Lutu 1 - Luganuzi Luswanu Kuli Wanhu Wose 2002

Elimeleki ne mhuga yakwe wakubita ku Mowabu

¹ Baho katali, mu vilo vyono Waisilayeli wali wakali siwanawa na mutemi, kwali koyili nzala mu'si. No munhu mono yacemagwa Elimeleki, mono yali we mhuga ya Efulata, mono yekalaga Betelehemu mu Yuda,

² yakabita hamonga no mugolece wakwe Nawomi ne wana wawo wejete Maloni na Ciliyoni, yekale mu yisi ya Mowabu. Na lono wekalaga kuko,

³ Elimeleki yakafwa, Nawomi yakalekwa yali wene hamonga ne wanagwe wejete,

⁴ Nawo wa Maloni na Ciliyoni wakawa kutola i wahinza we Cimowabu, Olipa na Lutu. Kotya myaka yikumi yali yeza kupuluta,

⁵ Maloni na Ciliyoni nawo wakawa kufwa, Nawomi yakalekwa yali wene yasina mulume hamba wana wa cilume.

Nawomi na Lutu wakuwuya ku Betelehemu

⁶ Hanyuma yayo, Nawomi yakahulika vyono Muwaha Mulungu yawamotya i wanhu wakwe ko kuwapela nhwanga mbaha; hobaho yakawa kwiwikaniza ho yawuce ku Mowabu hamonga ne wakwewe.

⁷ Wakawuka hamonga wawuye ku yisi ya Yuda. Na lono wali wali mu nzila,

⁸ Nawomi yakawatya wakwewe, “Nye wanangu, muwuye kwenyu, mukekale hamonga ne wanyina zenyu. Nayo Muwaha Mulungu kowa muswanu kuli'nye, nha vyono anye mwali waswanu kuli'ne na kuli wawo wono wakondya kufwa.

⁹ No Muwaha Mulungu yamutazenyi, mutolwe kanyhi mutuje nyumba.” Baho Nawomi yakawa kuwanonela no kuwelaga. Ninga wene wakanza kulila.

¹⁰ Wakamutya, “Ng'o! Ase langa, cobitana nagwe du kuli wanhu wako.”

¹¹ Nawomi yakawapitula. Yakawatya, “Yinojeye muwuye kwenyu wanangu.” hawule mukusaka cibitane hamonga nane? Mukwihwesa ane, nosuma kulela kanyhi wana wanji we cilume, wono womutolenyi?

¹² Holeka muwuye ku zikaya zenyu wanangu, hambi ane nha neza nili mukombi, si nosuma kutolwa kanyhi. Hamba nali nitye kowuli witumbilo, vyono hono nholwe ne cilo cici notuga wana,

¹³ wule, mwali muwalindile sunga wawiluce? Yiyi yimwimilenyi ho mulece kutolwa na yunji? Ng'o wanangu, mumanyile nha vyono siyosumika. Hambi Muwaha Mulungu nha kamhitucila, ane nane nghumuwonelenyi lusungu wanangu.

¹⁴ Kanyhi wene wakanza kulila. Ninga Olipa yakawa kumunonela mukwewe, yakawa kuwuya ku kaya, ninga Lutu, vikekalana no mukwewe.

¹⁵ Nayo, Nawomi yakamutya, “Lutu, lanje ta mutozi muyago, yawawuyila i wanhu wakwe, na ko mulungu wakwe. Nagwe le, muwuyane wose ku kaya.”

¹⁶ Ninga Lutu yakamupitula Nawomi, yakamutya, “Gwe yaya! Wulece kuneneleza 'ne ho nghulece! Wundekaje 'ne cibitane na gwegwe. Kono kobita, nane nobita; na kono kokwikala, nane nokwikala. Ne wanhu wako, nane wowa wanhu wangu, no Mulungu wako nane kowa Mulungu wangu.

¹⁷ Na ho hose hono kofwila nane ho nofwila, no kuzikwa baho, no Muwaha Mulungu yanhendele nhavivyo no kuciza, langa lifwa du lyo lyolocitemanula nagwe.”

¹⁸ Nawomi yali yeza kuwona vyono Lutu yendile wabitane, hodu nayo yakawa kunyamala.

¹⁹ Wakawa kujendelela no muhinzo wose vyono wejete, sunga wakafika ku Betelehemu. Nawo lono waficililaga, mwi'kaya lya Betelehemu, likaya lyose likenjila sasamo mbaha, ne wacekulu wakalonga wakutya, “Mwene 'nye, yuyu mbeka yo Nawomi?”

²⁰ Nayo Nawomi yakawatya, “Mulece nyhema Nawomi, langa munyhemaje nene Mala, (nhunizo yayo cinhu cono cina cisungu,) hambi u Mulungu Mudaha Vyose mono yali vilungo, nha kayinoza mikalile yangu yiwe ya wusungu sungu du.

²¹ Hambi lono nawukaga baha, nha nali nina vyose, ninga Muwaha Mulungu, yangomola luno nili bwete. Holeka socici munyheme nene Nawomi, lono Muwaha Mulungu Mudaha Vyose, yakondya kuning'aniza nha nili musutyi, no kumhela magayo?”

²² Nhavivi vyo Nawomi yawuya ku wulawa Mowabu hamonga na Lutu, mukwewe u Mumowabu. Wakafika mu Betelehemu, mu mwamulizo we ndudula yo wuhemba.