Isaya 46 - Luganuzi Luswanu Kuli Wanhu Wose 2002

¹ “Alu ayi yo ndumilizo ye milungu ya Babiloni! Hambi Beli na Nebo, vyono wavihembaga katali, ninga aluno vyeza vili mucanyha ye zindogowe, vyeza mutegulo muzito mu migongo ye zinimu zono zikataye.

² Navyo lu vihwani hamba si vyosuma kwiponya vyeneco. Hambi nha vyakondya kusolwa no kutegulwa kutali. Holeka ayi yo ndumilizo ye milungu ya Babiloni!

³ “Ale, ta muhulicize anye nyo wana wa Yakobo, anye mo masigazwa ge wanhu wangu. Ane yo nene mono namukocenyi ku wulawa wulelwe wenyu.

⁴ Ane yo nene Mulungu wenyu, nane nomukamisenyi, na mu wukombi wenyu sunga zimwi zicindice ane nomudimenyi. Hambi nha yo nene mono namuwumbenyi, holeka nomudimenyi kanyhi nomupelenyi wutazi no kumuponyenyi.”

⁵ Muwaha Mulungu yakutya nhavi, “Alo mwene monyihwananiza na nani? Hamba ho yuli yunji mono yanyihwanile nene?

⁶ Wanhu wawopolaga vifuko vyawo wawa kumwaga zahabu hasi, wakuwa kupima fweza mu vipimo. Hanyuma wawa kumutuga mutyani yawatyanile mulungu, hanyuma wawa kwinama ha mwande yo mulungu yuyo wawa kumuhemba!

⁷ Na hanyuma yayo wawa kumupika mu mawega gawo mulungu yuyo wakumudinghula. Wakumusimya hanhu hanji, kawa kwima baho du hamba kusuma kutela hanji hamba hadodo. Na hono munhu yabite baho yakamulombe, mulungu yuyo we fweza, si yakusuma kumupitula, hamba kumupela wutazi wo wose wa mu magayo gakwe.

⁸ “Holeka anye nyo wabi, muzikumbucilaje zi zino, muzihwese zono nakondya kwituma.

⁹ Kanyhi muzikumbucile na zono zejela katali, ho mumanye nha vyono, ane yo nene du Mulungu, na vyono hasina mulungu yunji mono yehwanile nene.

¹⁰ Nakondya kuwila ku wulawa katali zono zolokuza na ku wulawa katali nali nakondya kuzilonga zono zolokwijela. Nane nghalonga nghatya vyono mahweso gangu si galasumwa yaye, langa nokwituma zose du nha vyono nali nihwesize nitume.

¹¹ Nomucemeleza munhu yaze ku wulawa ku lubavu lwa kucilima, nayo koloswepa hasi nha mwewe yazifisilize zose zono nizihwesize. Nazilonga, nazo si zoleka kwitumwa.

¹² “Ale, muhulicizaje ta, anye nyo wanhu mono musina cihuliko, mono mwihwesaga nha vyono wiling'ano wuli kutali.

¹³ Nowusejeleza wiling'ano wangu nawo hamba si wuli kutali yaye. No wusume wangu hamba si wocela yaye noyiponya Yelusalemi, niwapele ne lilumbo lyawo wanhu wa Isilayeli.”