I Cililo 1 - Luganuzi Luswanu Kuli Wanhu Wose 2002

Wukalale wa Yelusalemi

¹ Lanje lu, likaya lili lya Yelusalemi vyono lyekala yiciwa, ninga ho lyali limemile wanhu wenji muno muno. Nalyo lyali lina ne lilumbo yiwaha mono yinze yose, ninga alu mulanje, lyehwana no mucekulu mufwile. Na mu makaya gose, lyene lyali nho mwana we cicekulu wo mutemi. Ninga alu lyakondya kusolwa no kutegulwa ku wuwanda.

² Alu Yelusalemi kekalaga yakulila cilo cose, ne mahozi gakuhuluma mu meso. Ne wendece wakwe wose we katali, wakondya kumuleka, hasina hamba monga mono yakumutuza. Na wono vyali vilunzize nayo, alu wamugaluka, wose weza walugu wakwe.

³ Nawo wanhu wa Yuda, weza wawanda lu, wono wasina wutazi wo wose. Hambi lu nha wakondya kuhamywa ku zikaya zawo. Weza wekala mu zi'si zinji, wasina hamba welecele wo wose. Wapilimwe ne walugu mbavu zose, wasina hamba nzila yo kwiponezya.

⁴ Nalu hasina hamba munhu monga kanyhi, mono kosuma kubita kuhemba ku Nyumba yo Mulungu mu vilo vye zi sikukuu. Ne wahinza wose wono wembaga, alu wali mu wugaye, nawo wakohani wakugula du. Ne milango ye likaya, yeza mu wambuce, nayo Sayuni yili mu wusungu wuwaha muno.

⁵ Ne walugu wa Yelusalemi wakondya kuyisuma no kuyibata mu vilungo vyawo. Nayo Muwaha Mulungu yayileka yinjile mu magazo, ku soko yo wubi wayo winji. Ne wanagwe nawo, wakondya kusolwa no kutegulwa kutali.

⁶ No lukumyo lwa Yelusalemi, aluno lwaweza cinhu cono capuluta katali. Ne walongola wayo wehwana ne zinzimba zono zigandile so nzala, Nalu wakondya kubita wasina vilungo, wakuhwagwa kumwande ya wono wakuwatyatya mu nyuma yawo.

⁷ Na mu wutamiswe wuwo, alu Yelusalemi yikukumbucila zo lukumyo lwayo lwe katali. Na lono yagwizaga mu miwoko ye walugu, hali hasina hamba munya kumutaziza. Ne walugu wakwe wakasecelela muno so wugwe wakwe.

⁸ No lukumyo lwa Yelusalemi lwakondya kuwuka, alu yeza yali cipwi, yebatwe ne cevu. Nalu yakugula yehundicize wusu wakwe, yakuwona soni. Yelusalemi yetipiza mweneco so wubi wakwe.

⁹ No wubi wakwe wijeye calinze, ninga mwene yakwilajila nha kotya si yali muli zizo yaye. Holeka ku soko yiyo, no wugwe wakwe wa mbuko, hamba hasina mono kosuma kumusindamika yaye. Ne walugu wakwe wamusuma, nalu mwene yakumulilila Muwaha Mulungu yamuwonele lusungu.

¹⁰ Ne walugu wakwe wakamuhiziza sawo yakwe yose. Nayo yakawawona ne meso gakwe mweneco, vyono wakwinjila mu Nyumba yo Mulungu, mono Muwaha Mulungu yali yawalemeze we makungugo walece kwinjila.

¹¹ Nawo wanhu wakwe wose wakugula, wakulondola ndigwa. Wakukawa vinhu vyawo na ndigwa, ho walece kufwa. Holeka likaya likulila likutya, “Gwe go Muwaha Mulungu wunghumbucile, wugalanje magayo gangu.

¹² “Alu Yelusalemi yikumulilila munhu wo wose mono yakupuluta, yikutya, ‘Ta muwone! Hasina hamba yunji mono yatuga magayo mawaha gono genha gaga nha vyono ane ninha.’ Magayo gono Muwaha Mulungu yamheleye mwi'kuwo lyakwe.

¹³ “Kagumila moto ku wulawa kucanyha, moto wono wukunyanya muli'ne. Kanhega no mutego, kangwisa ho hasi. Nalu yakondya kundeka nili wene, nili mu wusungu wuwaha.

¹⁴ “No wubi wangu wose mwene yawuwene, kanyhi kawuwopeleza wose hamonga, kawutumbika mu singo yangu. Nane nghuwula vilungo, ku soko yo wuzito wayo. Muwaha Mulungu kanyinjiza mu miwoko ye walugu wangu, nane niwa sina wo kunhaza.

¹⁵ “Hambi Muwaha Mulungu nha kawanoza vitung'ati wangu wawe si cinji kuli'ne. Hambi nha katuma wasilikale wawongomeza wazelelo wangu. Muwaha Mulungu kawakanyanjiza wanhu wangu, nha vyono wakobongaga zabibu mu ciya co kuminyila.

¹⁶ “Na yo soko yono yikuleka meso gangu gakulawa mahozi. Hasina hamba monga mono konhuza, hamba kusikamya. Hambi walugu wangu nha wakondya kusuma 'ne, ne wanhu wangu wasina hamba cono ciwasigaliye.

¹⁷ “Nane ngoloye mawoko gangu, ninga hasina hamba monga mono yakumhela wutazi. Hambi Muwaha Mulungu nha kandetela walugu ku wulawa mbavu zose. Nawo wakunhendela nha cinhu cono citipiye.

¹⁸ “Ninga Muwaha Mulungu yo we ling'ani, hambi nha yo nene mono si nali kwenda kumuhulika. Holeka muhulicizaje anye wanhu wose, muwuwone wugaye wangu. Hambi i wazelelo wangu hamonga ne wacekulu, nha wakondya kusolwa no kutegulwa kutali.

¹⁹ “Nane nghawacema wono cali cilunzize nawo, ho waze wamhele wutazi, ninga wakalema kuza. I wakohani ne walongola, wose wakafwila mwi'kaya, lono walondolaga ndigwa, walece kufwa.

²⁰ “Alu 'gwe go Muwaha Mulungu, wulangaje ta wusungu wono nina nawo mu nhumbula yangu! Ne nhumbula yangu nha yatulilwa muno no wukalale, ku soko yo wubi wangu. Alu mu zinzila, mweza mowuli wuwulaji, na mu milango namo, molili yifwa.

²¹ “Alu wulanje vyono, sunga na mu wugule wangu, hasina hamba monga mono yakumhela wutuzwe. Nawo walugu wangu wasangalaye, vyono agwe kundetela wugaye wono winha wuwu. Holeka lize mbela lizuwa lyako lyono wehuwiza, liwanoze walugu wangu, nawo wenjile mu magayo, wagaye nha vyono ane nghugaya.

²² “Wuwaling'anize so wubi wawo wose. Wuwalipicize nawo, nha vyono wundipicize nene so wubi wangu. Nghugula ko wusungu muno, ne nhumbula yangu yizilice.”