Muganuzi 1 - Luganuzi Luswanu Kuli Wanhu Wose 2002

I mikalile ya mono'nze, yo nghani ya bwete du.

¹ Azi zo nghani zo muganuzi, u mwana wa Dawudi, mono yali mutemi ku Yelusalemi.

² Yo nghani ya bwete du, yo nghani ya bwete du, nghukulonjela mbeka ane no muganuzi! Vinhu vyose, yo nghani ya bwete du!

³ Munhu kamotaga ci cici mu wipiganze wakwe wose wa mono'nze?

⁴ Ndelo na ndelo zipulutaga, na ndelo zinji kanyhi zikuza, ninga yinze, yene yikalaga cibitilila.

⁵ Lizuwa nalyo lisosomokaga, kanyhi lizuwa liswezaga, likubita musunho muno hanhu hono lilawaga.

⁶ Nayo mbeho yiputaga wulawilila lubavu lwe takama, yiwa kuputa kanyhi no lubavu lwe sumuka, yiputaga kali kenji du, akuno yikupilima-pilima no kuwuyajila kukolela mu wukolo wayo we nhondo zose.

⁷ Ne makolongo gose nago gahulumililaga kwi'lenga, ninga 'lanje, lilenga si limemaga yaye hamba hadodo, nago makolongo, kuko kono gahulumililaga, kanyhi kuko ko galawililaga.

⁸ Ne zinghani zose, ziletaga mukatalo du, mukatalo muwaha si wakulonga. Meso getu nago, si gegutaga yaye no kulanga, ne makutu getu nago, hamba si gegutaga yaye no kuhuliciza.

⁹ Na zono zejela katali, zo zizo du zono zokwijela kanyhi na lulu, na zono zetumwa katali, zo zizo du zono zokwitumwa kanyhi na lulu, mono'nze musina nghani mhya, hamba monga.

¹⁰ I wanhu watezaga, “Lanje, ayi nghani mhya,” kumbe nghani yiyo, yali yili baho du ku wulawa katali, na lono cali cikali nalelwa.

¹¹ Na mbeka, hasina munhu mono kozikumbucila ze katali, hamba mono kozikumbucila zono zikuza. Ku wulawa lulu na mu vilo vyono vikuza.

Zono yaziwona Muganuzi

¹² Ane no Muganuzi, nali nili mutemi we Waisilayeli, kuko ku Yelusalemi.

¹³ Nane nghapiligala muno kuzilondola-londola kwe mahala, no kuzisunjilila muno muno zose zono zikwitumwa mono'nze yiyi. Nawo wuwu wo mulimo muwaha, wono Mulungu yawapela wanhu.

¹⁴ Nane nghukulonjela, naziwona zose zono zikwitumwa mono'nze yiyi vyono, yo nghani ya bwete du, kanyhi wo wigaze du wono wusina cambuzi.

¹⁵ Naco cono cipetizye, si cosuma kugoloswa, naco cono cili hasina, si cosuma kuwalwa.

¹⁶ Holeka mu wihwese wangu nghawa kutya, “Netujila mahala menji muno, kuciza wose wono wanongolela kuwa watemi mu Yelusalemi. Heya, alu nakondya kumanya nhunizo ye mahala co cici.”

¹⁷ Nghapiligala muno muno ho sume kumanya wisimajile we mahala, no lukwale, no wulele. Ninga nghamanya vyono, wunoza nhavivyo, wo wigaze we bwete du, wono wusina cambuzi co cose.

¹⁸ Hambi nha mu nghango yono kocila kuwa na mahala menji, yo nghango yiyo du kanyhi, yono kocila kwipela u wu wula mulamu mu nhumbula yako, na mu nghango yono wukucila kuwa no wumanye winji, ale yo nhavivyo kanyhi vyo kocila kwiyonjelezeza wukalale mu nhumbula yako.