Yelemiya 21 - Luganuzi Luswanu Kuli Wanhu Wose 2002

U wugwe wa Yelusalemi wukuwilwa

¹ Zedekiya u mutemi wa Yuda, yakamutuma Pashuli u mwana wa Malikiya, hamonga no mukohani Zefaniya, u mwana wa Maseya, waze wanonjele nha vyono,

² “U mutemi Zedekiya yakutya, vyono, wucilombele ase kuli Muwaha Mulungu. Hambi Nebukadineza u mutemi wa Babiloni, hamonga ne lipuga lyakwe lye wasilikale, nha walipilima likaya yacihome. Lunji u Muwaha Mulungu, kosuma kucinozeza nghani monga yo wizine, yamuwinje Nebukadineza yacilece.”

³ Nayo Muwaha Mulungu yakalongana nane, baho nane nghawa kuwalonjela i wanhu wawalya, wono watumwa kuli'ne,

⁴ wabite wakamulonjele Zedekiya, zono u Muwaha Mulungu, u Mulungu wa Isilayeli yalonjile, katya, “Agwe Zedekiya, ane no mweneco, yo nokwihoma ne wasilikale wako, wono wakwihoma ne wasilikale wa Nebukadineza, u mutemi wa Babiloni, niwasume. Nokongholeza sunga ne vitwalo vyawo vyose, nivilundice haciligati ye likaya lya Yelusalemi.

⁵ Nane nokwihoma nagwe kwe vilungo vyangu vyose, na kwe likuwo lyangu liwaha, hamonga na ko wukali wangu wose.

⁶ Nane nowawulaga wose wono wekaye mumo mwi'kaya, i wanhu, hamonga ne zimitugo, vyose vyofwa ko wutamwa wubi muno.

⁷ Ninga agwe go mweneco, ne wetumami wako, hamonga ne wanhu wono wosigala, wono si wofwa ko wulugu, hamba nzala, hamba matamwa, anye wose nomulecenyi musolwe no mutemi Nebukadineza, hamonga ne wasilikale wakwe wono wali saka wakuwulaje. Nayo Nebukadineza kolokuwulaga 'gwe. Kanyhi hamba si kolosigaza munhu monga muli'nye. Hamba si kolomuwonelenyi lusungu, hamba ku munenelenyi yaye. Vyo nghutya, ane no Muwaha Mulungu.”

⁸ Kanyhi u Muwaha Mulungu, yakanonjela vyono niwalonjele i wanhu nitye nhavi, “Ale, nanye nyo wanhu, u Muwaha Mulungu yakutya nhavi, ane no Muwaha Mulungu, nghumuwicilenyi ha mwande yenyu nzila nyejete, ho musume kwihaga nyenye nyo weneco, nzila monga muli zizo zinyejete, nazo zozino Nzila yo Wumi, ne Nzila ye lifwa.

⁹ U munhu wo wose mono kokwikala mu muno mwi'kaya, ayo kowulagwa no wulugu hamba ne nzala, hamba ne litamwa. Langa mono kosuma kwilavya kuli Wababiloni wono wowa wakulihoma likaya, ayo yuyo si kowulagwa yaye, langa kokwiponya wumi wakwe.

¹⁰ Hambi 'ne nha nakondya kudumula nghani, nha vyono si nolileka yaye likaya lili, langa nolyongomeza du. Nolikombola lisolwe no mutemi wa Babiloni, yalipembele moto likongojele. Vyo nghutya ane no Muwaha Mulungu.”

U wuling'anizwe we nyumba yo wutemi wa Yuda

¹¹ U Muwaha Mulungu, yakanonjela, niwalonjele we nyumba yo wutemi wa Yuda, wo lulelo lwa Dawudi zinghani azi, nitye, “Ale, muhulicize zono ane no Muwaha Mulungu nghumutyenyi.

¹² Munojeye muwe kuling'aniza wuling'anizi we ling'ani nhondo zose. Kanyhi mweze kumutaziza munhu wo wose, mono yakukongwa-kongwa no kwiwonelwa no munhu yunji. Na hono mulece kwituma nhavivyo, u wubi wono mukwituma, wonghoza likuwo 'ne, nalyo lyokwaka nha moto, wono si wosumika no kuzimywa yaye.

¹³ Nagwe Yelusalemi, mono wikaye wijeye hacanyha ye malolo, mono wihwanile nhe litalawe lyono lilawiliciye mu yisi yo wuhihi. Agwe mono wukwiyitya, nha vyono hasina munhu wo wose mono kokuhoma, hamba kugakumula magomawakali gako.

¹⁴ Ninga 'ne nokuhoma nghulipicize, ku soko ye metumo gako. Nolipembela moto, likaya lyako lyo wutemi, nivikongojeze ne vinhu vyose vyono vilipilime. Vyo nghutya ane no Muwaha Mulungu.”