Yelemiya 1 - Luganuzi Luswanu Kuli Wanhu Wose 2002

¹ Citabu cici ca Yelemiya, cikulolosa zinghani zono zalongwa na Yelemiya u mwana wa Hilikiya, u muyagwe ne wakohani we cikaya ca Anatoti, ca mu yisi ya Benyamini.

² Muwaha Mulungu yalonga na Yelemiya mu mwaka we likumi ne 'datu, wa mu wuteme wa Yosiya, u mwana wa Amoni, lono yali mutemi wa Yuda.

³ Muwaha Mulungu yalonga kanyhi na Yelemiya mu vilo vya Yehoyakimu mwana wa Yosiya lono yali mutemi. Na ku wulawa mu vilo vivyo, Muwaha Mulungu yakajendelela du kulongana na Yelemiya kenji na kenji, sunga mu mwaka we likumi na monga wa mu wutemi wa Zedekiya u mwana wa Yosiya. Mu mwezi we 'hano wa mu mwaka wono i wanhu wa Yelusalemi wahamizwa no kutegulwa ku Babiloni.

U lucemo lwa Yelemiya yawe muwizi

⁴ Muwaha Mulungu yakanonjela yakatya nhavi,

⁵ “Ane nali nakondya kukuhagula, na lono nali nghali hamba kukuwumifya kose. Na lono wali wukali hamba nalelwa, ane nali nakondya kukusiwanula wuwe muwizi kuli makungugo.”

⁶ Nane nghamupitula nghatya, “Gwe go Muwaha Mulungu, ane nha si manyile lu kulonga, nha nghali nili mudodo muno.”

⁷ Ninga nayo Muwaha Mulungu yakamhitula yakatya, “Gwe Yelemiya, wulece kutya vyono agwe wukali mudodo, langa wubite du kuli wanhu kono nghukutuma, wukawalonjele zinghani zose zono nghukulajiliza wukazilonje.

⁸ Holeka wulece kuwogopa i wanhu wawo, hambi ane nha nowa hamonga nagwe ho nghudime. Vyo nghutya ane no Muwaha Mulungu.”

⁹ Hanyuma ya zizo, u Muwaha Mulungu yakawugolola muwoko wakwe, yakamhamiza mu mulomo wangu, yakanyitya, “Langa ta, alu, nghukutajila zinghani zangu mu mulomo wako zono kosuma kuzilonga.

¹⁰ Nane i zuwali, nghukupela wulajilize kuli makungugo, hamonga ne matemi gose. Ho wusume kukula, no kumwagula, no kongomeza, hamonga no kuhodanga, ho wuzenje no kuhadika.”

U wugubulilwe we hejete

¹¹ Hanyuma ya zizo, u Muwaha Mulungu yakambuza yakutya, “Gwe Yelemiya, wukuwona cici?” Nane nghamupitula nghatya, “Ane, nghuwona cinhambi co mubici wo mulozi.”

¹² Nayo Muwaha Mulungu yakanyitya, “Heya kulonga mbeka, holeka nane nindilize sunga nghani yangu yifisilizwe.”

¹³ Hanyuma ya zizi, u Muwaha Mulungu yakanonjela kanyhi yakatya, “Gwe Yelemiya, wule, wukuwona cici kanyhi?” Nane nghamupitula nghatya, “Gwe Muwaha Mulungu, ane, nghuwona nyungu ku lubavu lwa kusumuka, yono yina malenga gono gakuhemula, no mulomo wayo, wulanjile kukuno.”

¹⁴ Nayo Muwaha Mulungu yakanyitya, “Ale, wongomele wolawilila ku lubavu lwa kusumuka, wuwongomeze i wanhu wose, wono wekaye mu yisi yiyi.

¹⁵ Hambi 'ne, nha nogacema i makungugo gose, gono gekalaga ku lubavu lwa kusumuka, gaze. Ne watemi wawo, wologasimya i magoda gawo go wutemi, mu malango ga Yelusalemi, no kwidoma ne majinji gayo gose, mbavu zose. Hamonga no kugapilima i makaya gose ga Yuda.

¹⁶ Nane, nowalipiciza i wanhu wangu, ku soko yo wubi wawo wono wetuma. Hambi nha wandeka 'ne, wakawa kuyilavizya makumbiko, i milungu yinji, kanyhi wakenozeza ne vihwani viseswe, no kuvihemba.

¹⁷ Holeka, aluno wiwikanizaje 'gwe Yelemiya, wubite wukawalonjele zinghani zose, zono ane nghukulajiliza wukazilonje. Ninga luno, wulecele lukulu kuwogopa. Na hono wuwogope, nane nokunoza wucile kuwogopa lono wuli hali wene.

¹⁸ Ninga wuhulicize Yelemiya! I wanhu wose wa mono yisi yiyi, nha cinji, i watemi, ne wawaha we wanhu, ne wakohani, hamonga ne wanhu wose wokugaluka. Ninga nane izuwali, nghukupela i vilungo vyo kulewana nawo. Nagwe kokwihwana ne likaya lyono lina magomawakali, ne lisumbili lye cuma, ne lijinji lya shaba.

¹⁹ Holeka wene wolewana nagwe, ninga si wokusumila lukulu. Hambi ane nha nowa nili hamonga nagwe ho nghudime. Vyo nghutya ane no Muwaha Mulungu.”