Jobu 1 - Luganuzi Luswanu Kuli Wanhu Wose 2002

Setani yakumujela Jobu

¹ Kwali na munhu litagwa lyakwe Jobu, munhu yuyu, yekalaga mu yisi ya Uzi. Munhu yuyu yali muhembi muno, kanyhi mwihuwilwa kuli Mulungu. Kanyhi yali munhu muswanu, mono si yali yendile kwituma nghani yo yose 'mbi.

² Nayo yali yena wana mupunghati wa cilume, hamonga na wana we cicekulu wadatu.

³ Kanyhi yali yasawile ngholo zificile elufu mupunghati, na ngamiya elufu yidatu, ne litewa lye zing'ombe zificile elufu monga, hamonga na ndogowe magana mahano. Kanyhi Jobu, yali yena wetumami wenji muno, kanyhi yali yo mugoli muno yali wene ku lubavu lwa kucilima.

⁴ Ne wanagwe we cilume, wali wazoweye kubita kulya ndigwa mu zikaya zawo mu wilecele, munhu ne zuwa lyakwe, yakucemela wayagwe. Nawo wetang'anilaga hamonga, wawacemelaga ne walumbu zawo vyono wadatu, wawa kuhanga zindigwa hamonga nawo.

⁵ Na nhondo zose lono wela hakali mitondo, lono walawa mu wulye wuwo, Jobu yelawaga nhondo zose hakali mitondo, kawa kuwalavizya makumbiko wanagwe wose monga monga, ho yaweze. Nayo yakawa yakunoza nhavivyo nhondo zose, hambi nha yehwesaga vyono, lunji yumonga wa muli wanagwe, kolowa ketuma wubi mu nzila yo kumutovula Mulungu wula kumanya.

⁶ Ne lizuwa lyali lyeza kufika, lyono lyali linojeye i viwumbwa vya ku wulanga, vilajile hali Muwaha Mulungu, kumbe nayo Setani yali yali mu ciligati yawo.

⁷ Baho Mulungu yakamuwuza Setani, yakamutya, “Alu 'gwe Setani, wina mulimoci bahano?” Nayo Setani yakamupitula yakatya, “Ane nili mu wupilime-pilime du, ako na ako mono'nze.”

⁸ Muwaha Mulungu yakamuwuza Setani yakamutya, “Ninga wumuwene mwitumami wangu Jobu? Hambi nha hasina munhu yunji mononze yiyi, mwihuwilwa, kanyhi munhu muswanu, mono yehwanile yuyu Jobu. Hambi Jobu nha kahembaga nene, kanyhi kelanjililaga muno, ho yalece kwituma nghani yo yose 'mbi.”

⁹ Nayo Setani yakapitula yakatya, “Wukwihwesa yuyo Jobu yali yasume kukuhemba, mhali yawe yasina cinji mugati yayo?

¹⁰ Hambi agwe nha kumudimaga nhondo zose, hamonga ne mhuga yakwe, hamonga na vyose vyono yena navyo. Kuyilugutizaga sunga ne milimo yakwe, kanyhi wumupelile na ng'ombe nyinji zimemile yisi yose.

¹¹ Ninga luno, hono wuwe nha wukumuwusiza vyose vyono yena navyo, nayo hodu kokukana calinze!”

¹² Muwaha Mulungu yakamutya Setani, “Ale viswanu, ne vinhu vyose vyono yena navyo, nha vili mu muwoko wako. Langa nghukulonjela vyono, wulecele lukulu kumutamisa Jobu mweneco.” Hodu hobaho Setani yakawa kuwuka hali Mulungu.

I wana wa Jobu hamonga ne sawo yakwe, vikongomezwa

¹³ Kukawa mwi'zuwa linji, lono wanagwe we cilume na we cicekulu, walizaga no kung'wa divayi mukaya yo muwaha wawo,

¹⁴ mwitumami yunji yakamangha, yakamuziza Jobu, yakamulonjela yakatya, “Ase cali cili mu mugunda cikulima ne zing'ombe, nazo zindogowe zikudima baho behi ne zing'ombe.

¹⁵ Waseba wawa kuza nhinicizo, wawa kuzisola zing'ombe hamonga ne zindogowe zose. Kanyhi wawa kuwawulaga ne wetumami wako wose, na yo nene du mono sigaye. Yonene du mono mhonile, ho nize nghulonjele zizo.”

¹⁶ Nayo lono yali yakali yakulolosa zizo, yakaza kanyhi mwitumami yunji, nayo yakamulonjela Jobu yakatya, “Limuli lizitowa zingholo liziwulaga zose, hamonga ne wadimi wayo. Nane yo nene du mono mhonile, ho nize nghulonjele zizo.”

¹⁷ Nayo lono yali yakali yakulolosa zizo, yakaza kanyhi mwitumami yunji, nayo yakamulonjela Jobu yakatya, “Wakalidayo waza mapuga madatu, wacihoma, wasola ne zingamiya zose, kanyhi wawawulaga ne wetumami wako wose. Nane yo nene du mono mhonile, ho nize nghulonjele zizo.”

¹⁸ Nayo yuyo lono yali yakali yakulolosa zizo, yakaza kanyhi mwitumami yunji, nayo yakamulonjela Jobu yakatya, “I wanago wose, we cilume na we cicekulu, lono wali kulya no kung'wa divayi mukaya yo muwaha wawo,

¹⁹ liza libeho yiwaha lyo mukukunzo, likulawilila ku nyika, liyikundujiza kaya, yiwagwila no kuwawulaga wose. Nane yo nene du nili wene mono mhonile, ho nize nghulonjele zizo.”

²⁰ Hodu nhondo, Jobu yakawa kwinuka, yakawa kuwudemulanga musweko wakwe ko wusungu muno. Yakawa kuwuceta zimvili mutwe wakwe, yakawa kwigumila hasi wugubama.

²¹ Yakawa kutya, “Ane nalelwa sina cinji, kanyhi nolofwa sina cinji. Muwaha Mulungu yo yalavya, kanyhi Muwaha Mulungu yo yawusize, Litagwa lyo Muwaha Mulungu lilumbwe!”

²² Na muli zizo zose zono zamwijelela, Jobu hamba si yamuhosa Mulungu yaye.