Yelemiya 23 - Luganuzi Luswanu Kuli Wanhu Wose 2002

U witumbilo wa mu vilo vyono vikuza

¹ Ninga u Muwaha Mulungu, kolowalipiciza wulipicizwe wuwaha muno, i walongola wono wakuwahodanga, no kuweyagaza wanhu wakwe!

² Azi zo yakulonga u Muwaha Mulungu, u Mulungu wa Isilayeli, kuli ze walongola wono wo wanojeye kuwadima wanhu wakwe, yakutya nhavi, “Alu lanje, hamba si mukuwadima wanhu wangu yaye, langa mwaweyagaza no kuwawinjila kutali. Holeka nane ku soko yiyo, nomulipicizenyi ku soko yo wubi wono mwetuma.

³ Nane nolowakongholeza i wanhu wangu wono wolowa wasigaye, ku wulawa mu ma'si gose kono nali niweyagazize, nolowagomola kanyhi ku yisi yawo weneco. Nawo wolotuga wana wenji, no konjelezeka muno liwalo lyawo.

⁴ Nane baho, nene no mweneco, nolowahagulila i walongola wawo wono wolowadima. Na mu vilo vivyo, i wanhu wolowa wekaye wasina woga hamba mutinu bwete. Nane hamba si nolowalipiciza kanyhi yaye. Vyo nghutya ane no Muwaha Mulungu.”

⁵ Alu u Muwaha Mulungu yakutya nhavi, “I vilo vikuza, vyono nene no mweneco, nolokwihagulila u mutemi we ling'ani mu wulawa mu lulelo lwa Dawudi. No mutemi yuyo kolotema kwe mahala, kanyhi kolowa kwituma ze ling'ani na zo mugoloka mu yisi yose.

⁶ No mutemi yuyo kolo yatema, i wanhu wa Yuda, wolowa wekaye wapolile. Hambi u mutemi yuyo nha kolocemwa, ‘U Muwaha Mulungu Muponyi wetu.’ ”

⁷ U Muwaha Mulungu yakutya nhavi, “I vilo vikuza lono i wanhu si wolowa kwilahiza mwi'tagwa lyangu, ane no Mulungu mumi, mono nawawusa wanhu wa Isilayeli mu yisi ya Misili.

⁸ Langa wolowa kwilahiza mwi'tagwa lyangu ane no Mulungu mumi, mono nawawusa wanhu wa Isilayeli ku wulawa mu yisi ya kulubavu lwa kusumuka, na mu ma'si ganji gose, kono nali niweyagazize. Nawo nhondo, ho wolokwikala mu yisi yawo weneco.”

I nghani ya Yelemiya kuli ze Wawizi wabi

⁹ Nye nhumbula yangu yapaya si, sunga nalu, neza kucicima. Neza nho munhu mono yagalile wujimbi, nho munhu mono yang'weye divayi nyinji muno, ku soko yo Muwaha Mulungu, na ku soko ye zinghani zakwe zono zelile.

¹⁰ Alu yisi yose yimemile i wanhu wono si wehuwilwa kuli Muwaha Mulungu, hambi wanhu nha wekaye mu mikalile yo wituma ze metumo mabi, ne vilungo wasoceye. Nalu yisi yikulila ku soko ye lilijito lyo Muwaha Mulungu, no wudimo wose wakondya kunyala.

¹¹ U Muwaha Mulungu yakutya, “Hambi i wawizi hamonga ne wakohani, wose, nha weza si wakumucelelela Mulungu, hambi nha nakondya kuwawona wakwituma zimbi mu Nyumba yangu.

¹² Holeka ku soko ya zizo, zinzila zawo zono wakolile, zolowa na cinhelezi hamonga ne citi. Nane nolowanoza wekobale, wagwe, nowaletela magazo mawaha, ne lizuwa lyo wulipicizwe wawo nha likuza. Vyo nghutya ane no Muwaha Mulungu.

¹³ Nane nakondya kuwuwona u wubi we wawizi wa ku Samaliya. Hambi nha wakulonjela mwi'tagwa lya Baali, nalu wakondya kuwasutizya i wanhu wangu.

