Wuwale 1 - Luganuzi Luswanu Kuli Wanhu Wose 2002

Wuwalwe wulongozi we Waisilayeli

¹ Mwi'zuwa lilongozi lya mu mwezi we kejete, wa mu mwaka we kejete, ku wulawa lizuwa lyono Waisilayeli wawucila ku Misili, Muwaha Mulungu yakalongana na Musa, mwi 'Hema lyakwe lyono Lyelile, lono yali yali mu nyika ya Sinayi. Muwaha Mulungu yalonga yakatya,

² “Agwe Musa hamonga na Haluni, muwawale wanhu wose wa Isilayeli mu nghango vyono wenha mu milango yawo na mu mhuga zawo. Mwandice matagwa ge we cilume wose, wono waficile myaka makumi mejete,

³ no kuciza wono mowona wakwiliye kwinjila mu mulimo wo wusilikale wo kwihoma ku wulugu.

⁴ Agwe na Haluni, muwalombaje walongola monga monga, mu wulawa mu milango yose ye Waisilayeli, nawo wawo wo womutazenyi mu mulimo wuwo.”

⁵ Na agano go matagwa ge walongola wa mu milango yawo; wono mokwitaziliza nawo mu mulimo wuwo. Wo mulango wa Lubeni, umulongola yo Elizuli mwana wa Shedewuli.

⁶ Wo mulango wa Simiyoni, u mulongola yo Shelumiyeli mwana wa Zulishadayi.

⁷ Wo mulango wa Yuda, u mulongola yo Nashoni mwana wa Abinadabu.

⁸ Wo mulango wa Isakali, u mulongola yo Nataneli mwana wa Zuwali.

⁹ Wo mulango wa Zabuloni, u mulongola yo Eliyabi, mwana wa Heloni.

¹⁰ Wo mulango wa Efulayimu, u mulongola yo Elishama mwana wa Amihudi.

¹¹ Wo mulango wa Benyamini, u mulongola yo Abidani mwana wa Gidiyoni.

¹² Wo mulango wa Dani, u mulongola yo Ahiyezeli, mwana wa Amishadayi.

¹³ Wo mulango wa Asheli, u mulongola yo Pagiyeli mwana wa Ocilani.

¹⁴ Wo mulango wa Gadi, u mulongola yo Eliyasafu, mwana wa Dewuyeli.

¹⁵ Wo mulango wa Nafutali, u mulongola yo Ahila mwana wa Enani.

¹⁶ Awa wo wacemwa mu wulawa mu zimhuga zose, ze milango yose ye wasogo zawo, ho wawe walongola wa mu milimo yawo.

¹⁷ Ne wanhu wawa we cilume we likumi na wejete, wakawataza muno Musa na Haluni.

¹⁸ Wakawakongholela hamonga mhuga yose ya Waisilayeli, mwi'zuwa lilongozi lyo mwezi we kejete. Wakawa kuwandika Waisilayeli wose, mu nghango vyono wenha mu milango yawo, na mu mhuga zawo. Wakawandika we cilume wose wono waficile myaka makumi mejete, hamonga na wose wono wena myaka yono yicizize yiyo, wakandikwa no kuwalwa liwalo lyawo,

¹⁹ nha vyono Muwaha Mulungu yali yalajilize. Musa yakawawala wanhu no kuwandika, lono yali yali mwi 'nyika lya Sinayi.

²⁰ Nawo i wanhu we cilume wose wono wali we lizika lya myaka makumi mejete hamba kuciza, wono wawonwa wakwiliye kwinjila mu mulimo wo wusilikale wo kwihoma ku wulugu, wose matagwa gawo gakandikwa, mu nghango vyono wenha mu milango yawo na mu mhuga zawo, wakamulilwa we mhuga ya Lubeni u mwana wa Yakobo, u mulongozi kulelwa. Ne liwalo lyawo lyoli:

²¹ Wo mulango wa Lubeni, wali waficile elufu makumi mane na mutandatu, na magana mahano.

²² Wo mulango wa Simiyoni, wali waficile

²³ elufu makumi mahano ne cenda, na magana madatu.

²⁴ Wo mulango wa Gadi, wali waficile,

²⁵ elufu makumi mane ne 'hano, na magana mutandatu na makumi mahano.

²⁶ Wo mulango wa Yuda, wali waficile,

²⁷ elufu makumi mupunghati na yine, na magana mutandatu.

²⁸ Wo mulango wa Isakali, wali waficile

²⁹ elufu makumi mahano na yine, na magana mane.

³⁰ Wo mulango wa Zabuloni, wali waficile,

³¹ elufu makumi mahano na mupunghati, na magana mane.

³² Wo mulango wa Yusufu, wo wana wa Efulayimu, wali waficile,

³³ elufu makumi mane na magana mahano.

³⁴ Wo mulango wa Manase, wali waficile

³⁵ elufu makumi madatu na nyejete na magana mejete.

³⁶ Wo mulango wa Benyamini, wali waficile,

³⁷ elufu makumi mutandatu ne 'hano, na magana mane.

³⁸ Wo mulango wa Dani, wali waficile,

³⁹ elufu makumi madatu na nyejete, na magana mupunghati.

⁴⁰ Wo mulango wa Asheli, wali waficile,

⁴¹ elufu makumi mane na monga na magana mahano.

⁴² Wo mulango wa Nafutali, wali waficile,

⁴³ elufu makumi mahano na yidatu, na magana mane.

⁴⁴ Ne liwalo lyawo wose hamonga wali waficile

⁴⁵ wanhu elufu magana mutandatu na yidatu,

⁴⁶ na magana mahano, na makumi mahano.

⁴⁷ Na mwi'walo lilino, Walawi si wawalilizwa yaye wahanzwe na we milango yinji.

⁴⁸ Hambi Muwaha Mulungu nha yamulonjela Musa vyono,

⁴⁹ lono weza kuwawala wanhu wono wokwila kwinjila mu mulimo wo wusilikale, wulece kuwenjiza wo mulango wa Lawi mu mulimo wuwo.

⁵⁰ Langa wene Walawi, wawikaje wawe walanjilizi du we Lihema lyangu lyono Lyelile, hamonga ne vitumamilwa vyayo vyose vyono vili mumo. Wawe kwitumama mumo mugati, kanyhi wakome mahema gawo walipilime Lihema lyono Lyelile.

⁵¹ Na mu cipango co cose lono mweza kuyihamya nghambi yenyu, wawo Walawi wowa wo mulimo wawo kulimwagula Lihema. Kanyhi wo weneco du wono wowa kulikoma Lihema lyono Lyelile kolo mwafika hanhu hono moyisimya nghambi yenyu. Kanyhi mulanjilile, hono munhu wo wose yejelele yasejelele behi ne Lihema lyono Lyelile, munhu yuyo yawulagwe.

⁵² Ne Waisilayeli nawo, mulimo wawo wowa kukoma mahema gawo vibuto vibuto, munhu na mhuga yakwe, munhu na bendela yakwe.

⁵³ Ninga Walawi wanojeye wakome mahema gawo gapilime Lihema ho wasume kulidima, munhu wo wose ho yalece kulisejelela Lihema no kunghoza likuwo, nane niwatowe mhuga ya Isilayeli.

⁵⁴ Nawo wanhu Waisilayeli wakanoza nha vyono Muwaha Mulungu yamulajiliza Musa.