Isaya 8 - Luganuzi Luswanu Kuli Wanhu Wose 2002

U mwana wa Isaya, yakuwa co citanjilo kuli wanhu

¹ Muwaha Mulungu yakanonjela yakatya, “Wusole mbawo ngazi wandice mumo helufi mbaha zono zikutya, ‘WUTECE MBELA MBELA, WUPUMHE MUSUNHO.’

² Ninga wusole wanhu wehuwilwa wejete, u mukohani Uliya, hamonga na Zekaliya mwana wa Yebelekiya, wawe wahomelezi.”

³ Ninga hanyuma mugolece wangu yakatuga 'nda. No mwana wetu we cilume yali yeza kulewa, u Muwaha Mulungu yakanonjela yakatya, “Wumucemelaje mwana litagwa lya ‘Wutece Mbela mbela, Wupumhe Musunho.’

⁴ No mwana yuyo lono kowa yakali nawiluka no kumanya kucema ‘Yaya’ na ‘Baba’ I sawo yose ya Damesiki, hamonga ne mateka ga Samaliya, vyosolwa no kutegulwa kuli mutemi wa Ashuli.”

Mutemi wa Ashuli yakuza

⁵ Muwaha Mulungu yakanonjela kanyhi.

⁶ Yakatya, “Alu i wanhu wawa vyono wagalema malenga ga Shilo gono gavwilaga mhola mhola, langa wamucicimilaga mutemi Lezini, no mutemi Peka.

⁷ Holeka nane no Muwaha Mulungu, aluno nomuleka mutemi wa Ashuli yaze hamonga ne wasilikale wakwe wo wulugu, wayihome Yuda. Nawo wohuluma nhe lihwazi lye malenga ge likolongo lya Efulata, nha vyono galapukaga.

⁸ Nayo kohuluma no kufika sunga ko ku Yuda, kokola mose, koyigubika yisi yako yose 'gwe go Imanuweli. Ninga Mulungu yali hamonga nase! Mwene kogatandakula mabawa gakwe yayicitile yisi.”

U wiwikanize we bwete we wanhu

⁹ Holeka mwikongholelaje hanhu hamonga ko woga, anye nyo makungugo! Anye nanye mono muli kutali ku zimhelo ze yinze, muhulicize. Alu, mwiwikanizaje so wihomi, ninga mweze no woga! Heya mwiwikanizaje, ninga mweze no woga!

¹⁰ Mwihehaje! Ninga hamba si mokwambulila cinji yaye. Anye mulonje du mu nghango yenyu! Ninga yowa nghani ya bwete du. Hambi ase, Mulungu nha yali hamonga nase.

Muwaha Mulungu yakumusugula Muwizi

¹¹ Nayo Muwaha Mulungu yakasugula kwe vilungo vyakwe viwaha, nha vyono ndece kutyatya nzila yono wanhu wayikolile. Yakanyitya,

¹² “Wulece kwihanza mu mahweso ge wanhu, hamba wulece kuvyogopa vinhu vyono wene wavyogopile.

¹³ Weze kukumbucila, vyono, ane no Muwaha Mulungu, u Mulungu we mihanga, nelile, ane yo nene nili wene du, mono wunojeye wumhele cogopo.

¹⁴ Na ku soko ye cogopo co wele wangu, ane nowa i hanhu ho wutizizo, kanyhi libwe lyono wanhu wokwikobala, kanyhi nowa litalawe lyono lyowagwiza i wanhu wa mu wutemi wa Yuda na Isilayeli, kanyhi nowa mutego wo kuwagwiza ne wanhu wa Yelusalemi.

¹⁵ Na wenji wokwikobala, wogwa no kubenanjika. Wokwibatwa mu mutego.”

Suguzi kuli zo wuwuza wafu

¹⁶ Nye nyo wejizwa wangu, mulanjilile, muzikamise muno zinghani zono mwejizwa, zono Mulungu yandajiliza.

¹⁷ Ninga hamba yiwe, Muwaha Mulungu yehundice ho yalece kuwonwa ne wanhu wakwe, ninga ane nomwitumbila du, no kuwika witumbilo wangu muli mwene.

¹⁸ Nane 'lu, nili bahano hamonga ne wana wono Muwaha Mulungu yamhela, Muwaha Mulungu we Mihanga, mono ligoda lyakwe lyo wutemi, lili mwi'tunda lya Sayuni. Nayo kacituma ase ciwa nha vitanjilo ne mezino kuli wanhu wa Isilayeli.

¹⁹ Ninga hono wanhu watye, mubite mu waganga muketoweleze visangu, na kuli wahawi wono wapwepwaga, wakulonga ne lizi yidodo. Wamutyeni “I wanhu yiwanojeye wawuze zinghani zawo kuli wafu ku soko ye womi.”

²⁰ Nanye muwapitule muwe kutya, “Ciba muzihulice zono Muwaha Mulungu yakumwijizenyi! Mulece kuwahulika i waganga wo wulambi. Hambi zizo zono wakumulonjelenyi, nha sizo-mutazenyi cinji yaye.”

Lipango lye Magazo

²¹ Nawo wanhu wolowa kuyumba-yumba mu yisi, wakugaya, kanyhi wadabuce. Na mumo mu wudabuce wawo, likuwo lyowakola, hanyuma wawe kumulijita mutemi wawo, hamonga no Mulungu wawo. Wosuma kugalamila ku wulanga,

²² hamba woyilanga yisi yose, ninga hamba si wowona cinji, langa wowona wugaye, no wutitu. No wutitu wuwo wukogofya muno, nawo mumo mo wogumilwa.