Isaya 1 - Luganuzi Luswanu Kuli Wanhu Wose 2002

¹ Citabu cici cina wulolose we zinghani zono Mulungu yamugubulila Isaya u mwana wa Amozi, mu vilo vya Uziya, na Yotamu, na Ahazi, na Hezekiya, lono wali watemi wa Yuda na Yelusalemi.

Mulungu yakuwakalipila wanhu wakwe

² U Muwaha Mulungu yakutya, “Muhulicize ta nimulonjelenyi anye nyo wulanga ne yinze! Yo nene mono nawalisa i wana, kanyhi nghawawilusa, ninga alu, wakondya kumbedegala.

³ Hamba ne zing'ombe, nha zimumanyile mono yazisawile, ne zindogowe nazo, zimanyile manyi manyi hanhu hono mutwa wawo kazidimilaga. Ninga woyi hee! I wanhu wangu Waisilayeli si wamanyile yaye, hamba kwizuka du bwete.”

⁴ Holeka, alu mokongomezwa, anye nyo likungugo lyono lina wubi, anye nyo wanhu wono mwendile mafupo, kanyhi muli wabi! Ninga mumanye nha vyono, u wubi wenyu wuwo, womukulunhyenyi hasi! Hambi anye nha mwamulema Muwaha Mulungu, u Mulungu mono yelile we Waisilayeli. Mwakondya kumupitucila mugongo.

⁵ Ninga lu, ho so cici mukujendelela kumubedegala? Ane nghuwona, mukali mwendile mucile kulipicizwa. Alu mutwe wako Isilayeli, wakondya kutuga mazeya gose, nhumbula yako nayo, hamonga no mutima wako, vyose vyatimba.

⁶ Na ku wulawa ku zinzayo ze magulu gako, sunga ko ku mutwe, musina vilungo, langa mozili nghomele du, ne madali, ne malonda gono gawolile, gono si maminywe, hamba kuwopwa na bandeji, hamba kudejefywa ne mafuta yaye.

⁷ Ne yisi yenyu yaweza yitongo, ne makaya genyu gatakamizwa no moto. Ne wajenzi wayisola yisi yenyu ha meso genyu, no kuyongomeza, hamonga na vyose vyono vili mumo.

⁸ Nalu likaya lya Yelusalemi du lili wene, lyo lisigaye, nalyo lyasigala nhe kaya lyono lipilimwe ne walugu, lyono lyeza lisina hamba wutazi, lyeza nha cilingo co mugunda we mizabibu kanyhi nha cilingo cono cili mu mugunda we matanga mugati.

⁹ Na hono Muwaha Mulungu u Mudaha vyose, u Mulungu we Mihanga yali yalece kusigaza mumo wanhu wanji womi, mbeka, mhali Yelusalemi yongomezezwe lukulu, nha vyono Sodoma na Gomola zongomezwa.

¹⁰ Nagwe Yelusalemi, i walongola wako hamonga ne wanhu wako, wose nha wabi wehwana ne wanhu wa Sodoma na Gomola. Alu muhulicize zono Muwaha Mulungu yakumulonjelenyi. Muteje likutu kuli zono Mulungu wetu yakumwijizenyi.

¹¹ Yakutya nhavi, “Alu mwene, anye mukwihwesa vyono 'ne, nghugasaka gago makumbiko genyu, gono mukundavizya? Ane nha nakondya kucilwa ne vilavywa vyenyu vinyanywe vye zi nduwilu, vyono mukundavizya nha makumbiko, hamonga ne mhama ye zimitugo zenyu zono zijinile. Nakondya kuyikatala sunga ne sakami ye zing'ombe, hamba ye zingholo, hamba ye zimhene.

¹² Mwene nayo yo nani, mono yakamutyenyi vyono mweze kundetela vivyo vyose, lono mukuza kuhemba 'ne? Hamba mu Nyumba yangu?

¹³ Holeka yo nghani ya bwete du, yo kujendelela kundavizya vilavywa vyenyu. Hambi ane nha si nghwendezwa kanyhi, ne mhunjile yo wuvumba wono mukufusa. Hamba ne zi sikukuu zenyu ze Ndawo yo Mwezi, ne zi Sabato, hamba no wihangulize wenyu wo wuhembi, ane hamba si nozivumila yaye, hambi nha zakondya kuwifywa no wubi wenyu.

