Wutuluce 18 - Luganuzi Luswanu Kuli Wanhu Wose 2002

Yetelo yakubita kumuwona Musa

¹ Nayo Yetelo u mukohani wa Midiyani, u mukwewe wa Musa, yakazihulika zinghani zose zono Muwaha Mulungu yawatendela Musa hamonga ne Waisilayeli, lono yawawusiza mu yisi ya Misili.

² Yetelo yakamubitila Musa yakamuteguliza na Zipola mugolece wa Musa, vyono yali yakali yasigaye ku nyuma ko sogwe Yetelo.

³ Nayo Zipola yakawa yena hamonga ne wanagwe wejete, u mulongozi yacemwaga litagwa lyakwe Gelishomu. Hambi Musa nha yamucemela litagwa lili yakutuniliza yakutya, “Nali nili mutizizi mu yisi njenzi.”

⁴ Ne litagwa lyo mwanagwe we kejete, yacemwaga Eliyeza, hambi nha yatunilizaga yakutya, “Mulungu wa baba, yo yamhonizye, ho ndece kuwulagwa na Falawo.”

⁵ Nayo Yetelo mukwewe wa Musa, yakaza kuli Musa yena na Zipola mwanagwe we cicekulu, u mugolece wa Musa, hamonga ne wanagwe. Yakamwagana Musa kuko ku nyika kono yali yasitile nghambi he'tunda lyono lyelile.

⁶ Nayo Musa yali yeza kulonjelwa nha vyono mukwewo, no mugolece wako, hamonga ne wanago wejete wakuza,

⁷ hobaho yakawa kubita kumuhinjiliza mukwewe. Yakenama yakamunonela. Wakawa kwilamusa no kwitambuza, hanyuma wose wakawa kwinjila mwi'hema.

⁸ Nayo Musa yakawa kumuloloseza mukwewe zinghani zose zono Muwaha Mulungu yamunoza Falawo, hamonga ne Wamisili, ho yawaponye Waisilayeli. Yakamuloloseza na zose zono zawagana, zo wugazice wa mu muhinzo, na vyono Muwaha Mulungu yawaponya.

⁹ Nayo Yetelo yakendezwa muno so zose zono Muwaha Mulungu yetuma ku soko ye Waisilayeli, na vyono yawaponya mu miwoko ye Wamisili.

¹⁰ Baho Yetelo yakatya, “Yalumbwe Muwaha Mulungu, mono yamuponyenyi mu miwoko ya Falawo, no kumuwusenyi mu miwoko ye Wamisili!

¹¹ Alu nane namanya nha vyono, u Muwaha Mulungu, yo Yalawiliciye kuciza milungu yinji yose. Hambi nha yawakomboza Waisilayeli, mu miwoko ye Wamisili wono wali kuwatendela vibi.”

¹² Baho Yetelo mukwewe wa Musa, yakamulavizya Mulungu cilavywa cinyanywe hamonga ne vilavywa vinji. Nayo Haluni yakaza hamonga ne wanyamhala wose we Waisilayeli, ho wahanje ndigwa hamonga na Yetelo, hali Muwaha Mulungu.

Wuhagulwe we Walamuzi

¹³ Imitondo yaco, Musa yakekala no kuwalamula Waisilayeli. Nawo wakema wamupilime wulawa hakali mitondo sunga camihe.

¹⁴ Nayo Yetelo mukwewe wa Musa yali yeza kuziwona zizo, zono Musa yawanozezaga Waisilayeli, yakamuwuza yakatya, “Musa, yo nghanici yiyi waco yono wukuwanozeza wanhu? Alu nhawule wukwikala wuli wene, akuno wanhu wakupilime wulawa mitondo sunga cinyamihe?”

¹⁵ Nayo Musa yakamupitula mukwewe yakatya, “Alu wanhu nha wakunyiziza no kuwuza zo wuhile wo Mulungu.

¹⁶ Na hono hawe ho wali wanhu wejete wono wowa wena wugomvi wo wose, wakuza kwangu, nane niwa kuwalamula munhu no muyagwe, kanyhi niwa kuwejiza zo wulajilize wo Mulungu hamonga no wutemye wakwe.”

¹⁷ Baho nayo Yetelo yakamulonjela Musa yakamutya, “Ninga Musa, zono wukuzinoza, si wukunoza viswanu ng'o.

¹⁸ Hambi nha kokwitamisa so mukatalo gwegwe go mweneco hamonga ne wanhu wawa. Ku soko mulimo awu wono wukwituma nha mukamu, hamba si kosuma yaye kwituma gwegwe du wuli wene.

¹⁹ Alu ane nokupela lihala, no Mulungu yawe hamonga nagwe. Agwe wime hagati ye wanhu no Mulungu, wumuletele Mulungu zinghani zawo.

²⁰ Na kanyhi yikunojeye wuwejize u wulajilize wo Mulungu hamonga no wutemye wakwe. Kanyhi wuwalajile nha vyono yiwanojeye mu mikalile yawo, na vyono yiwanojeye wetume.

²¹ Ninga hamonga na zizo, ko muno, wuhagule wanhu wono wakwilaniciye mu Waisilayeli, wanhu wono wali cogopo hali Mulungu, kanyhi wehuwilwa, wono si wendezwaga ne mafupo. Nagwe wuwapele wawo wulajilize, wawe wawaha mu wanhu, wawaha we maelufu, na we magana, na we makumi mahano, na we wanhu yikumi yikumi.

²² Wuwapele wulajilize, ho wawalamule wanhu mu zinghani zawo. Ne zinghani zinghamu, azo langa zo wakuletele gwegwe, ninga azilya i zindodo ndodo, azo wazilamule weneco du kuko. Ne nghani yiyi yokucepulila winji we milimo, nawo wokutaziliza mu mulimo wuwu mukamu.

²³ Nagwe hono wunoze nhavivyo nha vyono Mulungu yendile, si ko kwisakaza musunho, ne wanhu wose nawo wusuma kuwuya kwawo wapolile.”

²⁴ Nayo Musa yakazivumila zose zono yalonjelwa no mukwewe, yakanoza nha vyono yalonjelwa.

²⁵ Yakawa kuwahagula wanhu we vilungo mu Waisilayeli, yakawanoza wawe watonji mu zimhuga ze wanhu, mu maelufu, mu magana, mu makumi mahano na we wanhu yikumi yikumi.

²⁶ Nawo wawo wo wawalamulaga wanhu nhondo zose, langa zinghani zinghamu du, zo wakamuletela Musa, ninga zindodo, wakazilamula weneco kuko du.

²⁷ Hodu, Musa yakawa kwilaga no mukwewe. Nayo Yetelo yakawa kuwuya ku yisi yakwe.