Jobu 16 - Luganuzi Luswanu Kuli Wanhu Wose 2002

I mapitulo ga Jobu

¹ Jobu yakapitula yakatya.

² “Nye wayangu, zinghani ze liwala lilyo, ane nakondya kuzihulika katali. Wusindamice wono mukusindamika, ane nghuwona mukumhela wusungu du.

³ Alu mojendelela kulonga sunga nili? Ninga yinojeye nhondo zose muwe ne nghani ye ndumilizo.

⁴ Na hono anye mwali muwe yo ane, nane niwe yo nyenye, nali nonje zose zono mulonjile. Nali sinjise mutwe wangu kwe mahala, nimusumenyi ne zinghani zono zinha lihwazi lye malenga.

⁵ Nali nimusikamyenyi ko wulonje wangu, njendelele kumusindamicenyi.

⁶ “Ninga lu, hamba nali nonje, wukalale wangu si wali wutuzwe yaye, na hono nyamale, si nghutuga wutuzwe mu wusungu wangu.”

⁷ Alu wakondya kusuma go Mulungu, hambi nha kuwaleka we mhuga yangu wose wawulagwa.

⁸ Nane wambopa, weza wuli mulugu wangu. Ane nili nghuli ne mafupa. Ne wanhu nawo so nghani yiyi, wakondya kwihuwila vyono ane nili musutyi.

⁹ Yawusalangulanga muwili wangu kanyhi yanuguliye kwe'kuwo

¹⁰ Ne wanhu wakusekanga, wehangulize hamonga, wakunhowa makofi mu wusu wangu.

¹¹ Nayo Mulungu kakondya kumbika mu miwoko ye wanhu wabi.

¹² Ninga 'ne ho nekalaga mholile, Mulungu yakanyibata mu singo yangu, yakambenanga no kumhondanga vidodo vidodo. Mulungu yakambika ho niwe wisumanizo wo wugume.

¹³ Ne wagumi nawo, wakunguma ne zisonga mbavu zose. Zisonga zono zikuhoma no kumhela nghomele, ninga hamba nhavivyo, mwene si yakumbonela lusungu yaye.

¹⁴ Nayo yakumhela nghomele nyinji du, yakuhoma nho musilikale mono yena lukwale lo lusulo.

¹⁵ “Nghalila, nghavwala magunila, nghawa kwivwagamika mu manghundi, nalemwa.

¹⁶ Nane nalila, sunga no wusu wangu nhondo wadunghuwala, ne meso gangu gavimba, gawicila no mubeho,

¹⁷ ninga'ne ho sina masutya go wugazi yaye, no wulombe wangu kuli Mulungu, welile.

¹⁸ “Gwe go yinze, wulece kuhundicila i zimbi zono netuma!

¹⁹ Ninga kuko ku wulanga, ko ko yuli u muhomelezi wangu, mono yali ku lubavu lwangu.

²⁰ Wendece wangu, wakumbedegala, ninga meso gangu gakumulavizya mahozi Mulungu.

²¹ Holeka nghumusaka yunji yanombele kuli Mulungu, nha vyono munhu kamulombelaga u mwendece wakwe.

²² Myaka yangu yikupuluta musunho, nane nhyatizye nzila yono si noloyiwuyila kanyhi.”