Maluko 1 - Luganuzi Luswanu Kuli Wanhu Wose 2002

U wuganule wa Yohana u Mubaputizi

¹ Alu lo Luganuzi Luswanu lwa Yesu Kilisito u mwana wo Mulungu.

² Lukanzwa nha vyono lwandikwa mu citabu co muwizi Isaya: “Langa ta, nghumutuma mutumwa wangu yakulongolele; Mono kokunozelezeza i nzila yako.

³ I lizi lyo munhu lihulikwa ku nyika: Nozelezenyi i nzila yo Muwaha. Gololenyi wukolo wakwe.”

⁴ Yohana u Mubaputizi yejela ku nyika, yakuganula vyono yinojeye wanhu wanene no kubaputizwa, u Mulungu ho yawanenele u wubi wawo.

⁵ I wanhu kulawa mbavu zose za Yudiya, na wanya Yelusalemi wose wakamuziza Yohana, wakavumila wubi wawo, nayo yakawabaputiziza mwi'kolongo lya Yoludani.

⁶ Yohana, yali yavwalile civwalo cono cali cihonwe ko wusinga we ngamiya, no musipi we nyhingo mu ciwino cakwe. Ne ndigwa yakwe, yali nzije no wuci wa mu mbago.

⁷ Nayo yakaganula yakutya, “U Munhu yunji mono yena vilungo yanyhizize nene, yakuza mu nyuma yangu; nane si nghwiliye hamba kwinama, no kuwopola i mikowa ye malatu gakwe.

⁸ Ane nghumubaputizenyi ne malenga, ninga mwene kolomubaputizenyi mu Muhe Mono Yelile.”

Wubaputizo wa Yesu no wujelwe wakwe

⁹ Mu vilo vivyo, Yesu yakaza yakulawa ku Nazaleti, kwi 'kaya lya Galilaya, nayo yakabaputizwa na Yohana mwi'kolongo lya Yoludani.

¹⁰ Lo lulolulo Yesu yaza kulawila mu malenga, yakawona wulanga wudiguce, no Muhe yakumutimila mucanyha yakwe yenha nziwa.

¹¹ Ne lizi likahulikwa kulawa ku wulanga likutya, “Agwe yo gwegwe mwanangu mwendece; mono nyendezwe nagwe.”

¹² Lo lulolulo yakategulwa no Muhe ku nyika,

¹³ yakekala kuko vilo makumi mane yakujelwa na Setani. Yakawa kuko hamonga ne malimu ga mu mbago, nawo Wamalayika wakawa wakumwitumamila.

Yesu yakuwacema wanimula zisomba wane

¹⁴ Nayo Yohana yaza kuwa yadindilwa mu jela, Yesu yakabita ku Galilaya, yakaganula u Luganuzi Luswanu lo Mulungu, yakutya,

¹⁵ “Icidaha cakwila, no wutemi wo Mulungu wasejelela. Nenenyi no kulwihuwila u Luganuzi Luswanu!”

¹⁶ Na lono yakolaga ha nhumbi ye lilamba lya Galilaya, yakawawona wanimula zisomba wejete, Simoni no muwahawe Andeleya, wakunimula zisomba no lwavu.

¹⁷ Yesu yakawatya, “Munhyatyaje, nane nomunozenyi muwe wanimula wanhu.”

¹⁸ Lo lulolulo wakazileka zinyavu zawo, wakamutyatya.

¹⁹ Nayo yali yeza kutela hamwande hadodo, yakawawona wa Yakobo no mwanakwawe Yohana iwana wa Zebedayo. Nawo nha vivyo wali wali mu ngalawa yawo wakuzinozeleza zinyavu zawo.

²⁰ Lo lulolulo Yesu yakawacema, nawo wakamuleka u Sogo yawo Zebedayo mu ngalawa, hamonga ne wetumami, wakamutyatya.

U munhu we licisi lyavu

²¹ Wakafika mwikaya lya Kapelanawumi, na mwizuwa lye Sabato, Yesu yakenjila mu nhang'anilo yo wuhembelo, yakanza kwijiza.

²² Ne wanhu wose wono wamuhulika, wakezina i mejizo gakwe, hambi nha siyejizaga nha vyono wejizaga iwejizi wawo wo Wulajilize, langa yejizaga nha munhu mono yena wulajilize.

