Ezila 1 - Luganuzi Luswanu Kuli Wanhu Wose 2002

Koleshi yakulajiza Wayahudi wawuye ku Yelusalemi

¹ Ale mu mwaka mulongozi wa mu wutemi wo mutemi Koleshi we yisi ya Pelisiya u Muwaha Mulungu yakazinoza zose zono yazilonga mu nzila yo muwizi Yelemiya zikawa za mbeka. Yakamulonjela Koleshi yalavye yilajilizo lyandikwe no kutegulwa likasomwe hanhu hose mu wutemi wakwe.

² “Ali, lyo lilajilizo lyono yalilavya Koleshi mutemi wa ku Pelisiya, nalyo lyatezaga. U Muwaha Mulungu, u Mulungu wa ku wulanga, yahagula niwe mutemi mu yinze yose, kanyhi yamhela no mulimo wo kumuzenjela Nyumba yakwe ku Yelusalemi ya Yuda.

³ Mulungu yawe hamonga na nyenye wose mo wanhu wakwe. Alu mubite ku Yelusalemi, ho mukazenje kanyhi Nyumba yo Muwaha Mulungu, u Mulungu wa Isilayeli, hambi nha yo Mulungu mono kahembwagwa ku Yelusalemi.

⁴ Munhu wo wose muli nyenye mono yahamywa wulawa ku Yelusalemi, hono yawe yakusaka wutazi so wuwuya ku Yelusalemi, ale yinojeye wekalani wayagwe wamupele wutazi, wamupele zahabu na fweza ne mitugo, hamonga ne vilavywa vyo kumulavizya Mulungu ku Nyumba yakwe ku Yelusalemi.”

⁵ Baho i walongola wa mu zindelo zose za wo mulango wa Yuda na wa Benyamini, wakenuka hamonga ne wakohani, ne Walawi, ne wanhu wose, wono Muwaha Mulungu yali yawapamiza zi nhumbula zawo, ho wabite wakamuzenjele kanyhi Nyumba yakwe ku Yelusalemi.

⁶ Ale, i wekalani wayawo wono wali wawapilime, wakalamula kuwataza vinhu vyo kuzenjela. Wakawapela vinhu hayo hayo, hamonga ne viya zifweza na zahabu, ne mitugo, ne vinhu vinji vyo wuguzi wukamu, hamonga ne vilavywa vyo kulavya mu Nyumba yo Mulungu.

⁷ U mutemi Koleshi nayo, yakawagomolela i vikombe ne zibakuli, vyono Mutemi Nebukadineza, yali yavisola mu Nyumba yo Mulungu ku Yelusalemi, no kuviwika mu wuhembelo we milungu yakwe.

⁸ Mutemi Koleshi, yakaviwika mu miwoko ya Meteledati mono yali mulindilizi we zi sawo za mu wutemi wuwo. Nayo Meteledati yakavyandika liwalo lyayo, yakamupela Sheshibazali mono yali mulongola ku yisi ya Yuda.

⁹ Avino vyo vinhu vyono Koleshi yamupela Sheshibazali. Bakuli za zahabu zono zetumamilwaga so vilavywa, zali zili makumi madatu. Zi bakuli ze fweza zo kwitumamilwa mu wulavye, zali zili elufu monga. Bakuli zinji zinji, zali zili makumi mejete ne 'cenda.

¹⁰ Bakuli ndodondodo za zahabu, zali zili makumi madatu. Ne zibakuli ndodondodo ze fweza zali zili magana mane ne 'kumi. Viya vinji vidodododo, navyo vyali vili Elufu monga.

¹¹ Liwalo lyose lye viya vivi, likafika Elufu yihano na magana mane, vibakuli vya fweza ne zahabu. Vivyo vyo Sheshibazali yavibocela no kubita navyo ku Yelusalemi, hamonga ne wayagwe wono vyawukana ku wulawa ku Babiloni.