Isaya 4 - Luganuzi Luswanu Kuli Wanhu Wose 2002

¹ Ne vilo vivyo kolo vikuza, wacekulu mupunghati, wolomwisoka mulume monga, wakutya, “Ase cokwilisa no kwivwika co weneco du, ninga cono cikusaka du kuli'gwe, cikusaka cijele vyono cili wacekulu zako, ho ciwusizwe cevu co wigane.”

Yelusalemi yolonozelezwa

² Vilo vikuza, lono Muwaha Mulungu kolovinoza vilimwa vyose vya mu'si, hamonga ne mibici yose, viwiluce viwe kwendeza. Nawo i wanhu wa Isilayeli wono wopona, wolosangalala no kwilumbila mu vilimwa vya mu'si.

³ Na muli wose mono kololekwa mu Yelusalemi, mono Mulungu yamulecile mumi, yuyo kolocemwa yelile.

⁴ Nayo Muwaha Mulungu, kwe vilungo vyakwe, kololing'aniza no kulyeza likungugo, no kuwukwema wubi wa Yelusalemi, hamonga ne sakami yono yetika mumo.

⁵ Nayo Muwaha Mulungu kololeta livunde ligubice mu misi, mwi'tunda lya Sayuni, hamonga na mucanyha ya wose wono wowa wehangulize he 'tunda, hamonga ne lyosi, no wung'alale we malambi go moto ku cilo. Nawo u lukumyo lo Mulungu, wolomema no kulidima likaya.

⁶ Nalo lukumyo, wololipela likaya mubeho so lizuwa lya mu misi, no kulinoza hawe hanhu hono hapolile, hono howa hacitiywe mvula ne mbeho yo mukukunzo.