Nahumu 1 - Luganuzi Luswanu Kuli Wanhu Wose 2002

¹ Ayi yo nghani kuli Ninawi, nha vyono yagubulilwa Nahumu mono yali munya Elikoshi.

Likuwo lyo Muwaha Mulungu kuli Ninawi

² U Muwaha Mulungu sikowakangalila wono wakwisumaniza nayo, langa kawalipicizaga wose wono wakumupinga-pinga, na mwi'kuwo lyakwe, mwene mo kawalipicizizaga.

³ Langa mwene Muwaha Mulungu, sikakolwaga ne likuwo mbela, ninga yali vilungo, hamba sikalekaga kuwulipiciza wubi. Ho hose hono Muwaha Mulungu yakukola, cijelaga civulavumbi. Ne mavunde, go manghundi gono galawaga mu magulu gakwe.

⁴ Nayo kalilajilizaga lilenga, nalyo liwa kunyala, kanyhi kanyazaga ne makolongo. Sunga ne migunda yono yili ku Bashani yiwa kunyala, ne litunda lya Kalimeli nalyo, liwa ne liwala nha lye mahanze gono ganyalile, ne maluwa ga ku Lebanoni gawa kuwomba.

⁵ Ne matunda gawa kucicima ha mwande yo Muwaha Mulungu, ne vigongo vyayo viwa kwenjeduka ha mwande yakwe. Nayo Muwaha Mulungu, kolo yakwilajila, yisi yiwa kusinjisika, yinze hamonga ne wanhu wose wawa kucicima.

⁶ Nani mwene mono kosuma kupona, kolo mwene yakukolwa likuwo? Hamba nani mono kolosuma kusigala mu wogofye we likuwo lyakwe? Yakwita lilambi lye likuwo lyakwe, ne matalawe gakubiduka mu manghundi ha mwande yakwe.

⁷ U Muwaha Mulungu muswanu, kawadimaga wanhu wakwe mu cipango co wugaye; kawakamisaga wose wono wakumuwuyila mwene.

⁸ Langa mwene kawongomezezaga lukulu walugu wakwe, nhe 'hwazi lyono likuhuluma. Nawo wono wakwisumaniza nayo, kawafisaga sunga ko ku wufwe wawo.

⁹ Alu mukwihwesa cici muli Muwaha Mulungu? Mwene komuhodanjenyi. Hamba hasina yunji kanyhi mono kokwidoma nayo.

¹⁰ Nanye mo wagalo 'jimbi, molotakamizwa nhe mamivya gono gedawilize ne mahanze makavu.

¹¹ Ku wulawa kuli'gwe Ninawi, yakaza munhu mono yali yamemile wuhile wo wubi, mono yakwihwesa vibi kuli Muwaha Mulungu.

¹² Azi zo yakulonga u Muwaha Mulungu kuli wanhu wakwe Waisilayeli yakutya, “Hamba yiwe Waashuli wali vilungo kanyhi wenji, ninga wene wohodangwa no kuwusizwa lukulu. Heya nyo wanhu wangu, nghamunozenyi mugaye, ninga sinomutendelenyi kanyhi nhavivi.

¹³ Nane aluno novidumya i vilungo vye Waashuli kuli'nye, kanyhi noyidumula ne minyolo yono muwopeywe.”

¹⁴ Azi zo Muwaha Mulungu yalamuye kuli Waashuli, “Si wolowa na lulelo kanyhi lono lolocemwa mwi'tagwa lyawo. Novihodanga vihwani vyono vili mu wuhembelo we milungu yawo. Kanyhi nghuwikaniza citenjelo ku soko ye Waashuli, hambi nha si yiwanojeye wekale womi.”

¹⁵ Lanje, u muganuzi yakuza yakulawa mucanyha ye matunda, hamonga no luganuzi Luswanu, mono yakwanza zo mulamu. Mwene yali mu nzila yakwe ho yanze zo wusume. Nanye nyo wanhu wa Yuda, mwibate zi sikukuu, kanyhi mumufisilizize Mulungu vyono mwamwihuwiziza. Hambi i wabi, nha si wolokwinjila kanyhi no kuyihoma yisi yenyu. Hambi nha wakondya kuwusizwa lukulu!