²³ Lo lulolulo munhu yunji we licisi lyavu, yakenjila mu nhang'anilo yo wuhembelo,

²⁴ yakazoza, yakutya, “Alu wina nghanici nase, agwe Yesu wa Nazaleti? Alo kuza ho wucongomeze? Nghumanyile vyono wuli nani, yo gwegwe mono welile wo Mulungu!”

²⁵ Yesu yakalitacila ilicisi lyavu yakutya, “Nyamala! Wulawile muli munhu yuyu.”

²⁶ Ale, lilyo licisi lyavu, likamuzuganga munhu yuyo, likazoza muno, likawa kulawila.

²⁷ I wanhu wose wakezina, wakewuza wakutya, “Alo cici co cici? Ma, go mejizo mapya lo? U Munhu ayu, yena wulajilize wo kugalajiliza i macisi mavu, sunga nago gakumuhulika!”

²⁸ I zinghani za Yesu zikatandala mbela mbela hanhu hose, mu yisi ya Galilaya.

Yesu yakuwaponya wanhu wenji

²⁹ Yesu ne wejizwa wakwe, hamonga na Yakobo na Yohana, wakawuka mu nghang'anilo yo wuhembelo, wakabita ku kaya ya Simoni na Andeleya.

³⁰ Ale, u mukwewe we cicekulu wa Simoni, yali yagonile mu citanda yena mhungo. Nayo Yesu yali yeza kufika, wakamulonjela kamonga muli zo wutamwa wo mudala yuyo.

³¹ Yesu yakamubitila mudala yuyo, yakamwibata muwoko, yakamwinula. Ne mhungo yiyo yikamuleka, nayo yakanza kuwetumamila.

³² Icinyamihe, lono lizuwa lyali lyagwililicila, i wanhu wakamuletela Yesu iwatamwa wose, ne wanhu wono wali wena macisi mavu.

³³ I wanhu wose we likaya lilyo wakekongholela ha mwande yo mulango.

³⁴ Nayo Yesu yakawaponya wanhu wenji wono wali wena wutamwa we hayo hayo, yakagalavya macisi menji, ninga siyagakombola galonje cinji, hambi nha gali gamumanyile vyono mwene yo nani.

Yesu yakuganula mu Galilaya

³⁵ I mitondo yaco lono kwali kukali nadandawuka, Yesu yakenuka yakabita kulomba i hanhu ha cilejeho hono hasina wanhu.

³⁶ Nawo wa Simoni ne wayagwe wakabita kumulondola.

³⁷ Nawo waza kumuwona wakamutya, “I wanhu wose wakukulondola gwegwe.”

³⁸ Yesu yakawatya, “Alenyi cibite ku vikaya vinji vye behi behi, ho nghaganule nako kuko, hambi nha ku soko yiyo, holeka naza.”

³⁹ Ale, yakapilima hanhu hose mu Galilaya, yakuganula mu matang'anilo gawo go wuhembelo no kulavya macisi.

Yesu yakumuponya u munhu mono yena wukoma

⁴⁰ U munhu yunji wo wukoma yakamubitila Yesu, yakamufugamila, yakamulomba yakutya, “Hono wende, kosuma kunghwema!”

⁴¹ Yesu yakamuwonela lusungu, yakagolola muwoko wakwe, yakamupamiza yakamutya, “Nyendile, wukwemwe!”

⁴² Lo lulolulo wukoma wukamuleka munhu yuyo, yakawa mutelevu.

⁴³ Yesu yakamutya yabite mbela mbela akuno yakumukong'onheza yakutya,

⁴⁴ “Wulece kumulonjela munhu wo wose ze nghani yiyi, langa wubite wukelajile kuli mukohani, na kolo wakondya kuhomelela vyono wapona, ale, wulavye i cilavywa nha vyono yalajiliza Musa, ho yiwe wuhomelezi kuli mwene so wupone wako.”

⁴⁵ Ninga munhu yuyo yakabita yakanza kuyitandaza inghani yiyo hanhu hose, no kulonga nghani nyinji, sunga na Yesu si yasuma kwinjila mwikaya lyo lyose ciwonelela. Ne nghani yiyo yikamunoza yekale kunze ihanhu ha cilejeho hono hasina wanhu. Ninga hamba nhavivyo, wakamubitila iwanhu wakulawa mbavu zose.