Isaya 63 - Luganuzi Luswanu Kuli Wanhu Wose 2002

Wusume wo Muwaha Mulungu muli Makungugo

¹ “Alo yuyo nani mono yakulawa kwi'kaya lya Bozila mu Edomu? Alo yo nani lo mono yavwalile myenda ye nhojo, midunghu kasu. Mono yakujenda-jenda mu wuwaha we vilungo vyakwe? Ayo yo Muwaha Mulungu mono yali vilungo ku wuponye, yo yakuza kwanza zo wusume wakwe.

² Alo nhawule lo myenda yakwe midunghu kasu, yihwanile myenda yo munhu mono yali kuminya zabibu, yanoze divayi?”

³ Nayo Muwaha Mulungu yakupitula yakutya, “Nakondya kuwakanyanjizanga i makungungo nha zabibu, ninga hasina hamba munhu monga mono yazize kunhaza. Nane niwakanyanjiziza mwi'kuwo lyangu, ne sakami yawo yimizucila mu myenda yangu yose.

⁴ Nane nghatya, vyono, i cipango co kuwaponezya wanhu wangu, cakondya kufika, co cipango luno co kuwalipiciza i walugu wawo.

⁵ Ninga nghezina muno, nali neza kuwona vyono hasina hamba munhu monga mono kosuma kunhaza. Ninga likuwo lyangu du lyo limhelile vilungo vyo kwitumila zizo, sunga niwa kutuga wusume nili wene.

⁶ Na mwi'kuwo lyangu nghagakanyanjiza makungugo gose nghagongomeza. Nghayimwaga hasi i sakami yo wumi wawo.”

U wuswanu wo Muwaha Mulungu kuli Isilayeli

⁷ Nane nolukumya lusungu lo Muwaha Mulungu, na kanyhi nghumukumya muno so zose zono yakondya kucitendela. Hambi nha kawamotya muno i wanhu wa Isilayeli ku soko yo lusungu lwakwe no wendo wakwe.

⁸ Hambi Muwaha Mulungu nha yatya, “Awa nha wanhu wangu, hamba si wonghonga yaye.” Holeka ku soko yiyo, yakawaponya,

⁹ ku wulawa mu magayo gawo. Hamba si yali malayika yaye mono yawaponya, langa Muwaha Mulungu mweneco du yo yawaponya. Yawaponya ku soko yo wendo wakwe no lusungu lwakwe. Hambi nha yawadima sunga na mu vilo vyono vyapuluta,

¹⁰ ninga wene wakamubeza Mulungu, wakamukalaza muhe wakwe mono yelile. Holeka nayo Muwaha Mulungu yakawapitucila yakawa mulugu wawo, yakawahoma.

¹¹ Baho nhondo nawo wanhu wakwe, wakakumbucila i vilo vye katali, vya Musa u mwitumami wo Muwaha Mulungu, wakawa kwiwuza wakutya, “Alu mwene yali hayi u Muwaha Mulungu, mono yawaponya i walongola we wanhu wakwe mwi'lenga? Hamba yali hayi mwene u Muwaha Mulungu mono yamupela Musa u muhe wakwe?

¹² Hamba yali hayi mwene Muwaha Mulungu mono yetumila zimbaha muli Musa, kwe vilungo vyakwe vinji, yakagatemanula i malenga ge lilenga, yakawalowoseza wanhu hakavu haciligati ye malenga, ho yetujile lilumbo lye cibitilila?”

¹³ Nawo wajenda wasina mahwele nhe zifwalasi za mu nyika, hamba si wekobaza yaye, hambi u Muwaha Mulungu nha yo yawatongaga.

¹⁴ Wakawa nha ng'ombe zikutegulwa kudima mwi'hanze lidece lya mwi'lolo. Na mu nzila yiyo, u Muwaha Mulungu, yakawapela wucehe wanhu wakwe. Yawatonga wanhu wakwe, na mu nzila yiyo, yakaliletela lilumbo yiwaha litagwa lyakwe.

Lilombo lyo kulomba lusungu no wutazi kuli Mulungu

¹⁵ Gwe go Muwaha Mulungu, wucilangaje ase ku wulawa kuko ku wulanga ku wikalo wako, mu wele wako no lukumyo. Alo wupiligazi wako wa kuli'se, wuli hayi lo? Hamba vilungo vyako, vili hayi lu? No wendo wako wa kuli'se, hamonga no lusungu lwako, vili hayi lo? Wulece kucisemwa yaye.

¹⁶ Hambi'gwe nha wuli sogo yetu. Sunga ne walezi wetu Abulahamu na Yakobo, si wacimanyile ase yaye. Ninga agwe go Muwaha Mulungu, agwe yo gwegwe sogo yetu. Yo gwegwe mono kuciponyaga nhondo zose.

¹⁷ Alu socici lu wukucileceleza cipatuce mu zinzila zako? Hamba socici lo, wukucileceleza ciwe cisina cihuliko no kukuleka? Alu wuwuye ku soko ye wetumami wako na ku soko ye wanhu wono wawezaga wako nhondo zose.

¹⁸ Ase co wanhu wako wasiwanulwe, cali cakondya kusolwa ne walugu wetu kwa cidaha cidodo du, nawo wakawukanyajizanga wuhembelo wako.

¹⁹ Nagwe wukacitendela kotya nha si wali wucitemile yaye, kotya nha si cali cili wanhu wako ng'o.