Isaya 45 - Luganuzi Luswanu Kuli Wanhu Wose 2002

Muwaha Mulungu yakumuhagula Kulo

¹ Muwaha Mulungu yamuhagula Kulo yawe mutemi! Kamuwika ho yagasume makungugo yawawusize watemi vilungo vyawo. Nayo Muwaha Mulungu komudigulila Kulo milango ye makaya gose. Ninga Muwaha Mulungu yakumulonjela Kulo yakutya,

² “Ane yo nene du mono nokuwikaniziza nzila yako, nogatenjelemula matunda hamonga ne vigongo, noyibenanga ne milango ye vyuma hamonga ne madindilo gayo gose.

³ Nane nokupela viwutwa vyono vili hatitu hanhu ha cinyele. Nagwe baho ho komanyila vyono ane yo nene Muwaha Mulungu. Kanyhi na vyono Mulungu we Waisilayeli yo yakucemile mwi'tagwa lyako.

⁴ Ane nghakuhagula agwe, ho wumutaze mwitumami wangu Isilayeli, wanhu wangu wono nawahagula. Nane nakondya kukupela lilumbo yiwaha hamba wuwe agwe si wumanyile 'ne.

⁵ “Ane yo nene du Muwaha Mulungu hasina hamba mulungu yunji kanyhi, langa yo nene du. Nane nokusikamya, hamba wuwe agwe si wumanyile'ne ng'o.

⁶ Nane nghuzinoza zizi ho wanhu wose ku wulawilila ku mhelo ye yinze sunga ku lubavu luyagwe ho wamanye vyono ane yo nene du Muwaha Mulungu, na vyono hasina hamba mulungu yunji kanyhi langa yo nene du.

⁷ Yo nene mono nawuwumba wuzelu no wutitu yo nene mono ndetaga wumoteswe no wongomele. Yo nene du Muwaha Mulungu, mono nizitumaga zizi zose.

⁸ Nane nololeta wusume ku wulawa ku wulanga nha mvula, nayo yisi yolokwiwikaniza ho yiwubocele na mu mapango gago wolowa mulamu hamonga no wiling'ano. Ane no Muwaha Mulungu mono nolozinoza zizi zijele.”

I vilungo viwaha vyo Mulungu

⁹ “Wulenyi! Hambi nyungu yono yihwanile zinyungu zose, hongo yosuma kwisumaniza na mono yayiwumba? Hambi lilongo nalyo, lyosuma kumuwuza mono yakuliwumba liwe kutya, alu wukunoza cici? Hamba nyungu ma, yosuma kumutya mono yayiwumbile yiwe kutya, aa, agwe si wumanyile kuwumba?

¹⁰ Hamba ho yuli munhu wo wose, mono kosuma kwijelela yawatye walezi wakwe, ‘Alu nhawule mukandela nili nhavivi?’

¹¹ Ninga Muwaha Mulungu, u Mulungu mono yelile wa Isilayeli, mono kawikanizaga zose, yakutya, nhavi, ‘Agwe wusina soko yo yose yo kumbuza-mbuziza ze wanangu, hamba kunonjeleza zono zinojeye nitume!’

¹² Hambi nha yo nene mono nayiwumba yinze, hamonga ne wanhu wose wono wekaye mumo. Na mu vilungo vyangu, nghawutandaza wulanga. Kanyhi yo nene mono nghulilajiliza lizuwa, no mwezi, hamonga ne zinyelezi.

¹³ Ane yo nene mono namusagahiza Kulo ho yawufisilize wuhile wangu yaziwice zose mu mugoloka. Nane nozigolosa zinzila zakwe zose mono kowa kukola. Mwene yo kololizenga kanyhi likaya lyangu lya Yelusalemi. Nayo kowawika welecele i wawingwa wangu wose, nayo hamba si kolopegwa malipo yaye, hamba cihumbilizwa co cose ho yetume zizo.” Vyo yakutya u Muwaha Mulungu.

¹⁴ Muwaha Mulungu yakuwalonjela we nghungugo ya Isilayeli yakutya, “Ne sawo ya mu yisi ya Misili, na ya mu yisi ya Kushi, yose yowa yenyu nyenye. Nawo i wanhu watali muno wa ku Seba, awo wowa wetumami wenyu, womutyatyenyi akuno wawope ne manyolo. Wofugama ha mwande yenyu wawe kutya, ‘Mbeka Mulungu yali hamonga nanye, kanyhi mweneco yo Mulungu du yali wene.

¹⁵ Mulungu we Waisilayeli mono yakuwaponya wanhu wakwe mbeka yo Mulungu mono yehundice yali wene.

¹⁶ Ne wanhu wono wasesaga vihwani wose wolokozwa soni, na wose hamonga wolopuvywa.

¹⁷ Ninga Isilayeli koponywa no Muwaha Mulungu ne mhonelo yakwe yowa ya cibitilila, ne wanhu wakwe, hamba si wolokozwa soni yaye.’ ”

¹⁸ No Muwaha Mulungu yo Mulungu du yali wene mono yawuwumba wulanga! Kanyhi yo yayisimya no kuyiwumba yinze yakayinoza yisikame no kwikala cibitilila. Hamba si yayiwumba ho yiwe yitongo du lya caka, langa yayiwumba yiwe wikalo we wanhu. Kanyhi yo mweneco mono yakutya, “Ane yo nene Muwaha Mulungu du hamba hasina kanyhi mulungu yunji, langa nene du.

¹⁹ Nane hamba si nonjile zizi cinyele, hamba kuwuhundika yaye wuhile wangu. Hamba lunji kuwalomba wanhu wa Isilayeli ho wandime mu yisi nyhiwa yono ndekwe. Ane yo nene no Muwaha Mulungu, nane nghulonga ze mbeka, no kuzinoza zo mugoloka zimanyice.”

U Muwaha Mulungu we yinze ne vihwani vya Babiloni

²⁰ Muwaha Mulungu yakutya nhavi, “Ale! Mwikongholelaje hamonga, anye nyo wanhu we makungugo gose, wose mono muponile mu wugwe wo wutemi wa Babiloni, muze wose ku wuling'anizwe! Anye nyo wanhu mono mudinghulaga vihwani vyenyu vye mabici viseswe, muwa kulomba kuli milungu yono si yomuponyenyi yaye. Anye nyo wanhu walele!

²¹ Ale nzonyi muzilonje zenyu ha mahakama, muwalece wono wasitakwe walongane weneco wose. Alu mwene mukwihwesa nani mono yawila mu vilo vye katali vyono zizi zolokwijela? Yo nene du Muwaha Mulungu, u Mulungu mono kawaponyaga wanhu wakwe. Na hasina mulungu yunji, langa nene du.

²² “Muze kuli'ne, ho mupone anye nyo wanhu we yinze yose! Ane no Mulungu nili wene, nili baha.

²³ No wihuwizo wangu wa mbeka, hamba si wopituka yaye. Kanyhi nelahiza, nghehuwiza ko mulomo wangu nha vyono wanhu wose wolokuza wafugamile nene, wehuwize nha vyono wowa wali cihuliko kuli'ne.

²⁴ “Nawo wololonga wawe kutya vyono wusume ne vilungo, vyose vili muli'ne, ninga wono wasulile'ne, wose wolokozwa soni.

²⁵ Nene no Muwaha Mulungu nolowaponya we ndelo yose ya Yakobo, nawo wolonghumya no kunumbiza nene du.