Wutuluce 1 - Luganuzi Luswanu Kuli Wanhu Wose 2002

Wudumyanzwe, wutulilwe, hamonga no wuhinyizwe we Waisilayeli ku Misili

¹ Nawo wana wa Isilayeli, wono wenjila mu yisi ye Misili hamonga no sogo yawo Yakobo, munhu ne mhuga yakwe, wali awa,

² Lubeni, Simiyoni, Lawi, na Yuda,

³ Isakali, Zabuloni, Benyamini,

⁴ Dani, Nafutali, Gadi na Asheli.

⁵ Liwalo lyawo, wali waficile wanhu makumi mupunghati, nawo wali wo wana wa Yakobo. Ninga mwanagwe Yusufu, yali yakondya kulongola kuko ku Misili.

⁶ Na hanyuma yayo, yuyo Yusufu hamonga no lulelo lululya lose, wakawa wafwiza wose.

⁷ Ne wana wa Isilayeli wali welelile muno, wakacila konjelezeka, wakawa ne vilungo, kanyhi wakawa wenji muno muno, sunga ne yisi yiyilya ye Misili, yikamema weneco wose.

⁸ Hanyuma yayo, yakenuka mutemi mupya, mono yali si yamumanyile Yusufu hamba nhavi, yakawa mutemi mu yisi yiyo ya Misili.

⁹ Ale, yuyo yakawalonjela wanhu wakwe yakatya, “Ta mulanje, wanhu wawa Waisilayeli weza wenji, kanyhi wali vilungo wacicizize na sese.

¹⁰ Holeka ciwanozezaje mahala, ho walece kujendelela kwilela no konjelezeka, yilece kuwa hono wijele wulugu, lunji welunze ne walugu wetu wacihome ase, wawe kuwuka na mu yisi yetu. Holeka ciwalondolelaje nzila yo kuwemila, ho walece kucila kwilela, no konjelezeka no kuwa wenji muno.”

¹¹ Hobaho Wamisili, wakawa kuwawika wemilizi, wono wowetumya wanhu wa Isilayeli, no kuwadindimiza kwituma milimo mizito muno. Ale, Waisilayeli, wakawa kumuzenjela mutemi Falawo makaya ga Pitomu, na Lamesesi, so wuwicila viwutwa vyo mutemi.

¹² Ninga nha vyono Wamisili wacila kuwagaza Waisilayeli, nawo Waisilayeli, vyo wakacila kwilela no konjelezeka no kuwa wenji, wakatandala mu yisi yose. Nawo Wamisili wakenjilwa muno no woga ku soko ye Waisilayeli.

¹³ Ne nghani yiyo yikawanoza Wamisili wawadumyanze muno muno Waisilayeli, no kuwahinyiza muno muno kwe milimo mizito.

¹⁴ Wakawapela mikalile yo wusungu muno muno so wituma milimo mikamu kanyhi mizito, yo wunyanya cokaa no wufyatula matofali, hamonga na yo wuzenga makaya gawo, no kulima migunda yawo, hamba kuwawonela lusungu yaye.

¹⁵ Hodu u mutemi wa Misili, yakawa kulongana ne wadala wanghunga we Cihebelaniya, yunji yacemwaga litagwa lyakwe Shifula, u muyagwe nayo Puwa, yakawatya,

¹⁶ “Kolo mukwinjila mu mulimo wenyu wo kuwataziliza wacekulu we Cihebelaniya lono wakusawa, muwawulagaje wana wose we cilume wono wakulelwa, langa wana we cicekulu, mulece kuwawulaga yaye.”

¹⁷ Ninga wadala wawa, wali wamogopile Mulungu, holeka siwaketuma vyono wali walajilizwe no mutemi. Ninga wene, wakawaleka wana wose we cilume womi.

¹⁸ Nayo mutemi wa Misili yakawacema wawalya wadala, yakawa kuwawuza yakutya, “Alu nhawulenyi kanyhi mukunoza nha vivi? Nhawule mukuwaleka i wana we cilume womi?”

¹⁹ Nawo wakawa kumupitula wakatya, “Gwe mutemi, i wacekulu we Cihebelaniya si wehwanile nhe wacekulu we Cimisili yaye, Wene wakusawa mbela mbela, lono ase cikali hamba sinawaficila, wene wakuwa wakondya kusawa.”

²⁰ Na vyono wadala wamogopaga Mulungu, nayo Mulungu yakawatendela viswanu wa walya wadala, ne wanhu wa Isilayeli wakenjipa.

²¹ Nawo wana wa Isilayeli wakajendelela kwilela no konjelezeka, no kucila kuwa ne vilungo muno muno.

²² Nayo Falawo yakawalajiliza wanhu wakwe yakawatya, “Mwana we cilume wowose we Cihebelaniya mono kolelwa, mumutagaje mwi'kolongo lya Nile, langa i wana we cicekulu, muwalekaje mulece kuwawulaga.”