¹⁴ Nghondya kuwawona sunga ne wawizi, wono wali mu Yelusalemi, nawo wakwituma vibi muno muno, hambi nha wakwituma zo wusenyha, akuno wakulonga zo wulambi, wakuwatonga wanhu ku wituma zimbi du. Na ku soko yiyo, holeka hasina hamba monga, mono yakusuma kuleka kwituma zimbi. Holeka ku lubavu lwangu, ane nghuwawona vyono wose wabi du, wehwanile ne wanhu wa Sodoma na Gomola.

¹⁵ “Holeka ku soko yiyo, nane no Muwaha Mulungu, we mihanga, nghuwalonjela i wawizi wa mu Yelusalemi, nghutya nhavi, Nowapela libici likali walye, hamonga ne sumu, waying'we. Hambi nha wakondya kuwutandaza wu wula kumucelelela Mulungu, mu yisi yose.”

¹⁶ Nayo u Muwaha Mulungu, we mihanga yakuwalonjela i wanhu wa mu Yelusalemi, yakutya nhavi, “Nye nyo wanhu wa mu Yelusalemi, mulece kuwahuliciza i wakohani, zono wakulonga ye. Hambi nha wakumupelenyi witumbilo wo wulambi. Wakumulonjelenyi ze zindoto zawo weneco du, ninga ane vyo sinonjile yaye.

¹⁷ Wene wakuwalonjela i wanhu wono wasina cihuliko kuli'ne, nha vyono zose zowawela swanu du. Na kanyhi wakuwalonjela wose wono wasina cihuliko, nha vyono magayo go gose si gowagana yaye.”

¹⁸ Nane nghatya nhavi, “Muli wawizi wawo wose, hasina hamba muwizi monga, mono yasuma kugamanya, i mahweso ge cinyele go Muwaha Mulungu. Kanyhi hasina hamba monga muli wene, mono yayihulika nghani yakwe, yakayizuka, hamba kuyimanya kose, hamba kwenda kuyihulika kose, hamba kucelelela kose, kuli zono Muwaha Mulungu yakuzilonga.

¹⁹ Ninga likuwo lyakwe lyo mukukunzo, lyono linha mbeho nghali, lyowaziza i wabi wose.

²⁰ Nalyo si lyowuka yaye, sunga yawe yakondya kuzifisiliza zose, zono yali kusaka kuzituma. Na mu vilo vivyo vyono vikuza, i wanhu wakwe nhondo, ho woloyimanyila lukulu nghani yiyi calinze.”

²¹ U Muwaha Mulungu yakutya nhavi, “Ane si nawatuma yaye i wawizi wawa, ninga wene wakabita. Hamba 'ne si nawalonjela nghani yangu yo yose ninga wene wakabita kulonjela mwi'tagwa lyangu.

²² Ninga mbeka hono wali wawe wagamanyile mahweso gangu ge cinyele, baho langa, ho wali wasume kuyiganula nghani yangu kuli wanhu wangu, no kuwanoza wasume kugaleka i metumo gawo mabi, gono wetumaga hamonga ne zinzila zawo zimbi.

²³ “Ane yo nene Mulungu mono nili hanhu hose, nane si nikalaga hanhu hamonga du yaye.

²⁴ No munhu wo wose hamba si kosuma kwihundika ha meso gangu, nane ho ndece kumuwona. Hamba si mumanyile yaye vyono ane nikaye hanhu hose, ku wulanga na mono 'nze?

²⁵ Nane nha nizimanyile zose zo wulambi zono i wawizi wawo wakulonjela mwi'tagwa lyangu, akuno wakutya ati, yo nene mono niwalonjeleye zinghani zangu mu zindoto.

²⁶ Alu mwene i wawizi wawa, ho wojendelela sunga nili no wulambi wawo, no kuwajiliza i wanhu wangu?

²⁷ Wene wakwihwesa nha vyono i zindoto zawo zono wakuzilonga, zosuma kuwanoza i wanhu wangu wasume kundeka 'ne, nha vyono, i walezi wawo wasemwa 'ne, wakawa kuhemba Baali.

