Jobu 34 - Luganuzi Luswanu Kuli Wanhu Wose 2002

¹ Elihu yakajendelela kulonga yakatya,

² “Hambi anye nyo wanhu nha muli we mahala no wumanye, Holeka luno muhulicize nane zono nghulonga,

³ Hambi likutu nha lijelaga zinghani, Ndigwa swanu yimanyikaga lono wukuyijeza.

⁴ Ninga yo nghani yetu co weneco, kuhagula cono cili ling'ani.

⁵ Mwene Jobu yakwiyitya vyono yali ling'ani, ninga Mulungu, yakulema kumuwala vyono yali ling'ani.”

⁶ Kanyhi yakutya, “Alu ho nosuma nhawule kulonga zo wulambi, niwe kutya ane nili musutyi? Heya natuga nghomele, ninga si nahodanga cinji yaye.”

⁷ Ati wayangu, muwene munhu yunji mono yenha yuyu Jobu? Hambi nha si yakulajila cogopo hali Mulungu.

⁸ Yehwanile ne wetuma zimbi, kajendanaga ne wabi.

⁹ Hambi mwene nha yakutya, vyono hasina cambuzi co cose mu wituma wuhile wo Mulungu.

¹⁰ “Holeka muhulicize anye nyo wanhu wo wizuce! Mukwihwesa Mulungu mono yali vilungo, kokwituma zo wubi?

¹¹ Mwene kawatendelaga wanhu mu nghango ye metumo gawo, no kuwalipa mu nghango nha vyono wanojeye.

¹² Na mbeka, Mulungu mono yali vilungo hamba sikahodangaga yaye, no wuling'anizi wakwe, wo we ling'ani kuli wanhu wose.

¹³ Hambi Mulungu kabocelaga vilungo ku wulawa kuli munhu yunji wo wose 'mbi? Hamba hoyuli yunji mono yamupela Mulungu mulimo wo kuyidima yinze lo?

¹⁴ Na hono Mulungu yali yawuse muhe wo mwehelo,

¹⁵ Wanhu wose wali wafwe wawuye kanyhi mu mangundi.

¹⁶ “Alu muhulicizaje, hono muwe mwina mahala.

¹⁷ Alu anye hongo, mukumuhosa Mulungu we ling'ani? Mukwihwesa vyono mwene si yendile ling'ani?

¹⁸ Mwene Mulungu kawaling'anizaga watemi hamonga ne walongola, lono weza wasina cambuzi, kanyhi wakwituma zo wubi.

¹⁹ Mwene si kawahijilaga mbejele i walongola, hamba si yakuwawona wagoli wawe wo waswanu si nhe waciwa, hambi mwene nha yo yawawumba wose.

²⁰ No munhu kosuma kufwa nhinicizo ne cilo. Hambi Mulungu nha kawatowaga wanhu wajilila na we vilungo kawawulagaga.

²¹ “Hambi meso gakwe nha galangaga zinzila ze wanhu

²² Hasina wutitu tuku, wono wosuma kumuhundiciza munya wubi hali Mulungu.

²³ Mulungu yasina soko, yo kuwawicila wanhu lizuwa lyo kuwaling'aniziza.

²⁴ Kanyhi yasina soko yo kuwasunjilila walongola, no kuwawusa, no kuwawika wanji wahalile hanhu hawo.

²⁵ Hambi nha yazimanyile zose zono wakwituma, nayo yakuwawusa mu wulongola wawo, no kuwapondanga ne cilo.

²⁶ Kawalipicizizaga i wabi calinze, lono wose wakuwona.

²⁷ Vyono waleka kumutyatya mwene, wakagabedegala ne malajilizo gakwe.

²⁸ Wakuwanoza waciwa sunga wamulilile Mulungu nayo Mulungu yakucihulika cililo cawo co kulondola wutazi.

²⁹ Na hono Mulungu yawe si yakusaka kwituma nghani yinji, alo nani mono kosuma kumuhosa. Na hono yawuhundice wusu wakwe, wanhu wowula wutazi.

³⁰ Na howa hasina nghani yo yose, yono makungugo gosuma kwituma, hamba si gosuma kuwawika i walongola, wono si wamumanyile Mulungu, wo wawe walongola wawo.

³¹ Alu 'gwe Jobu, wakondya kunena wubi wako hali Mulungu, no kwihuwiza nha vyono si kokwituma wubi kanyhi?

³² Wule wakondya kumulomba Mulungu yakulajile masutya gako, no kuvumila nha vyono walecela lukulu kwituma zinghani zimbi?

³³ “Alu hono wukuzilema zono Mulungu ketumaga, nha cinji wukusaka Mulungu yetume zono gwegwe wendile du? Ninga wulamuzi, wina gwegwe go mweneco, si wangu yaye, holeka aluno wucilonjele zono wukwihwesa.

³⁴ No munhu wo wose we mahala, mbeka kovumila, no munhu wo wose wo wizuce mono yakuhulika, kosuma kutya

³⁵ vyono Jobu yakulonjela mu wu wula wumanye, na zose zono yakulonga, zisina cambuzi.

³⁶ Alu nye mwihwesaje ta, muli zono Jobu yakulonga, mowona nha vyono yakulonga nha munhu mwituma zimbi.

³⁷ Hambi nha yakonjeleza wufyule wakwe mu wubi wakwe, kanyhi yakumwizwajiza Mulungu ha mwande yetu.”