Jobu 12 - Luganuzi Luswanu Kuli Wanhu Wose 2002

Mapitulo ga Jobu

¹ Nayo Jobu yakapitula yakatya,

² “Heya, hamba muwe anye yo muli we mahala, ninga mumanye vyono kolo mukufwa, mofwa hamonga ne mahala genyu.

³ Ninga mumanye vyono nane nina mahala nhe genyu, hamba si munyhizize cinji yaye. No munhu wo wose du, yazimanyile zose zono mulonjile.

⁴ Sunga naluno i wendece wangu wakuseka 'ne, ninga wakuseka bwete no muyawo, nane ho nili ling'ani, kanyhi sina hamba wuhoswe, ninga ho cili cipango cono namulomba Mulungu, nayo yakamhitula wulombe wangu.

⁵ Anye mukuwona musina magayo, holeka mukusekanga. Mukumutowanga munhu mono yali behi no kugwa.

⁶ Ninga i wahizi hamonga ne wanhu wono wasina mulungu, awo wekalaga wapolile. Hamba wawe mulungu wawo yali mu vilungo vyawo weneco.

⁷ Hamba nhavivyo, zindeje hamonga ne vilimu, zina nyinji zo kumwijizenyi,

⁸ holeka munojeye muyiwuze yinze ne lilenga mahala gavyo.

⁹ Hambi vyose nha vimanyile, vyono Muwaha Mulungu yo yaviwumba.

¹⁰ Kanyhi na vyono Mulungu yo yebate wumi we viwumbwa vyose, no wumi we wanhu wose wuli mu miwoko yakwe.

¹¹ Alu nha vyono zinimi zenyu zisangalalaga lono zikujeza ndigwa, Ale nhavivyo ne makutu genyu nago, gakuwa kusangalala lono gakuhulika nghani.

¹² “Mahala gali mu wakombi, ninga Mulungu yo yena mahala ne vilungo.

¹³ I wakombi wena wizuce ninga Mulungu yo yena wizuce, hamonga ne vilungo vyo kwitumila.

¹⁴ Na hono Mulungu yamwagule, nani kanyhi mono kosuma kuzenga, hamba nani mono kosuma kumuwopolela mu jela, u munhu mono Mulungu yamudindiye?

¹⁵ Mazala, gazaga lono Mulungu si yatonyeze mvula, nago mahwazi, gazaga lono Mulungu yalecile mvula yitonye ko winji.

¹⁶ Mulungu yo yali vilungo, kanyhi yo we cisumisumi, wose wali mu miwoko yakwe.

¹⁷ Mwene kawawusizaga mahala, iwatemi, kawanozaga walongola wawa walele.

¹⁸ Kawawusaga watemi mu wutemi wawo kawa kuwanoza wakuwa wafungwa.

¹⁹ Kawanenenyhezaga i wakohani hamonga ne wanhu we vilungo.

²⁰ Kawanyamazaga i wanhu, wono wanhu wawetumbiye, kanyhi kagawusaga ne mahala i wakombi.

²¹ Kawakozaga cevu i wanhu we lilumbo, no kuwawusiza vilungo vyawo i walongola.

²² Kamulikaga hono hatitu nhe lifwa.

²³ Kagapelaga makungugo vilungo no wuwaha. Ninga kanyhi ho kagasuma no kugongomeza.

²⁴ Kawanozaga walongola wawo walelepa kawa kuwaleka wewajizwe, wayegayeje wajilile.

²⁵ Wakwalabatya kwalabatya mu citi, wakujenda wakupebesuka nhe wagalo 'jimbi.”