¹⁴ Nane hamba si nghuzisacila lukulu, zi sikukuu zenyu ze Ndawo yo Mwezi, na ze vilo vyono vyelile. Hambi nha zeza nha mutegulo du kuli'ne, wono si nosuma kuwudinghula yaye.

¹⁵ “Na lono mowa kunyasula miwoko yenyu kucanyha mu wulombe, hamba si nomutondowozenyi yaye. Hamba mulombe muhidimbaye, si nomuhulicizenyi ng'o, hambi miwoko yenyu, nha yimemile wuwulaji wose.

¹⁶ Holeka alu, mwizuguze, mwiyeze, muwusize lukulu hali'ne, u wubi wono mukwituma, mulece kwituma vibi,

¹⁷ mwiyijize ku wituma ziswanu. Mwitume zo wiling'ano, muwataze wono wakwiwonelwa, muwapele ze ling'ani i wana wono wasina walezi, muwataze i wacekulu wafwile mu zinghani zawo.”

¹⁸ Alu Muwaha Mulungu yakutya nhavi, “Ale, muze cilongane cizimale. Vyono hamba masutya genyu gawe madunghu ninga ane nomukwemenyi muwe wazelu swee nha seluji. Hamba gawe madunghu kasu, gowa mazelu swee, nho wukunzeje we ngholo nzelu.

¹⁹ Na hono muhulice 'ne, nanye molya vinhu viswanu vyono vikulawa mu'si.

²⁰ Ninga hono muleme no kufyula, mbeka mofwa wose mukongojele. Ane yo nene Muwaha Mulungu, mono nizilonjile zizi.”

I likaya lyo wubi

²¹ Ati, ta, mulanje! Likaya lyono lyali yihuwilwa, alu lyeza yikaya lyo wusenyha! Na kumbe mu mapango ganji, ho lyali limemile wanhu we ling'ani. Ninga lu mulanje, lyekala ne wanhu wawulaji du.

²² Gwe Yelusalemi, mwene wumanyile, ha mwamulizo vyono wejelaga winha fweza, ninga aluno, woyi, yeza nghani ya bwete du. Wali winha divayi swanu muno, ninga aluno weza winha malenga du.

²³ Ne walongola wako weza wagaluci, nalu wakondya kwiyenda ne wahizi, alu weza wabocelaga vipegwa hamonga ne mafupo. Wakondya kuleka no kuwataza, i wana wono wasina walezi, mu zinghani zawo, hamba kuwahuliciza bwete i wacekulu wafwile mu zinghani zawo.

²⁴ Nalu muhulicize zono yakulonga u Muwaha Mulungu u Mudaha vyose, u Mulungu wa Isilayeli yakutya, “Alu, nowalipiciza walugu wangu, nawo si wongaza kanyhi.

²⁵ Nomunozezenyi anye nghani swanu, nomwezenyi mu wavu wenyu wose, nomuwusizenyi zimbi zose.

²⁶ Nane no mupelenyi walongola, hamonga ne wanyamhala wenyu, nha vyono mwali mwina nawo baho ha mwamulizo. Na hanyuma nhondo, Yelusalemi ho yocemwa, likaya lyo wiling'ano, likaya lihuwilwa.”

²⁷ Alu, vyono Muwaha Mulungu mwihuwilwa, holeka koliponya likaya lya Yelusalemi, hamonga na wose wono wali mumo wono wonena wubi wawo.

²⁸ Ninga kowongomeza i wasutyi wose, hamonga ne wabezi, wono wakumubeza mwene. Kanyhi kolowawulaga wose, wono wakumulema mwene.

²⁹ Nanye molokalala muno, vyono mwahembaga mabici, hamonga ne zi busitani zisiwanulwe.

³⁰ Nanye molonyala nho mubici wo munghola wono wunyalile, kanyhi kotya nha busitani yono si yimwajilwaga malenga.

³¹ Nawo i wanhu we vilungo, wolokongomezwa no wubi wawo weneco, nha vyono mabeleje gakuwa kwaka mu moto. Na hasina munhu mono kolowemila mu wongomele wuwo.