²⁸ U muwizi mono yena zindoto, yalonje ze zindoto zakwe du. Nayo muwizi mono yena i nghani yangu, yayilongaje nghani yangu ko wihuwilwa. Alo mawaje gena cambuzici, ho wugehwanicize no wuhemba?

²⁹ Ninga i nghani yangu, yihwanile moto mukali, kanyhi yihwanile ne nyondo yono yitulangaga mabwe mawaha gawa vibwe vidodo dodo.

³⁰ Holeka ku soko yiyo, ane no Muwaha Mulungu nili mulugu we wawizi wawo, wono wakwiboka munhu na muyagwe zinghani zangu,

³¹ “Kanyhi ane nili mulugu wa wawo i wawizi, wono wakuganula zinghani zono zikulawa mu mahweso gawo weneco du, hanyuma wawa kutya vyono yo nene mono niwatumile.

³² Alu muhulicize ta, zono nghutya ane no Muwaha Mulungu! Ane mbeka, nili mulugu we wawizi wawo, wono wendile kulonga ze zindoto zawo, zono zimemile wulambi wose du. Hambi nha wakwitumamila zizo zindoto zawo, no kuwajiliza wanhu ku soko yo wulambi wawo, hamonga no widunhumuzi wawo. Ninga ane hamba si niwatumile yaye, hamba kuwalajiliza kose. Kanyhi wasina hamba nghani yo yose, yono yosuma kuwataza wanhu. Vyo nghutya ane no Muwaha Mulungu.”

U mutegulo wo Muwaha Mulungu

³³ U Muwaha Mulungu yakanonjela yakatya nhavi, “Gwe Yelemiya, hono munhu wo wose wa muli wanhu wangu yakuwuze, u muwizi, hamba mukohani, yawe kutya, ‘Alu wuli hayi u mutegulo wono u Muwaha Mulungu yakucidinghuza lo?’ Nagwe wuwalonjele wuwatye, ‘Anye nyo wanhu yo mweza muli mutegulo muwaha kuli Muwaha Mulungu, holeka nayo komutajilenyi lukulu.’

³⁴ Na hono munhu wo wose wa muli wanhu wangu, hamba muwizi, hamba mukohani, hono yetumamile nghani yo wutya, ‘U mutegulo wuli hayi wo Muwaha Mulungu.’ Nane nomulipiciza u munhu yuyo, hamonga na wa mu nyumba yakwe wose.

³⁵ Ninga langa, yiwanojeye wawe kwiwuza munhu ne weyendi wayagwe, hamba ne wanduguze wakutya, U Muwaha Mulungu kapitula katya nhawule, hamba kalonga nghanici?

³⁶ Ninga si yiwanojeye wajendelele kwitumamila zinghani zo wutya, ‘U mutegulo wo Muwaha Mulungu.’ Na hono munhu wo wose yejelele du yanoze nhavivyo, nane noyinoza nghani yangu mbeka yiwe mutegulo kuli munhu yuyo. Hambi i wanhu nha wakondya kuzileka zinghani zo Mulungu wawo, u Mulungu mumi, u Muwaha Mulungu, we mihanga.

³⁷ Holeka agwe Yelemiya, wuwawuzaje ta wawizi, wuwatye nhavi, ‘Munonjelaje ta, lipitulo lyono u Muwaha Mulungu yamupitulenyi? Hamba u Muwaha Mulungu kalonga katyaci?’

³⁸ Na hono walibedegale lilajilizo lyangu, no kujendelela ne nghani yiyo du yo wutya, ‘U mutegulo wo Muwaha Mulungu. Ale wuwalonjelaje wutye,

³⁹ vyono, ane nowasemwela lukulu, niwagumile kutali muno muno, i wanhu weneco, hamonga ne likaya lyono nali nawapela, hamonga ne walezi wawo.

⁴⁰ Nane nowaletela cevu ce cibitilila, hamonga no wubuganice wono wowa kukumbucilwa nhondo zose.’ ”