Malaki 1 - Luganuzi Luswanu Kuli Wanhu Wose 2002

¹ Ayi yo nghani yono Muwaha Mulungu yamupela Malaki, yawalonjele wanhu wa Isilayeli.

Wendo wo Muwaha Mulungu kuli Isilayeli

² Muwaha Mulungu yakuwalonjela wanhu wakwe yakutya, “Ane nimwendilenyi nhondo zose.” Ninga wene wakutya, “Wukuwulajila wule wendo wako kuli'se?” Nayo Muwaha Mulungu yakupitula yakutya, “Alu wule! Esawu si yali nduguye wa Yakobo? Ninga nghamwenda Yakobo no lulelo lwakwe,

³ no kumusula Esawu no lulelo lwakwe. Ne yisi yakwe ye matunda, nghayinoza yiwe wambuce, nghayileka yiwe wikalo we macewe ga mu mbago.”

⁴ Na hono Waedomu u lulelo lwa Esawu watye, “Imakaya getu, heya gahodangwa, ninga cogazenga kanyhi.” Nayo Muwaha Mulungu kopitula yatye, “Heya, lece wagazenje kanyhi, ninga nane nogamwagulanga kanyhi. Ne wanhu wowacema watye, ‘Yisi yo wubi’ kanyhi ‘Lyo likungugo lyono Muwaha Mulungu yalikoleywe likuwo cibitilila.’ ”

⁵ Ne wanhu wa Isilayeli woloziwona zizi kwe meso gawo weneco, nawo wololonga vyono “Muwaha Mulungu yo we vilungo sunga kunze ye mipaka ye yisi ya Isilayeli.”

Muwaha Mulungu yakuwahosa Wakohani

⁶ Muwaha Mulungu we mihanga yakuwatya wakohani, “Mwana kamogopaga sogwe, no mutumwa nayo kamogopaga u muwaha wakwe. Ane nili sogo yenyu, alu nhawule si mukunyogopa? Nane ho nili mutwa wenyu, alu nhawule nha si munyogopile, langa mukunyihepa? Akuno kanyhi mukuwuza ti mukutya, Cikukwihepa wule?

⁷ Mukunyihepa mu nzila yo kundavizya vilavywa vye ndigwa nyavu mu cikumbicilo cangu, akuno kanyhi ho mukuwuza ti mukutya, calemwa nhawule kukupela cogopo? Alu nane nomulonjelenyi vyono mukucibedegala cikumbicilo cangu.

⁸ Alu mwene lono mukundetela cilavywa co mutugo wono wuli cibofu, hamba wono wutamigwe, hamba we cilema, muwa kundavizya likumbiko, mukwihwesa hongo vyono kusina yisutya mu nghani yiyo? Mujele ta kumupela u mulongola we'si, mitugo yono yinha nhavivyo! Wule, mukwihwesa kokwendezwa nanye no kumulumbenyi?”

⁹ Alu nanye nyo wakohani, mono mukumulomba Mulungu yawe muswanu kuli'se. Mwene sikowupitula wulombe wenyu, na lili lyowa yisutya lyenyu.

¹⁰ U Muwaha Mulungu we mihanga yakutya, “Yali yiwe yili ciba yunji wa muli nyenye, yadinde milango yo wuhembelo, ho muze mulece kwasa moto wono wusina cambuzi mu cikumbicilo cangu. Ane singhwendezwa nanye hamba hadodo, hamba sinovibocelela lukulu ne vilavywa vyono mukundavizya.

¹¹ Wanhu ku wulawa ku mhelo ye yinze, sunga ko ku mhelo nzagwe, wose wanyogopile nene. Hanhu ho hose wakufusiza wuvumba, no kulavya vilavywa vyono vikwiliye. Na wose wawo, wanyogopile nene!”

¹² Ninga anye si munyogopile 'ne, vyono mukuciwona cikumbicilo cangu si cinji yaye, lono mukulavya mucanyha yaco ndigwa nyavu, yono yisina cambuzi.

¹³ Akuno mukutya, “Ka! Lanje ta nghani ayi vyono yacikataza! Akuno mukunyile ne zimhula zenyu ku soko yangu. Na kuno mwandetela vilavywa vyenyu vyo mutugo wono muhize, kanyhi wina cilema na kanyhi wutamigwe, hambi nha vyo vilavywa vyono mukundetela. Alu mukwihwesa vyono 'ne, hongo nosuma kumubocelenyi vilavywa vye liwala lilyo mbi?

¹⁴ Wulijitwe wuli muli mukoci, mono yakundavizya vye mitugo yono yisoceye, na kuno, ho yena ne mitugo miswanu mwi'tewa lyakwe, yono yelahiza vyono komhela 'ne! Hambi 'ne nha nili mutemi Muwaha, ne makungugo gose, wanyogopile nene.”