Mika 1 - Luganuzi Luswanu Kuli Wanhu Wose 2002

¹ Ayi yo nghani yo Muwaha Mulungu yono yamuziza Mika, mono yali munya Molesheti mu vilo vya Yotamu, na Ahazi na Hezekiya i watemi wa Yuda. Muwaha Mulungu yamugubulila Mika zizi zose za muli Samaliya na Yelusalemi.

U Muwaha Mulungu yakuza kuling'aniza

² Ale muhulicize zizi anye nyo makungugo gose; muhulice zizi wose mono mwikaye mono'nze! Muwaha Mulungu, komuhomelelenyi, muhulicize! Yakulonga ku wulawa mu Nyumba yakwe yo wuhembelo ku wulanga.

³ Hambi Muwaha Mulungu nha yakuza yakulawilila hono helile hakwe, kokuza hasi, kanyhi kojenda mu vizuli vye matunda.

⁴ Ne matunda gokwenjeduka hali mwene, kotya lihula vyono lyenjedukaga mu moto, gohulumila mu malolo, kotya malenga gakuhuluma gakulawa mu cigongo.

⁵ Azi zose zokwijela, ku soko ye wanhu wa Isilayeli, wono wetuma wubi no kumuleka Muwaha Mulungu. Alu nani 'mbi mono kohoswa ku soko ye lisutya lya Isilayeli? Hono si Samaliya du! Hamba nani mono yena lisutya lyo kuhemba vihwani mu'si ya Yuda? Hono si Yelusalemi!

⁶ Muwaha Mulungu yakutya, “Holeka ku soko yiyo, nane noyinoza Samaliya, yiwe nha matongo go wongomezwe, mu yisi ye lihala, i hanhu hono hakuwa kupanhwa mizabibu. Nogagwisa makaya, ne mabwe gayo nogataga mwi'lolo, noyileka misinji yayo yili bwete.

⁷ Ne vihwani vyawo viseswe, vyose vyobenanjizwa-benanjizwa. Ne vinhu vyawo vyose vyono wavitujila mu nzila zo wusenyha, vyohodangwa no moto, ne vihwani vyose, novinoza viwe visina cambuzi. Hambi Samaliya, nha yavitujila vivi vyose, mu zinzila zo wusenyha. Holeka walugu wakwe wovisola, no kuvitegula hanhu hanji, nawo wavitumamile nhavivyo mu zinzila zo wusenyha.”

U muwizi yakuzililila Yelusalemi na Yuda

⁸ Mika yakatya, “Ku soko ya zizo, ane nolila muno muno, ndajile wusungu wono nina. Nojenda kwa magulu sina malatu, kanyhi nili cipwi, nowa kubweka nha nyhewe, kanyhi nolila nha nyacihema.

⁹ Hambi zinghomele za Samaliya, nha si zolonoga yaye, na Yuda nayo nhavivyo, yakondya kuficilwa no wugaye, heya, wugaye wakondya kufika sunga mo mu milango, hono wekaye wanhu wangu ku Yelusalemi.”

¹⁰ Mulece kuwalonjela walugu wetu wono wali ku Gati, zo wusumwe wetu, kanyhi mulece kuwaleka wawone vyono mukulila. Wanhu wa ku Bete-leyafula, mulajile nha vyono mwina wusungu, mu nzila yo wigalagaze mu manghundi!

¹¹ Anye nyo wanhu wa Shafila, mubite ku wuhamywe, muli cipwi, ne cevu. Na wawo wono wekaye mu Zanani, walecele lukulu kulawila mwi'kaya lyawo. Kolo mukuhulika wanhu wa Betizeli wakulila, ale momanya nha vyono kusina wutizizo kuko.

¹² I wanhu wono wekaye Maloti nha wakulondola wutazi, hambi Muwaha Mulungu nha yaleta magazo ko ku Yelusalemi.

¹³ Anye wanhu mono mwikaye Lakishi, muwopeleze zifwalasi mu magali go wulugu. Anye mono mwawutyatya wubi wa Isilayeli, kanyhi mukayambuza Yelusalemi yitume wubi.

¹⁴ Holeka 'lu wanhu wa Yuda, welagaje mu makaya ga Molesheti-gati. Hambi watemi wa Isilayeli, nha si wotuga wutazi ku wulawa mwi'kaya lya Akizibu.

¹⁵ Nanye nyo wanhu wa Malesha, Muwaha Mulungu komuwicenyi mu miwoko yo mulugu, mono kolitema likaya lyenyu. Ne watemi wa Isilayeli, wobita kwihundika mu mapango ga Adulamu.

¹⁶ Anye nyo wanhu mono mwikaye Yuda, mucete zimvwili, mulile, ku soko ye wana wono muwendile. Mwinozezaje nyo weneco mihalu kotya 'ndi, hambi wana wenyu nha wohamywa no kutegulwa kutali na nyenye.