Wuwale 24 - Luganuzi Luswanu Kuli Wanhu Wose 2002

¹ Nhondo nayo Balamu yakawa yamanya vyono Muwaha Mulungu, yamusakaga yawalugutize i Waisilayeli. Holeka si yabita kanyhi kuwulondola mhande nha ha lulongozi. Langa hobaho du yakawa kubita ku nyika.

² Yakawagana kuko i wanhu Waisilayeli wasitile nghambi, mulango na nghambi yawo. U Muhe wo Mulungu yakawa kumutonga,

³ yakawa kuwila yakutya, “Azi zo nghani zono yakulonga Balamu u mwana wa Beyoli. Zo nghani zo munhu mono yakuziwona calinze.

⁴ U munhu mono yakusuma kuzihulika zono Mulungu yakuzilonga. Nane ko wulanje du, nghusuma kuciwona citanjilo wugubulilwe wono wukulawa kuli Muwaha Mulungu, U Mudaha Vyose

⁵ Ne mahema ge Waisilayeli, Ka! Nye! Maswanu si!

⁶ Genha kotya micilili mitali ye mitende Hamba kotya nha busitani zono zili ha nhumbi ye likolongo. Genha kotya wudi wono wuhadikwe no Muwaha Mulungu. Hamba kotya nha mihagata yono yili behi ne malenga.

⁷ Nawo wotuga mvula mbaha muno muno. Wohadika ne zimbeyu zawo mu migunda yono yitonyeywe malenga menji muno. No mutemi wawo kowa yena lilumbo yiwaha muno si nha Agagi. No wutemi wakwe wotandala, wusole yisi nyinji.

⁸ Mulungu yo yawawusa mu yisi ya Misili. Nayo yakuwalewanila muno, yehwanile nghambaku ya mu mbago. Nawo wowongomeza i walugu wawo wose. Wowatijinha mafupa gawo no kuzibenanjiza zisonga zawo.

⁹ Ne likungugo lilino, lili vilungo muno muno lihwanile simba. Nalyo hono lyagona, hasina kanyhi mono kokwijelela yalisinhuse. No munhu wo wose mono komulugutiza Isilayeli, u munhu yuyo nayo kolugutizwa. No munhu wo wose mono kumulijitiza Isilayeli, u munhu yuyo nayo kolijitwa.”

¹⁰ Hobaho Balaki yakawa kumukolelwa likuwo yiwaha muno muno Balamu. Yakawa kuzifumbata zi ngumi ze miwoko yakwe kwe 'kuwo, yakawa kumulonjela Balamu yakutya, “Agwe Balamu, ane nakucema ho wuze wuwalijite wawo walugu wangu, ninga alu zawa nghanghulo yidatu, agwe wukuwalugutiza, hamba si wukuwalijita ng'o.

¹¹ Hodu lu wuwuce na baha, wuwuye kwenyu! Ane nali nehuwiza nha vyono nokupela cihumbilizwa, ninga alu Muwaha Mulungu yakwimila ho wulece kucituga.”

¹² Nayo Balamu yakamupitula yakatya, “Mwene 'gwe Balaki, alo siwukumbuciye vyono nawalonjela i wanhu wono wanhumila, nghatya,

¹³ hamba wumhele fweza yako yose, hamonga ne zahabu yako yose yono yili mwi'kulu lyako, ane si nolumbila lukulu kubena lilajilizo lyo Muwaha Mulungu, so wituma cinji cocose cono cili cambuzi kuli'ne. Kanyhi na vyono ane nolonga zono Muwaha Mulungu yakunonjela, zizo zo nolonga du?”

Wuwile we ndumilizo wa Balamu

¹⁴ Hanyuma kanyhi Balamu yakawa kumulonjela Balaki yakutya, “Alu ane neza kuwuya kwetu kuli wanhu wangu. Ninga lono nghali sinatuluka, nghukusugula no kukumanyiza, ze Waisilayeli, vyono wolowatendela i wanhu wako mu vilo vyono vikuza.”

¹⁵ Hobaho Balamu yakawa kuwila yakutya, “Azi zo nghani zono yakulonga Balamu, u mwana wa Beyoli, zo nghani zo munhu mono yakuziwona calinze.

¹⁶ U munhu mono yakusuma kuzihulika zono Mulungu yakuzilonga. Kanyhi mono yakusuma kulibocela sunga ne lihala lyono likulawa kuli Muwaha Mulungu Mono Yalawiliciye. Nane ko wulanje du, nghusuma kuciwona citanjilo. Wugubulilwe wono wukulawa kuli Muwaha Mulungu U Mudaha Vyose.

¹⁷ Nane nghuziwona za ku mwande, Kanyhi nghuliwona likungugo lye Waisilayeli. No mutemi mono yakung'alala nha nyelezi, Kolokwijela ku wulawa mwi'kungugo lilyo. Kolokuza ku wulawa mwi'kungugo lye Waisilayeli yenha nyelezi yo mucila. Kolowatowanga i walongola we Wamowabi, Kanyhi kolowasuma i wanhu wose wa Seti.

¹⁸ Nayo kolowasuma i walugu wakwe wose wono wekaye ku Edomu. Kanyhi koyisola ne yisi yawo yiwe yakwe. Lono Waisilayeli wakujendelela kuwa no wusume.

¹⁹ Likungugo lye Waisilayeli, lyolowasumila lukulu. No kuwongomezeza lukulu na wono wowa wakali wasigaye wose.”

²⁰ Na mu wugubulilwe wuwo, Balamu kanyhi yakawawona Waamaleki. Hobaho yakawa kuwila yakutya, “Ati mulanje, wawa Waamaleki, lyali lyo likungugo lyono lyali lili vilungo muno kuciza wose. Ninga ku ndumilizo, lyolokwajililila lukulu.”

²¹ Na mu wugubulilwe wuwo kanyhi, yakawawona i Wakeni, nayo yakawawilila yakutya, “I hanhu hono mwikaye, ho hanhu hono hapolile, Hasina vitamisi, hehwanile ne linhuli lyono yitumbice mucanyha ye vizuli vye mabwe,

²² Ninga hamba nhavivyo, anye mo Wakeni, molokongomezezwa lukulu, Kolo Waashuli wakumusolenyi mateka.”

²³ Hanyuma ya zizo, Balamu kanyhi yakawila yakutya, “Alo wawa wo wanhuci wono wekongholeye hamonga kono lubavu lwe sumuka?

²⁴ Ninga i wanhu we cibano, wolokuziza mwi'lenga wakulawa Kupulo. Nawo woloyisumiza Ashuli hamonga na Ebeli. Ninga nawo wongomele wawo we cibitilila wolowaziza.”

²⁵ Balamu yali yeza kukondya kuzilonga zizo, nhondo ho yakawa kutuluka yakawa kuwuya kwawo. Nayo Balaki yakawa kubita ne zakwe.