Jobu 6 - Luganuzi Luswanu Kuli Wanhu Wose 2002

¹ Jobu yakamupitula Elifazi yakatya,

² yali yiwe ciba, wugazice wangu hamonga no wutamice wangu hono vyali vipimwe mu muzani

³ vyali viwe vizito muno kuciza wuzito wo musawawa wa mwi'lenga. Holeka ne zinghani zangu, zilece kukupela wizine.

⁴ Mulungu mono yali vilungo, yakondya kunguma ne zisonga zakwe ne sumu yazo, yakondya kutandala mu muwili wangu mose, Mulungu yanhandaliciye nene wogofye wakwe.

⁵ Nyhenje si yililaga hono yiwe yikulya mahanze, ne nghambaku nayo yiwezaga yinyamaye twii, lono yikulya mahanze.

⁶ Hamba nani mono kasumaga kulya ndigwa yili cisusuli yisina mwino? Wule mu wuzelu we ligangha, mo yili ndaso?

⁷ Nane hamba si niyidabuciye ndigwa ye liwala lilyo, na vyose vyono nghuvilya, vikuhesuza mutima wangu.

⁸ “Alu nayo Mulungu, hamba nhawule si yakumhela yono nghumulomba? Hamba si yakusaka kumhitula no wulombe wangu.

⁹ Yali yiwe yili ciba le, hono yali yambulaje du lwa kamonga!

¹⁰ Na hono nali manye, nha vyono kosuma kumbulaga lwa kamonga, nane nali nzumhe zumhe na nyemo. No wusungu wangu, hamba si nali niwuhulice yaye. Manyile vyono Mulungu Yelile, nane nghali si namubeza muli zono kalajilizaga zose.

¹¹ Alu nowa nina vilungo ci kanyhi, vyono vyoleka njendelele kuwa mumi? Alu socici lo njendelele kuwumipa na lono neza sina witumbilo.

¹² Hambi 'ne ninha yibwe? No muwili wangu nawo hambi winha shaba?

¹³ Nalu, nha neza sina ne vilungo vyo kwitaziza, hamba hasina kanyhi hanji hono notiziza ho nhuje wutazi.

¹⁴ “Na mu wugaye wono winha wuwu, mbeka nghusaka wendece, wono wonhendela viswanu, hono niwe nakondya kumuleka Mulungu hamba ng'o.

¹⁵ Ninga lu anye nyo wendece wangu, mukunghonga-nghonga cinye vikolongo vyono vinyalaga mwibahu

¹⁶ Vyono malenga gavyo matibulangwe, gakutukuwazwa ne seluji.

¹⁷ Ninga seluji kolo yikutuga civuce hodu yiwa kwenjeduka, ne vikolongo viwa kunyala.

¹⁸ Wanhu wakwajilila so wulondola malenga, wakuyumbayumba sunga wafwila mu nyika.

¹⁹ Wanhu wokulawa Sheba na Tema wavilondola,

²⁰ ninga witumbilo wawo wukamalicila mu vikolongo vyono vinyalile.

²¹ Holeka nanye, ane nghumuwonenyi nha vyono mwihwanile ne vikolongo vivyo kuli'ne, mwakondya kuwuwona wugaye wono nina nawo, nanye lu mukogopa.

²² Mwene ane nimulombenyi mumhele cinhu co cose, hamba nimulombenyi nitya mubite mukamupele yunji mafupo ku soko yangu,

²³ hamba nimulombenyi nitya munhaze kuli mulugu wangu, hamba kuli mono yakumbonela?

²⁴ “Ale viswanu! Alu munyijizaje, mundajile masutya gangu Nane nowa nyamaye du nghumuhulicizenyi.

²⁵ Ninga mumanye vyono, zinghani zo mugoloka zo zitazaga, ninga lu anye mukulonga nghani za wulele du.

²⁶ Anye mukwihwesa nghani zangu za bwete kotya mbeho du. Alu nhawule kanyhi mukumhitula zinghani zangu ane mono nawa sina witumbilo?

²⁷ Heya, mukuwatowela kula i wana wono wasina walezi wawo, no kwigolifizya mu wendece wenyu!

²⁸ Muwulangaje ta wusu wangu, ane si nili mulambi yaye.

²⁹ Zizo zono mulonjile, hodu zakondya, mulece kuwa wakonji. Kanyhi mulece kuhosa, hambi 'ne nha nili mu mbeka.

³⁰ Ninga anye mukwihwesa ane nghulonga za wulambi, kanyhi mukwihwesa vyono, sinosuma kuzihosa zinghani zimbi.”