Nehemiya 1 - Luganuzi Luswanu Kuli Wanhu Wose 2002

¹ Azi zo nghani zono yetuma Nehemiya, u mwana wa Hakaliya. Ale, mu mwezi we Ciselevu, wa mu mwaka we makumi mejete, wa mu wuteme wakwe mutemi muwaha Alitashasita ku yisi ya Pelisiya, nene Nehemiya, nekalaga ku Shushani, likaya liwaha lya ku Pelisiya.

Nehemiya yakuyihweseza muno Yelusalemi

² Hanani muyagwe ne wandugu zangu, yakaza yakulawilila ku Yuda, yena ne cipuga ce wanhu wanji. Nghawawuza za ku Yelusalemi, hamonga na ze wandugu zetu Wayahudi, wono wali wawuya wulawa ku wuhamywe ku Babiloni.

³ Wakanonjela wakatya, “Wawalya i Wayahudi wose wono wasigala, no kulekwa ku Yelusalemi, vyono wali wali mu wugaye ne matovulo menji. Kanyhi, wakanonjela na vyono, ne majinji ga ku Yelusalemi, gali gakali gakumuce hamonga sunga ne milango yali yikali sinanozwa, ku wulawa vyono yaticimizwa na moto ha lulongozi.”

⁴ Nali neza kuzihulika zizi, nghekala hasi, nghanza kulila ko wukalale muno. Nghasola vilo vicefu njendeleye no wukalale muno, hamba sinalizaga cinji. Nghawa kumulomba Mulungu nghawa kutya,

⁵ “Gwe go Muwaha Mulungu wa ku wulanga, agwe wuli Muwaha, nase cikogopile gwegwe, kanyhi agwe wuli lusungu, kukamisaga cilagane cako kuli wono wakwendile gwegwe no kwituma wulajilize wako.

⁶ Holeka wunangaje 'gwe go Muwaha Mulungu. Wuhulicize wulombe wangu, nha vyono nghukulomba misi ne cilo so wetumami wako Waisilayeli. Nghuvumila vyono ase co wanhu wako, Waisilayeli citumile wubi. Walezi wangu na nene no mweneco, cetuma wubi hali 'gwe.

⁷ Cetuma wubi winji hali'gwe cilemegwa sunga no kutyatya malajilizo gono wacilajiliza. Hamba kwibata wulajilize wono wacipelela muli mwitumami wako Musa.

⁸ Wukumbucile lu, vyono wamulonjela Musa wukatya, ‘Anye mo wanhu wa Isilayeli, hono mulece kuwa wehuwilwa kuli'ne nane, nomwiyagazizenyi mu makungugo ganji.

⁹ Ninga hono mumbuyile, no kumhitucila nene, mwitume na zono namulajilizenyi, nane nomukongholezenyi wose, no kumuwicenyi hanhu hono nahahagula ho niwe kuhembelwa, hamba yiwe mwiyagaye mu yinze yose, ane nomugomolenyi.’

¹⁰ “Gwe go Muwaha Mulungu, awa wo wetumami wako, kanyhi wo wanhu wako wono wawakomboza kwe vilungo vyako viwaha, na ko wusume wako.

¹¹ Wuhulicize lu wulombe wangu, no wulombe we wetumami wako wono wakogopile gwegwe. Wumotesaje 'gwe go Muwaha Mulungu zuwali, wumunoze mutemi yendezwe nane.” Mu vilo vivyo, ane nali nili mugawi we divayi wo mutemi.