne watemi wose we zimbeyu zose wono wekaye mu nyika.

²⁵ Hamonga ne watemi wose we zi'si za Zimuli, na Elamu, na Mediya.

²⁶ Hamonga ne watemi wose we zi'si zo lubavu lwe sumuka, ze behi na zono zili kutali, zowa kung'wa cikombe cico zikwilecela. Ne makungugo gose du gono gali mono'nze, gong'wa cikombe cico. Nayo mutemi wa Babiloni, ayo kolong'wa cikombe cico ku ndumilizo ya wose.

²⁷ Hanyuma kanyhi, u Muwaha Mulungu yakanonjela yakatya, “Ale, wuwalonjele wanhu, nha vyono ane no Muwaha Mulungu, we mihanga, u Mulungu wa Isilayeli, yo nene mono nghuwalajiliza wose wang'we wagale muno muno, sunga wadece, wagwe ho hasi, walece kusuma hamba no kwinuka kose, ku soko yo wulugu wono ane nowaletela.

²⁸ Na hono wejelele, waleme kucibocela cikombe cico mu mawoko gako, no kucing'wa, wuwalonjele nha vyono, u Muwaha Mulungu, we mihanga, vyo yalonjile nha vyono yiwanojeye wose wacing'we du cikombe cico.

²⁹ Nane nowanza u mulimo wangu wo kongomeza, nowanziza mwi'kaya lyangu no mweneco. Alo wene wakwihwesa nha vyono si wolipicizwa lo? Ng'o yaye, langa wolipicizwa du. Hambi 'ne, nha nowaletela wulugu i wanhu wose wono wali mono'nze. Vyo nghutya ane no Muwaha Mulungu, we Mihanga.

³⁰ “Gwe Yelemiya, yikunojeye wuziganule zose zono nghulonjeye. Wuwalonjele wanhu wawa zizi zose. U Muwaha Mulungu kokoloma ku wulawa ku wulanga, nayo kokwinula muno lizi lyakwe ku wulawa mu wikalo wakwe wono welile. Kolowakolomela wanhu wakwe, kolozoza nha munhu mono yakukanyaga zabibu. Ne wanhu wose wa mono'nze, wolomuhulika.

³¹ Ne lizi lyakwe lyolobocelela sunga ko ku zimhelo ze yinze. Hambi u Muwaha Mulungu, nha yakwisumaniza ne makungugo. Nayo kolowaleta wanhu wose ha wuling'anizwe, yawasole i wanhu wabi yawawulaje. Vyo yakutya u Muwaha Mulungu.”

³² U Muwaha Mulungu, we mihanga yakutya, wongomele wukuza, nawo wowa kwitananhiza muli makungugo gose limonga limonga. No mukukunzo muwaha wokwinulwa wulawa mu zimhelo ze 'nze.

³³ Na mwi'zuwa lilyo, i miwili ya wono wolowulagwa no Muwaha Mulungu, yolowa yiyagaye caka ku wulawilila ku mhelo ayino ye 'nze, sunga ko ku mhelo nzagwe. Na holowa hasina munhu wo wose mono kolowalilila, hamba si wolowuswa baho hono wowa wagwiye no kuzikwa yaye. Langa wolowa walabalaye baho hasi du, nhe malundo ge mboleya.

³⁴ Ale, mucenje lwanji, mulile anye nyo walongola, anye nyo wadimi we wanhu wangu. Mulile mwihindile muno muno! Mulile, mwigalagaze mu mavu. Hambi i vilo vyenyu vyo wuwulagwe wenyu, nha vyakondya kufika. Nanye mokasikwa nha nyama ya ngholo.

³⁵ Na mwi'zuwa lilyo, molowa musina hanhu ho hose hono molokwiponyezya.

³⁶ Holeka luno, mulile ko wusungu wuwaha muno, hambi u Muwaha Mulungu, so likuwo lyakwe, nha kakondya kulyongomeza likungugo lyenyu,

³⁷ no kuyileka yisi yenyu yo mulamu yeza matongo gose.

³⁸ U Muwaha Mulungu, yawaleka i wanhu wakwe, nha vyono simba yiyilekaga mhango yayo. Ne yisi yawo yakondya kuwa nyika ku soko ya wogofywe wuwaha wo wulugu, hamonga no wukali we likuwo lyo Muwaha Mulungu.