Mika 5 - Luganuzi Luswanu Kuli Wanhu Wose 2002

¹ Anye nyo wanhu wa Yelusalemi, mwikongholaje so wihomi! Hambi nha cakondya kupilimwa! Nawo wamuhoma u mulongola wa Isilayeli!

Mulungu yakwihuwiza vyono, Mutemi kolawa ku Betelehemu

² Muwaha Mulungu yakutya, “Agwe Betelehemu Efulata, agwe yo gwegwe wuli cikaya cidodo mu Yuda, ninga nomuhagula yunji ku wulawa muli'gwe mono kowa mutemi wa Isilayeli, mono wulawo wakwe wo we katali na katali.”

³ Holeka Muwaha Mulungu, kowaleka wanhu wakwe kuli walugu wawo, sunga mu cipango cono mucekulu kolelela mwana we cilume. Ale baho i wanhu wono wowa wakali wasigaye ku wuhamywe, ho wolokwilunza kanyhi ne wanhu wawo weneco.

⁴ Nayo yalaza kuza, kolowatema wanhu wakwe, kwe vilungo vyono vikulawa kuli Muwaha Mulungu, hamonga ne nhojo yo Muwaha Mulungu mweneco. Ne wanhu wakwe, wolokwikala wapolile, hambi wanhu wose wa kono'nze, nha wolowuvumila u wuwaha wakwe, nayo yo kololeta mulamu.

Wukombozwe no wulipicizwe

⁵ Hono Waashuli waze wayisole yisi yetu no kugabena magomawakali getu, nase cowategula watemi wetu we vilungo wakawahome.

⁶ Nawo wolowasuma Waashuli mu yisi ya Nimulodi ko wukali wo mumaje, nawo wolociponya mu miwoko ye Waashuli, kolo wakwinjila no kuyihoma yisi yetu.

⁷ Ne wanhu wa Isilayeli wono wasigaye, wolowa nhe buhe yono yikulawa kuli Muwaha Mulungu so makungugo menji, kotya mahalavu ga mvula, mu migunda ye vilimwa vyono vikuwiluka. No witumbilo wawo, wolowa kuli Mulungu hamba si kuli munhu yaye.

⁸ Nawo wo lulelo lwa Yakobo wono wolowa wakali wasigaye mumo mu makungugo, wolowa nha simba yono yili mu mbago mu wupelembi, hamba mu wudimilo, yikwagana zingholo no kuzizumhila no kuzihawanga, hawa hasina hamba no witumbilo wo kupona yaye,

⁹ Isilayeli kolowasuma walugu wakwe, no kuwahodanjila lukulu wose.

¹⁰ Muwaha Mulungu yakutya, “Mu vilo vivyo, noloziwusiza lukulu zifwalasi zenyu, no kuyihodanga mituka yenyu yo wulugu.”

¹¹ Kanyhi nologahodanga makaya ga mu yisi yenyu, no kugagwisa hasi magomawakali genyu gose.

¹² Noloziwusiza lukulu zimhiji zono muzitumbiye, nimulecenyi musina kanyhi no mutowa cisangu.

¹³ Nolovihodanga ne vihwani vyenyu, hamonga ne masumbili genyu ge mabwe gono mugasiwanuye, nanye si molovihembela lukulu kanyhi, i vinhu vyono mwinozeze nyenye nyo mweneco.

¹⁴ Nolovigwisa hasi vihwani vyo mulungu we cicekulu Ashela mu'si yenyu, no kugahodanga makaya genyu.

¹⁵ Nane nologalipiciziza mwi'kuwo lyangu liwaha, makungugo gose gono gasina cihuliko kuli'ne.