Isaya 52 - Luganuzi Luswanu Kuli Wanhu Wose 2002

Mulungu koloyiponya Yelusalemi

¹ Gwe Yelusalemi, weze ne vilungo, wuwuvwale wuwaha wako kanyhi! Agwe 'gwe kaya lyono lyelile lyo Mulungu, wivwikaje kanyhi nhojo yako! Hambi i wanhu wono si wamumanyile Mulungu, nha si wolokwinjilila lukulu kanyhi mu milango yako.

² Wikung'unhaje wilejehe 'gwe Yelusalemi, winukaje wuwuce mu manghundi, wikale mwi'goda lyako lyo wutemi! Muwopole manyolo gono gali gamuwopilenyi anye nyo wanhu wa Sayuni!

³ Nayo Muwaha Mulungu we mihanga, yakuwalonjela wanhu wawa yakutya, “Anye mwaguzwa bwete ku wawanda, kanyhi mokombozwa bwete, si molavywa hamba sendi monga yaye.

⁴ Na lono mwabitila kwikala ku Misili nha muli wajenzi, mwabita ko kwiyendela nyenye nyo weneco. Ninga Mwashuli yakamusolenyi kwe vilungo, yakamutegulenyi kutali, hamba si mwalipwa cinhu co cose yaye.

⁵ Nalu kanyhi zikejela zo zi zilya na ku Babiloni. Anye mwasolwa, ninga hamba si mwalipwa cinji yaye. Na wose wono wakuwa kumutemenyi wakuwa kwilumba no kwivuna hamonga no kulajila lubedegalo kuli'ne.

⁶ Ninga mu vilo vyono vikuza, agwe ho kolomanyila nha vyono ane yo nene Mulungu mono nalonga kuli'gwe.”

⁷ Yo nghani yo wizine lono wukuwona munhu yakuza yakolile mu matunda, yakuleta nghani swanu, nghani yo mulamu! Mono yakuganula zo wusume, yakuyitya Sayuni, “Mulungu wako yo mutemi!”

⁸ Nawo walindiliza likaya, wazozize hamonga so nyemo! Hambi nha wakuziwona ne meso gawo weneco, vyono Muwaha Mulungu yakuwuya ku Sayuni!

⁹ Nanye nyo matongo ga Yelusalemi, muzoze so nyemo! Hambi Muwaha Mulungu nha koliponya likaya lyakwe no kuwasindamika wanhu wakwe.

¹⁰ Muwaha Mulungu kolokwitumamila vilungo vyakwe vyono vyelile, yawaponye wanhu wakwe, ne yinze yose yoloziwona zizo.

¹¹ Mumanye vyono wose mwakondya kuwuka mu Babiloni, anye wose mono muvidinghulaga viya vye Nyumba yo Mulungu! Kanyhi mulecele lukulu ku vipamiza vinhu vyavu, Mutuluce muwuce, akuno mwelile.

¹² Ninga muhinzo wuwu, mowa musina soko yo kuwucila musunho, kanyhi mowa musina soko yo kwihema. Hambi u Muwaha Mulungu u Mulungu wenyu nha yo komutonjenyi no kumucitilenyi mbavu zose.

U mwitumami mono yatuga magazo

¹³ Muwaha Mulungu yakutya nhavi, “U mwitumami wangu kolomoteswa mu mulimo wakwe, nayo kolotuga lilumbo yiwaha muno muno.

¹⁴ Ne wanhu wenji watinuswa muno wali weza kumuwona, hambi mumbwa yakwe nha yali yihodanjice sunga yikawa vikamu kwijela nha munhu.

¹⁵ Ninga aluno makungugo menji gomwizina sunga ne watemi si wololonga cinji yaye so wizine. Nawo wololanga no kwizuka cinhu cono wali wakali nacimanya yaye.”